Ezekieli

7 Kiugo kĩa Jehova gĩkĩnginyĩra o rĩngĩ ngĩrũo atĩrĩ: 2 “Nawe mũrũ wa mũndũ-rĩ, Jehova Mwathani Ũrĩa Mũnene ekwĩra bũrũri wa Isiraeli ũũ: ‘Ithirĩro! Ithirĩro nĩ rĩkinyĩrĩire ituri iria inya cia bũrũri ũyũ. 3 Rĩu ithirĩro nĩ rĩgũkinyĩrĩire, na nĩ ngaaitũrũra marakara makwa magũũkĩrĩre, na nĩ ngaagũtuĩra kũringana na njĩra ciaku na ngũciirithie nĩ ũndũ wa ciĩko ciaku ciothe irĩ magigi. 4 Riitho rĩakwa rĩtigaakũiguĩra tha; na ndigaagũcaĩra,+ nĩ gũkorũo nĩ ngaatũma wone moimĩrĩro ma njĩra ciaku mwene, na ũnyamarĩke nĩ ũndũ wa ciĩko ciaku irĩ magigi.+ Na nĩ mũkaamenya atĩ niĩ nĩ niĩ Jehova.’+

5 “Jehova Mwathani Ũrĩa Mũnene oigĩte ũũ: ‘Atĩrĩrĩ, nĩ harĩ thĩna ũroka, thĩna ũtarĩ wonwo.+ 6 Ithirĩro nĩ rĩroka; ithirĩro rĩu nĩ rĩgũka; rĩkwarahũka rĩgũũkĩrĩre. Atĩrĩrĩ, nĩ rĩroka. 7 Ihinda rĩaku nĩ ikinyu, wee ũikaraga bũrũri ũyũ. Ihinda nĩ rĩroka, naguo mũthenya ũrĩ hakuhĩ.+ Kũrĩ na guoya mũnene no ti inegene rĩa gĩkeno irĩma-inĩ.

8 “‘Ica ikuhĩ nĩ ngũgũitũrũrĩra mathũgũta makwa,+ na ngũitũrũrĩre biũ marakara makwa,+ na nĩ ngaagũtuĩra kũringana na njĩra ciaku na ngũciirithie nĩ ũndũ wa ciĩko ciaku ciothe irĩ magigi. 9 Riitho rĩakwa rĩtigaakũiguĩra tha; na ndigaagũcaĩra.+ Nĩ ngaatũma wone moimĩrĩro ma njĩra ciaku mwene, na ũnyamarĩke nĩ ũndũ wa ciĩko ciaku irĩ magigi. Na nĩ mũkaamenya atĩ niĩ Jehova, nĩ niĩ ndĩramũhũũra.+

10 “‘Atĩrĩrĩ, mũthenya nĩguo ũyũ! Na rĩrĩ, nĩ ũroka!+ Ihinda rĩaku nĩ ikinyu; rũthanju nĩ rũcanũkĩte, naguo mwĩtĩo ũgathundũka. 11 Ũhinya nĩ ũkũrĩte ũgatuĩka rũthanju rwa waganu.+ Gũtirĩ o na ũmwe wao ũgaatigara, o na kana ũtonga wao kana irĩndĩ ciao kana igweta rĩao. 12 Ihinda nĩ rĩgooka, naguo mũthenya ũkinye. Mũgũri nĩ atige gũkena, nake mwendia nĩ atige gũcakaya, tondũ kĩrĩndĩ kĩao gĩothe nĩ gĩũkĩrĩirũo nĩ mangʼũrĩ.*+ 13 Nĩ gũkorũo mwendia ndagaacoka kũrĩ kĩrĩa kĩendetio o na angĩaga kũũragwo, tondũ kĩoneki kĩu gĩkoniĩ kĩrĩndĩ gĩothe. Gũtirĩ o na ũmwe wao ũgaacoka, na tondũ wa mehia make,* gũtirĩ o na ũmwe wao ũkaahonokia muoyo wake.

