Ũhoro Mwega Ũrĩa Waandĩkirũo nĩ Mathayo
8 Rĩrĩa aaikũrũkire kuuma kĩrĩma-inĩ kĩu, kĩrĩndĩ kĩnene gĩkĩmũrũmĩrĩra. 2 Na rĩrĩ, mũndũ warĩ na mangũ agĩũka harĩ we akĩmũinamĩrĩra, akĩmwĩra: “Mwathani, angĩkorũo no wende, theria.”+ 3 Nĩ ũndũ ũcio agĩtambũrũkia guoko gwake, akĩmũhutia, akĩmwĩra: “Nĩ ngwenda! Thera.”+ Hĩndĩ o ĩyo mangũ macio make magĩthira.+ 4 Nake Jesu akĩmwĩra ũũ: “Ndũkere mũndũ o na ũrĩkũ,+ no thiĩ wĩyonanie kũrĩ mũthĩnjĩri-Ngai,+ na ũrute kĩheo kĩrĩa Musa aathanire,+ nĩguo magĩe na ũira.”
5 Na rĩrĩa aaingĩrire Kaperinaumu, mũnene ũmwe wa mbũtũ agĩũka kũrĩ we, akĩmũthaitha+ 6 akĩmwĩra: “Mwathi wakwa, ndungata yakwa ĩrĩ nyũmba ĩkomete nĩ kũrwara mũrimũ wa gũkua ciĩga, na nĩ ĩranyamarĩka mũno.” 7 Akĩmwĩra ũũ: “Ndakinya kuo nĩ ngũmĩhonia.” 8 Mũnene ũcio wa mbũtũ akĩmũcokeria atĩrĩ: “Mwathi wakwa, niĩ ndirĩ mwagĩrĩru wa gũkũnyita ũgeni gwakwa nyũmba, no uga o kiugo kĩmwe na ndungata yakwa nĩ ĩkũhona. 9 Tondũ o na niĩ ngoragwo rungu rwa wathani, na ndĩ na thigari ikoragwo rungu rwakwa, na ingĩra mũthigari ũmwe, ‘Thiĩ!’ no gũthiĩ athiaga, na ingĩra ũngĩ ‘Ũka!’ no gũka okaga, na ingĩra ngombo yakwa, ‘Ĩka ũũ!’ noguo ĩkaga.” 10 Rĩrĩa Jesu aaiguire ũguo, akĩgega na akĩra arĩa maamũrũmĩrĩire atĩrĩ: “Ngũmwĩra atĩrĩ o ma, ndirĩ ndona mũndũ ũrĩ na wĩtĩkio mũnene ta ũyũ thĩinĩ wa Isiraeli.+ 11 No ngũmwĩra atĩ andũ aingĩ a kuuma mwena wa irathĩro na wa ithũĩro nĩ magooka na maikare thĩ metha-inĩ ĩmwe na Iburahimu na Isaaka na Jakubu thĩinĩ wa Ũthamaki wa igũrũ;+ 12 nao ariũ a Ũthamaki nĩ magaaikio nja nduma-inĩ. Kũu nĩkuo makaarĩragĩra na makahagarania magego.”+ 13 Jesu agĩcoka akĩra mũnene ũcio wa mbũtũ atĩrĩ: “Thiĩ. O ta ũrĩa wonania wĩtĩkio-rĩ, nĩ gwĩkĩke ũguo harĩ wee.”+ Na ndungata ĩyo ĩkĩhonio o hĩndĩ ĩyo.+
14 Na rĩrĩa Jesu aathiire kwa Petero, akĩona nyina wa mũtumia wa Petero+ akomete arĩ mũrwaru mũrimũ wa kũhiũha mwĩrĩ.+ 15 Nĩ ũndũ ũcio akĩmũhutia guoko,+ agĩthirũo nĩ mũrimũ ũcio wa kũhiũha mwĩrĩ, na agĩũkĩra akĩambĩrĩria kũmũtungatĩra. 16 No gwakinya hwaĩ-inĩ, andũ makĩmũrehera andũ aingĩ maarĩ na ndaimono; na akĩmaruta maroho macio na kiugo o kĩmwe, na akĩhonia arĩa othe maanyamarĩkaga, 17 nĩguo ahingie ũhoro ũrĩa waaririo nĩ mũnabii Isaia, rĩrĩa ooigire: “We mwene nĩ ooire mĩrimũ itũ na agĩkuua ndwari citũ.”+
