Kũrĩ Aroma
15 No ithuĩ arĩa tũrĩ na hinya-rĩ, nĩ twagĩrĩirũo gũkuuithagia arĩa matarĩ na hinya+ maũndũ mao ma kwaga hinya, na tũtigekenagie ithuĩ ene.+ 2 O ũmwe witũ nĩ akenagie mũndũ ũrĩa mariganĩtie nake na amwĩkage maũndũ mega, nĩguo amwake.+ 3 Tondũ o na Kristo ndeekenagia we mwene,+ ĩndĩ o ta ũrĩa kwandĩkĩtwo: “Nĩ ngwĩrĩirũo nĩ inyũrũri cia arĩa makũnyũrũragia.”+ 4 Nĩ gũkorũo maũndũ mothe marĩa maandĩkirũo tene maandĩkirũo marĩ ma gũtũruta,+ nĩgetha kũgerera ũkirĩrĩria witũ+ na kũgerera kũũmĩrĩrio nĩ Maandĩko tũgĩe na kĩĩrĩgĩrĩro.+ 5 Rĩu-rĩ, Ngai o ũcio ũheanaga ũkirĩrĩria na akomanĩrĩria aromũteithia nĩguo gatagatĩ-inĩ kanyu mũkoragwo na mwerekera wa meciria o ta ũrĩa Kristo Jesu aarĩ naguo, 6 nĩgetha mũrĩ na ũrũmwe+ na mũgambo ũmwe* mũgoocage Ngai, o we Ithe wa Mwathani witũ Jesu Kristo.
7 Nĩ ũndũ ũcio-rĩ, nyitanagai ũgeni,*+ o ta ũrĩa Kristo o nake aamũnyitire ũgeni,+ nĩgetha Ngai agoocagwo. 8 Tondũ ngũmwĩra atĩ Kristo aatuĩkire ndungata ya arĩa maruĩte+ nĩ ũndũ wa ũũma wĩgiĩ Ngai, nĩguo onanie atĩ ciĩranĩro iria Ngai eerĩire maithe mao ma tene nĩ cia ma,+ 9 ningĩ nĩgetha ndũrĩrĩ igoocage Ngai nĩ ũndũ wa tha ciake.+ O ta ũrĩa kwandĩkĩtwo ũũ: “Nĩkĩo ngũkũgooca mbere ya andũ gatagatĩ-inĩ ka ndũrĩrĩ, na nyine nyĩmbo ngooce rĩĩtwa rĩaku.”+ 10 Ningĩ ekuuga atĩrĩ: “Inyuĩ ndũrĩrĩ, kenai hamwe na andũ ake.”+ 11 Na gũkeerũo atĩrĩ: “Goocai Jehova,* inyuĩ ndũrĩrĩ ciothe, nacio ikundi ciothe cia andũ nĩ imũgooce.”+ 12 O na ningĩ Isaia oigĩte atĩrĩ: “Nĩ gũgooka mũri wa Jesii,+ o ũcio ũkaarahũka nĩguo aathe ndũrĩrĩ;+ ndũrĩrĩ nĩ ikaaiga kĩĩrĩgĩrĩro gĩacio harĩ we.”+ 13 Ngai ũrĩa ũheanaga kĩĩrĩgĩrĩro aromũiyũria gĩkeno gĩothe na thayũ nĩ ũndũ wa kũmwĩhoka, nĩgetha mũkĩrĩrĩrie kũgĩa na* kĩĩrĩgĩrĩro mũrĩ na hinya wa roho mũtheru.+
14 Ariũ a Ithe witũ, niĩ mwene ndirĩ na nganja o na hanini kũmwerekera, atĩ o na inyuĩ nĩ mũiyũrĩtwo nĩ wega, na mũkaiyũrũo nĩ ũmenyo wothe, na atĩ nĩ mũhotaga gũtaarana* mũndũ na ũrĩa ũngĩ. 15 No rĩrĩ, ndamwandĩkĩra maũndũ mamwe itekũhithĩrĩra, nĩgetha ndĩmũhe kĩririkania kĩngĩ, tondũ wa ũtugi mũnene ũrĩa heetwo kuuma kũrĩ Ngai 16 nĩguo nduĩke ndungata ya mũingĩ ya Kristo Jesu kũrĩ ndũrĩrĩ.+ Ndutaga wĩra mũtheru wa ũhoro ũrĩa mwega wa Ngai,+ nĩgetha ndũrĩrĩ icio ituĩke igongona rĩretĩkĩrĩka, rĩtheretio na roho mũtheru.
