Isaia
2 Na o ũmwe wao agaakoragwo atariĩ ta handũ ha* kwĩhitha rũhuho,
Handũ ha kwĩgitia* mbura ya kĩhuhũkanio,
O ta tũrũũĩ twa maĩ bũrũri-inĩ ũtarĩ maĩ,+
O ta kĩĩruru kĩa ndũmba nene ya ihiga bũrũri-inĩ mũngʼaru.
3 Namo maitho ma andũ arĩa monaga matigaacoka kũhingwo rĩngĩ,
Na matũ ma andũ arĩa maiguaga nĩ magaathikĩrĩria.
4 Ngoro cia andũ arĩa mekaga maũndũ matambĩte gwĩciria nĩ igecũrania ũhoro wa ũmenyo,
Na rũrĩmĩ rũrĩa rũtondoiraga nĩ rũkaaria wega na njĩra ĩraiguĩka.+
5 Mũndũ ũrĩa ũtarĩ wĩcirio ndagaacoka gwĩtwo mũtaana rĩngĩ,
Na ũrĩa ũtarĩ mũrũgamo ndakeerũo nĩ arĩ igweta;
6 Tondũ mũndũ ũrĩa ũtarĩ wĩcirio akaaria maũndũ matarĩ na kũrĩa marĩ,
Na ngoro yake ĩthugunde maũndũ moru,+
Nĩgetha agaathĩrĩrie ũregenyũki* na arie maũndũ moru megiĩ Jehova,
Atũme ũrĩa mũhũtu age kũheo irio
Na aime ũrĩa mũnyotu kĩndũ gĩa kũnyua.
7 Njĩra cia gwĩka maũndũ cia mũndũ ũrĩa ũtarĩ mũrũgamo nĩ njũru;+
Agaathagĩrĩria mĩtugo ya thoni
Nĩguo anange ũrĩa mũhinyĩrĩrĩku na ũhoro wa maheeni,+
O na rĩrĩa mũndũ ũrĩa mũthĩni aria maũndũ ma ma.
8 Ĩndĩ ũrĩa mũtaana akoragwo na mĩoroto ya ũtaana,
Na akiragĩrĩria maũndũ-inĩ ma ũtaana.
9 “Atĩrĩrĩ inyuĩ atumia aya mũtatindanagĩra na maũndũ, ũkĩrai na mũthikĩrĩrie mũgambo wakwa!
Inyuĩ airĩtu aya mũtarĩ ũndũ mwĩtigagĩra,+ thikĩrĩriai ũrĩa ndĩroiga!
10 Ihinda-inĩ rĩa mwaka na thikũ itarĩ nyingĩ, inyuĩ mũtarĩ ũndũ mwĩtigagĩra nĩ mũkaainaina,
Tondũ gũtirĩ maciaro magaakorũo macokanĩrĩirio rĩrĩa magetha ma thabibũ magaathira.+
11 Inainai, inyuĩ atumia aya mũtatindanagĩra na maũndũ!
Thingithai, inyuĩ mũtarĩ ũndũ mwĩtigagĩra!
Mwĩyaũrei nguo,
Na mwĩhumbe nguo cia makũnia njohero-inĩ cianyu.+
12 Hũũrai ithũri cianyu mũgĩcakayaga
Nĩ ũndũ wa mĩgũnda ĩrĩa ya kwĩrirĩrio o na mũthabibũ ũrĩa ũrutaga maciaro maingĩ.
13 Nĩ gũkorũo bũrũri wa andũ akwa ũgaakorũo ũhumbĩrĩtwo nĩ mĩigua;
Ĩkaahumbĩra nyũmba ciothe cia ikeno,
O rĩo itũũra rĩa mwĩraho.+
14 Tondũ nyũmba ĩrĩa ndaya na igũrũ ĩrĩ na ũgitĩri nĩ ĩtiganĩirio;
Itũũra rĩrĩa rĩrĩ inegene rĩingĩ nĩ itiganĩrie.+
Ofeli+ o na nyũmba ĩrĩa ndaya na igũrũ ya mũrangĩri ituĩkĩte kũndũ kwanangĩku na igũtũũra ũguo,
Kũndũ kwendetwo nĩ ndigiri cia gĩthaka,
Gwa kũrĩithio ndũũru,+
15 Nginya rĩrĩa tũgaaitĩrĩrio roho kuuma igũrũ,+
Na werũ ũtuĩke mũgũnda wa matunda,
Naguo mũgũnda wa matunda ũhaanane na mũtitũ.+
16 Hĩndĩ ĩyo kĩhooto gĩgaatũũraga werũ-inĩ,
Na ũthingu ũtũũre mũgũnda-inĩ wa matunda.+
17 Moimĩrĩro ma ũthingu wa ma magaakorũo marĩ thayũ,+
Namo maciaro ma ũthingu wa ma magaakorũo marĩ ũhooreri na ũgitĩri wa gũtũũra.+
18 Andũ akwa magaatũũra handũ harĩ na thayũ,
Kũndũ kũrĩ na ũgitĩri na kũndũ kũhooreru gwa kũhurũka.+
19 Ĩndĩ mbura ya mbembe nĩ ĩkaaragania mũtitũ,
Narĩo itũũra rĩigananio biũ.