14 “‘Nĩ mahuuhĩte karumbeta,+ na andũ othe nĩ mehaarĩirie, no gũtirĩ mũndũ ũrathiĩ mbaara-inĩ, tondũ mangʼũrĩ makwa mokĩrĩire kĩrĩndĩ gĩothe.+ 15 Rũhiũ rwa njora rũrĩ nja,+ naguo mũrimũ mũũru na ngʼaragu irĩ thĩinĩ. Mũndũ o wothe ũrĩ mĩgũnda-inĩ akooragwo na rũhiũ rwa njora, nayo ngʼaragu na mũrimũ mũũru iniine arĩa marĩ thĩinĩ wa itũũra.+ 16 Andũ ao arĩa makaahonoka matigare magaathiĩ irĩma-inĩ, na o mũndũ acaye ta ndutura cia mĩkuru-inĩ nĩ ũndũ wa mehia make.+ 17 Moko mao mothe nĩ makaaregera morĩtwo nĩ hinya, na maru mao mothe mataate maĩ.*+ 18 Nĩ mehumbĩte nguo cia makũnia,+ na makanyitwo* nĩ kĩmako. Andũ othe nĩ magaaconorithio, na mĩtwe yothe ĩgĩe kĩhara.*+

19 “‘Magaaikia betha ciao njĩra-inĩ, na mathũũre thahabu ciao. Betha ciao o na thahabu ciao itikaahota kũmahonokia mũthenya wa marakara ma Jehova.+ Matikaigania, kana maiyũrie nda ciao, tondũ nĩ ituĩkĩte* mũhĩnga igatũma mehie. 20 Maarĩ na mwĩtĩo nĩ ũndũ wa ũgemu wa mathaga mao, na nĩ maamahũthĩrire* gũthondeka indo ciao irĩ magigi, mĩhianano yao ĩrĩ magigi.+ Nĩkĩo ngaatũma macithũũre. 21 Nĩ ngaacineana* kũrĩ andũ a kũngĩ ciiywo na kũrĩ andũ arĩa aganu a thĩ macitahe, na nĩ magaacithahia.

22 “‘Nĩ ngaahũgũra ũthiũ wakwa kuuma kũrĩ o,+ na nĩ magaathahia handũ hakwa harĩa hahithe,* na atunyani nĩ makaaingĩra ho mahathahie.+

23 “‘Thondeka mũnyororo,*+ tondũ bũrũri ũiyũire ũiti wa thakame ũtarĩ wa kĩhooto+ na itũũra rĩkaiyũra ũhinya.+ 24 Nĩ ngaarehe ndũrĩrĩ iria njũru biũ,+ na nĩ ikeegwatĩra nyũmba ciao,+ na nĩ ngaaniina mwĩtĩo wa arĩa marĩ hinya, na kũndũ kwao kũrĩa gũtheru nĩ gũgaathahio.+ 25 Rĩrĩa kĩeha kĩao gĩgooka-rĩ, magaacaria thayũ, no matikawona.+ 26 Thĩna ũkaarũmĩrĩrũo nĩ ũngĩ, naguo ũhoro mũũru ũrũmĩrĩrũo nĩ ũngĩ, na andũ magaacaria kĩoneki kuuma kũrĩ mũnabii,+ no watho* nĩ ũgaathira harĩ mũthĩnjĩri-Ngai, nao athuri* matigaakorũo na ũtaaro wa kũheana.+ 27 Mũthamaki nĩ agaacakaya,+ nake mũtongoria anyitwo nĩ kĩeha, namo moko ma andũ a bũrũri mainaine nĩ ũndũ wa guoya. Nĩ ngaameka kũringana na njĩra ciao, na ndĩmatuĩre o ta ũrĩa matuanĩire. Na nĩ makaamenya atĩ niĩ nĩ niĩ Jehova.’”+