Maũndũ Marĩa Meekirũo nĩ Atũmwo
11 Na rĩrĩ, atũmwo na ariũ a Ithe witũ arĩa maarĩ Judea makĩigua atĩ andũ a ndũrĩrĩ o nao nĩ meetĩkĩrĩte kiugo kĩa Ngai. 2 Kwoguo rĩrĩa Petero aambatire agĩthiĩ Jerusalemu, andũ arĩa meekĩrĩire ũhoro wa kũrua+ makĩambĩrĩria kũmũmenereria,* 3 makĩmwĩraga: “Wee wathiire nyũmba ya andũ matarĩ aruu na ũkĩrĩanĩra nao.” 4 Nĩ ũndũ ũcio Petero akĩmataarĩria maũndũ mothe, akĩmeera atĩrĩ:
5 “Nĩ kũhoya ndahoyaga ndĩ thĩinĩ wa itũũra rĩa Jopa, na ngĩona kĩoneki, kĩndũ gĩatariĩ ta gĩtambaya kĩnene gĩa gatani gĩgĩikũrũkio nginya thĩ kĩnyitĩtwo mĩthia yakĩo ĩna, na gĩgĩikũrũka nginya o harĩa ndarĩ.+ 6 Rĩrĩa ndakĩrorire wega, ngĩona nyamũ cia gũkũ thĩ cia magũrũ mana, nyamũ cia gĩthaka, na iria itambaga thĩ, na nyoni cia rĩera-inĩ.* 7 Ningĩ ngĩigua mũgambo wanjĩĩra atĩrĩ: ‘Petero, ũkĩra ũthĩnje na ũrĩe!’ 8 No niĩ ngiuga: ‘Ndingĩka ũguo Mwathani, tondũ kĩndũ kĩrĩ thahu kana gĩtarĩ gĩtheru gĩtirĩ gĩatonya kanua gakwa.’ 9 Mũgambo ũcio kuuma igũrũ ũkĩnjarĩria riita rĩa kerĩ ũkĩnjĩra: ‘Wee tiga kuuga atĩ indo iria Ngai atheretie nĩ irĩ thahu.’ 10 Gũgĩkĩka ũguo riita rĩa gatatũ, na indo icio ciothe ikĩguucio igĩcokio igũrũ. 11 Ningĩ, o hĩndĩ ĩyo, arũme atatũ magĩũka nyũmba-inĩ ĩrĩa twaikaraga, matũmĩtwo kũrĩ niĩ kuuma Kaisarea.+ 12 Naguo roho ũkĩnjĩra thiĩ hamwe nao itegũthangania o na hanini. Ariũ aya a Ithe witũ atandatũ o nao magĩthiĩ hamwe na niĩ, na tũgĩtonya nyũmba ya mũndũ ũcio.
13 “Agĩtwĩra ũrĩa oonire mũraika arũgamĩte nyũmba-inĩ yake na akĩmwĩra: ‘Tũma andũ mathiĩ Jopa mageete Simoni ũrĩa wĩtagwo Petero,+ 14 na nĩ egũkwĩra maũndũ marĩa wee na andũ othe a nyũmba yaku mwagĩrĩirũo nĩ gwĩka nĩguo mũhonokio.’ 15 No rĩrĩa ndambĩrĩirie kwaria, roho mũtheru ũgĩikũrũka igũrũ rĩao o ta ũrĩa waikũrũkire igũrũ ritũ kĩambĩrĩria-inĩ.+ 16 Hĩndĩ ĩyo ngĩririkana ũrĩa Mwathani ooigaga: ‘Johana aabatithanagia na maĩ,+ no inyuĩ nĩ mũkaabatithio na roho mũtheru.’+ 17 Kwoguo-rĩ, angĩkorũo Ngai nĩ aamaheire kĩheo o kĩrĩa aatũheire o ũguo tũhũ ithuĩ twĩtĩkĩtie Mwathani Jesu Kristo-rĩ, niĩ ndakĩrĩ ũ nĩguo hote kũgirĩrĩria Ngai?”*+
18 Rĩrĩa maaiguire maũndũ macio, magĩtiga kũregana na ũhoro ũcio,* na makĩgooca Ngai makiugaga: “Gwakorũo nĩ ũguo-rĩ, Ngai nĩ aheete andũ a ndũrĩrĩ o nao mweke wa kwĩrira nĩguo makaagĩa na muoyo.”+
19 Na rĩrĩ, andũ arĩa maahurunjũkĩte+ nĩ ũndũ wa mĩnyamaro ĩrĩa yaambĩrĩirie nĩ ũndũ wa Stefano, magĩthiĩ nginya Foenicia, Kuporo, na Antiokia, no maahunjagĩria o Ayahudi.+ 20 No rĩrĩ, andũ amwe gatagatĩ-inĩ kao kuuma Kuporo na Kurene magĩthiĩ Antiokia na makĩambĩrĩria kwaria na andũ arĩa maaragia Kĩngiriki, makĩmahunjĩria ũhoro ũrĩa mwega wa Mwathani Jesu. 21 Makĩria ma ũguo-rĩ, guoko kwa Jehova* kwarĩ hamwe nao, na andũ aingĩ magĩtuĩka etĩkia na makĩgarũrũka makĩrũmĩrĩra Mwathani.+
22 Ũhoro wĩgiĩ andũ acio ũgĩkinyĩra kĩũngano kĩa Jerusalemu, na magĩtũma Baranaba+ athiĩ o nginya Antiokia. 23 Rĩrĩa aakinyire na akĩona ũtugi ũcio mũnene wa Ngai, agĩkena mũno na akĩambĩrĩria kũmekĩra ngoro othe mathiĩ na mbere gũikara marĩ ehokeku harĩ Mwathani matuĩte ũguo kuuma ngoro-inĩ;+ 24 nĩ gũkorũo aarĩ mũndũ mwega, waiyũrĩtwo nĩ roho mũtheru na wĩtĩkio. Nĩ ũndũ ũcio, kĩrĩndĩ kĩnene gĩkĩongerereka harĩ Mwathani.+ 25 Agĩcoka agĩthiĩ Tariso gũcaria Saulu na kĩyo kĩnene.+ 26 Rĩrĩa aamuonire, akĩmũrehe Antiokia. Nĩ ũndũ ũcio, kwa ihinda rĩa mwaka mũgima maacemanagia hamwe kĩũngano-inĩ na makaruta kĩrĩndĩ kĩnene, na kũu Antiokia nĩkuo arutwo maambĩrĩirie gwĩtwo Akristiano kũgerera ũtongoria wa Ngai.+
27 Matukũ-inĩ macio, anabii+ magĩikũrũka kuuma Jerusalemu magĩthiĩ Antiokia. 28 Ũmwe wao wetagwo Agabo+ akĩrũgama na akĩratha ateithĩtio nĩ roho atĩ nĩ kũngĩagĩire na ngʼaragu nene thĩinĩ wa thĩ yothe ĩrĩa ĩikaragwo,+ na nĩ ma ũndũ ũcio nĩ wekĩkire hĩndĩ ya Kilaudio. 29 Nĩ ũndũ ũcio, arutwo magĩtua itua rĩa gũtũma ũteithio*+ kũrĩ ariũ a Ithe witũ arĩa maaikaraga Judea, o mũndũ kũringana na ũrĩa angĩahotire;+ 30 na magĩka ũguo, makĩnengerana ũteithio ũcio kũrĩ Baranaba na Saulu matwarĩre athuri a kĩũngano.+