17 Nĩ ũndũ ũcio ndĩ na gĩtũmi gĩa gũkena thĩinĩ wa Kristo Jesu nĩ ũndũ wa maũndũ megiĩ Ngai. 18 Nĩ gũkorũo ndikwaria ũhoro ũngĩ tiga o ũrĩa Kristo ekĩte kũgerera harĩ niĩ nĩguo ndũrĩrĩ ciathĩke, kũgerera kiugo gĩakwa na ciĩko ciakwa, 19 na hinya wa imenyithia na maũndũ ma magegania,*+ na hinya wa roho wa Ngai, kuuma Jerusalemu na gũthiũrũrũka nginya Iluriko nĩ hunjĩtie kĩhinyio ũhoro ũrĩa mwega wĩgiĩ Kristo.+ 20 Na njĩra ĩyo, ngĩtua itua rĩa kwaga kũhunjia ũhoro ũrĩa mwega kũrĩa rĩĩtwa rĩa Kristo rĩarĩkĩtie kũmenyithanio, nĩgetha ndikae gwaka igũrũ rĩa mũthingi wa mũndũ ũngĩ; 21 no o ta ũrĩa kwandĩkĩtwo: “Arĩa mataaheirũo ũhoro ũmwĩgiĩ nĩ makoona, nao arĩa matarĩ maigua nĩ magaataũkĩrũo.”+
22 Ningĩ nĩkĩo gĩatũmaga maita maingĩ nemwo nĩ gũka kũrĩ inyuĩ. 23 No rĩu gũtirĩ kũndũ itahunjĩtie icigo-inĩ ici, na nĩ ngoretwo ngĩĩrirĩria gũka kũrĩ inyuĩ mĩaka mĩingĩ.* 24 Nĩ ũndũ ũcio, rĩrĩa ngaakorũo ngĩthiĩ Sipania, ndĩrerĩgĩrĩra atĩ nĩ ngaamuona na mũnyumagarie hanini ngĩthiĩ kuo thutha wa kwamba gũkenera gũikarania na inyuĩ kwa ihinda. 25 No rĩu ndĩ hakuhĩ gũthiĩ Jerusalemu gũtungata arĩa aamũre.+ 26 Tondũ arĩa marĩ Makedonia na Akaia nĩ makenete kũgayana indo ciao na njĩra ya kũruta mũhothi nĩ ũndũ wa arĩa athĩni gatagatĩ-inĩ ka arĩa aamũre thĩinĩ wa Jerusalemu.+ 27 Nĩ ma nĩ makenete gwĩka ũguo, na ti itherũ maarĩ na thiirĩ wao; tondũ angĩkorũo andũ a ndũrĩrĩ nĩ manyitanĩire maũndũ ma kĩĩroho hamwe nao-rĩ, o nao marĩ na thiirĩ wa kũmatungata na indo ciao cia kĩĩmwĩrĩ.+ 28 Kwoguo ndarĩkia gwĩka ũguo na ndamakinyĩria mũhothi ũyũ* o thayũ, nĩ ngaagerera kũrĩ inyuĩ njerekeire Sipania. 29 Ningĩ, nĩ njũĩ atĩ rĩrĩa ngooka kũrĩ inyuĩ, nĩ ngaamũrehera gĩthimi kĩiyũru gĩa kĩrathimo kuuma kũrĩ Kristo.
30 Rĩu ariũ a Ithe witũ-rĩ, ndĩramũthaitha kũgerera Mwathani witũ Jesu Kristo na kũgerera wendo ũrĩa uumanaga na roho, atĩ mwĩrutanĩrie hamwe na niĩ kũhoya Ngai nĩ ũndũ wakwa,+ 31 nĩgetha honokio+ kuumana na arĩa matarĩ etĩkia thĩinĩ wa Judea na nĩgetha ũtungata wakwa thĩinĩ wa Jerusalemu ũgeetĩkĩrĩka harĩ arĩa aamũre,+ 32 nĩguo angĩkorũo nĩ wendi wa Ngai, ngooka kũrĩ inyuĩ ndĩ na gĩkeno na njĩkĩrũo hinya hamwe na inyuĩ. 33 Ngai ũrĩa ũheanaga thayũ aroikara hamwe na inyuĩ inyuothe.+ Ameni.