18 Rĩrĩa Jesu oonire kĩrĩndĩ kĩmũthiũrũrũkĩirie, agĩathana moimagare maringe mũrĩmo ũcio ũngĩ.+ 19 Na mwandĩki-watho ũmwe agĩũka akĩmwĩra: “Mũrutani, nĩ ndĩkũrũmagĩrĩra kũrĩa guothe ũrĩthiaga.”+ 20 No Jesu akĩmwĩra atĩrĩ: “Mbwe nĩ irĩ imamo, nacio nyoni cia rĩera-inĩ* nĩ irĩ itara, no Mũrũ wa mũndũ ndarĩ handũ ha kũigĩrĩra mũtwe wake.”+ 21 Nake mũrutwo ũngĩ akĩmwĩra ũũ: “Mwathani, njĩtĩkĩria nyambe thiĩ ngathike baba.”+ 22 Jesu akĩmwĩra: “Thiĩ na mbere kũnũmĩrĩra, na ũreke akuũ mathike akuũ ao.”+
23 Na rĩrĩa aahaicire gatarũ, arutwo ake makĩmũrũmĩrĩra.+ 24 Na rĩrĩ, gũkiumĩra kĩhuhũkanio kĩnene iria-inĩ, ũndũ gatarũ kaahumbĩragwo nĩ makũmbĩ; no we aarĩ toro.+ 25 Nao magĩthiĩ makĩmũũkĩria, makĩmwĩra atĩrĩ: “Mwathani, tũhonokie, tũrĩ hakuhĩ gũthira!” 26 No we akĩmoria: “Nĩ kĩĩ kĩratũma mwĩtigĩre* ũguo, inyuĩ mũrĩ na wĩtĩkio mũnini?”+ Agĩcoka agĩũkĩra, agĩkũũma huho icio o hamwe na iria, na gũkĩhoorera biũ.+ 27 Nao andũ acio makĩgega na makĩĩrana atĩrĩ: “Kaĩ ũyũ arĩ mũndũ wa mũthemba ũrĩkũ? Nginya huho na iria nĩ iramwathĩkĩra.”
28 Rĩrĩa aakinyire mũrĩmo ũcio ũngĩ gĩcigo-inĩ kĩa Agadari-rĩ, agĩcemania na andũ erĩ maarĩ na ndaimono moimĩte mbĩrĩra-inĩ.*+ Na maarĩ oru mũno, ũũ atĩ gũtirĩ mũndũ warĩ na ũmĩrĩru wa kũgera njĩra ĩyo. 29 Magĩkaya na mũgambo mũnene makiugaga: “Tũrorania kĩĩ nawe, Mũrũ wa Ngai?+ Hihi woka gũtũnyarira+ mbere ya ihinda rĩrĩa rĩtuĩtwo gũkinya?”+ 30 Na rĩrĩ, handũ haraya kuuma harĩa maarĩ, nĩ haarĩ na rũũru rwa ngũrũe nyingĩ ciarĩaga.+ 31 Na ndaimono icio ikĩambĩrĩria kũmũthaitha, ikĩmwĩra: “Angĩkorũo nĩ ũgũtũingata, twĩtĩkĩrie tũthiĩ tũingĩre thĩinĩ wa rũũru rũũrĩa rwa ngũrũe.”+ 32 Nake agĩciĩra: “Thiĩi!” Nacio ikiuma na igĩthiĩ ikĩingĩra thĩinĩ wa ngũrũe icio, na rĩrĩ, rũũru rũu ruothe rũgĩikũrũka kĩharũrũka-inĩ rũkĩgwa iria-inĩ na rũgĩkuĩra maĩ-inĩ. 33 No arĩithi makĩũra magĩthiĩ, na maakinya itũũra-inĩ, makĩheana maũndũ mothe, hamwe na ũhoro wĩgiĩ andũ acio maarĩ na ndaimono. 34 Na rĩrĩ, andũ othe a itũũra rĩu makiumũrũrũka magatũnge Jesu, na rĩrĩa maamuonire, makĩmũthaitha oime gĩcigo-inĩ kĩao.+