Ayubu
15 Nake Elifazu+ ũrĩa Mũtemani agĩcokia akiuga atĩrĩ:
2 “Kaĩ mũndũ mũũgĩ angĩgĩcokia na ciugo cia tũhũ,*
Kana aiyũrie nda yake rũhuho rwa mwena wa irathĩro?
3 Kũhũthĩra ciugo theri harĩ kũrũnga gũtingĩteithia,
Na kwaria gwiki gũtirĩ ũguni.
4 Nĩ gũkorũo nĩ ũhũthagia ũhoro wa gwĩtigĩra Ngai,
Na ũgatũma ũhoro o wothe wa gwĩcũrania igũrũ rĩgiĩ Ngai wage bata.
5 Nĩ gũkorũo mahĩtia maku nĩmo maratũma uuge maũndũ macio ũroiga,*
Na ũgathuura kũhũthĩra mĩario ya wara.
6 Kanua gaku mwene nĩko karagũtuĩra ciira, no ti niĩ;
Mĩromo yaku mwene nĩyo ĩraruta ũira wa gũgũũkĩrĩra.+
7 Hihi wee nĩwe warĩ wa mbere gũciarũo,
Kana waciarirũo mbere ya irĩma?
8 Kaĩ ũthikagĩrĩria mĩario ya hitho ya Ngai,
Kana wee nowe ũkoragwo na ũũgĩ?
9 Nĩ ũndũ ũrĩkũ ũĩ ithuĩ tũtoĩ?+
Nĩ ũndũ ũrĩkũ ũtaũkĩirũo ithuĩ tũkaga gũtaũkĩrũo?
10 Gatagatĩ-inĩ gaitũ harĩ na athuri marĩ na mbuĩ o na arĩa akũrũ,+
Athuri akũrũ gũkĩra thoguo.
11 Kaĩ maũndũ marĩa Ngai arakũũmĩrĩria namo matakũiganĩte,
Kana ciugo iria wĩrĩtwo na njĩra ya ũhooreri?
12 Ũretĩkĩria ngoro yaku ĩgũtongorie ũũru nĩkĩ,
Na maitho maku magakorũo na marakara?
13 Nĩ gũkorũo werekeirie marakara maku harĩ Ngai we mwene,
Na ũkareka ciugo ta icio ciume kanua-inĩ gaku.
14 Mũndũ-rĩ, nĩwe kĩ atĩ nĩguo akorũo arĩ mũtheru,
Kana mũndũ o wothe ũciarĩtwo nĩ mũtumia atĩ nĩguo akorũo arĩ mũthingu?+
15 Atĩrĩrĩ, Ngai ndakoragwo ehokete arĩa ake atheru,
Na nginya igũrũ rĩtikoragwo rĩrĩ itheru maitho-inĩ make.+
16 Angĩkĩĩhoka atĩa mũndũ wonagwo arĩ kĩndũ kĩrĩ magigi na mwaganu,+
Mũndũ ũnyuaga maũndũ matarĩ ma ũthingu ta ũrĩa anyuaga maĩ!
17 Nĩ ngũkũhe ũhoro; thikĩrĩria!
Nĩ ngũgũtaarĩria maũndũ marĩa nyonete,
18 Maũndũ marĩa andũ ogĩ moigĩte marutĩte kũrĩ maithe mao,+
Makamoiga matekũhithĩrĩra.
19 Acio oiki nĩo maaheirũo bũrũri,
Na gũtirĩ mũgeni watuĩkanagĩria gatagatĩ-inĩ kao.
20 Mũndũ mwaganu anyamarĩkaga matukũ make mothe,
Mĩaka yothe ĩrĩa ĩigĩirũo mũndũ ũrĩa ũhinyanagĩrĩria.
21 Aiguaga mĩgambo ya gũtũma etigĩre;+
Atharĩkagĩrũo nĩ atunyani hĩndĩ ĩrĩa kũrĩ na thayũ.
22 Ndetĩkĩtie atĩ no ahonoke kuuma nduma-inĩ;+
Akoragwo aigĩirũo rũhiũ rwa njora.
23 Orũraga agĩcaria irio,* na akoria atĩrĩ: “Irĩ kũ?”
Nĩ amenyaga wega atĩ mũthenya wa nduma ũrĩ hakuhĩ.
24 Aikaraga na guoya nĩ ũndũ wa mĩtangĩko na ruo;
Ikamũtooria o ta mũthamaki wĩhaarĩirie gũtharĩkĩra.
25 Nĩ gũkorũo atambũrũkagia guoko okĩrĩre Ngai we mwene
Na akageria gũkararia* Mwene-Hinya-Wothe;
26 Amũhanyũkagĩra omĩtie kĩongo,
Arĩ na ngo yake njariĩ na ĩrĩ hinya;
27 Ũthiũ wake ũhumbĩrĩtwo nĩ maguta,
Nayo njohero yake ĩkaimbio nĩ maguta;
28 Aikaraga thĩinĩ wa matũũra marĩcoka kwanangwo,
Thĩinĩ wa nyũmba itagaatũũrũo nĩ mũndũ,
O icio igaatuĩka irũndo cia mahiga.
29 Ndagaatonga, na ũtonga wake ndũkaingĩha,
O na indo ciake itigaatherema thĩinĩ wa bũrũri.
30 Ndakaahonoka kuuma nduma-inĩ;
Rũrĩrĩmbĩ nĩ rũkoomia karũhonge gake,*
Na nĩ akaaniinwo nĩ mũtuthũko wa kanua ka Ngai.+
31 Ndagĩrĩirũo kũũra njĩra ehoke maũndũ ma tũhũ,
Tondũ moimĩrĩro magaakorũo marĩ o maũndũ ma tũhũ;
32 Ũndũ ũcio ũgeekĩka mbere ya mũthenya wake,
Na gũtirĩ hĩndĩ honge ciake igaatherema.+
33 Agaakorũo atariĩ ta mũthabibũ ũraita thabibũ itarĩ ngũrũ,
Na ahaane ta mũtamaiyũ ũraita kĩro kĩaguo.
34 Tondũ gĩkundi kĩa andũ arĩa matetigĩrĩte Ngai* gĩtingĩgĩa na maciaro,+
Na mwaki nĩ ũgaacina hema cia arĩa moyaga mahaki.
35 Mohaga nda cia mathĩna na magaciara maũndũ ma waganu,
Nacio nda ciao irutaga o maũndũ ma maheeni.”