Ezekieli

6 Kiugo kĩa Jehova nĩ kĩanginyĩire o rĩngĩ ngĩrũo atĩrĩ: 2 “Mũrũ wa mũndũ, erekeria ũthiũ waku irĩma-inĩ cia Isiraeli na ũcirathĩre ũhoro wa gũciũkĩrĩra. 3 Ũciĩre atĩrĩ, ‘Inyuĩ irĩma cia Isiraeli, iguai kiugo kĩa Jehova Mwathani Ũrĩa Mũnene: Ũũ nĩguo Jehova Mwathani Ũrĩa Mũnene arera irĩma, tũrĩma, tũrũũĩ, na mĩkuru: “Atĩrĩrĩ, nĩ ngaarehe rũhiũ rwa njora rũmũũkĩrĩre, na nĩ ngaananga kũndũ kwanyu kũrĩa gũtũũgĩru. 4 Igongona cianyu nĩ ikaamomorũo, indo cianyu cia gũcinĩra ũbumba ciunangwo,+ na andũ anyu arĩa magaakorũo moragĩtwo ndĩmaikie mbere ya mĩhianano ĩyo yanyu ĩrĩ magigi.*+ 5 Nĩ ngaaikia ciimba cia andũ a Isiraeli mbere ya mĩhianano ĩyo yao ĩrĩ magigi, na nĩ ngaahurunja mahĩndĩ manyu kũndũ guothe igongona-inĩ cianyu.+ 6 Kũrĩa guothe mũtũũraga-rĩ, matũũra makuo nĩ makaaniinwo+ nakuo kũndũ kũrĩa gũtũũgĩru kũmomorũo na gũikare kwanangĩtwo.+ Igongona cianyu nĩ ikaamomorũo na ithũkangio, mĩhianano ĩyo yanyu ĩrĩ magigi ĩniinwo, indo cianyu cia gũcinĩra ũbumba ciunangwo, na mawĩra manyu maniinwo. 7 Na arĩa magaakorũo moragĩtwo makaagwa gatagatĩ-inĩ kanyu,+ na nĩ mũkaamenya atĩ niĩ nĩ niĩ Jehova.+

8 “‘“No nĩ ngaareka kũgĩe na matigari, nĩ gũkorũo amwe anyu nĩ makaahonoka kũũragwo na rũhiũ rwa njora gatagatĩ-inĩ ka ndũrĩrĩ hĩndĩ ĩrĩa mũkaahurunjũka kũndũ guothe mabũrũri-inĩ.+ 9 Na arĩa makaahonoka nĩ makaandirikana marĩ ndũrĩrĩ-inĩ kũrĩa magaatwarũo ithamĩrio.+ Nĩ makaamenya atĩ nĩ matũmĩte ngĩe na kĩeha nĩ ũndũ wa ngoro ciao kwaga kwĩhokeka* ikandiganĩria,+ na nĩ ũndũ wa maitho mao marĩa meriragĩria mĩhianano yao ĩrĩ magigi.+ Nĩ magaaconoka na mathũũre maũndũ mothe moru na marĩ magigi marĩa mekĩte.+ 10 Nĩ makaamenya atĩ niĩ nĩ niĩ Jehova na atĩ mĩkaana ĩrĩa ndamaheire ya kũmarehera thĩna ũyũ ndĩarĩ ya tũhũ.”’+

11 “Jehova Mwathani Ũrĩa Mũnene oigĩte ũũ: ‘Hũũra hĩ na ũhũrithie makinya maku thĩ na ũcakae nĩ ũndũ wa maũndũ mothe moru na marĩ magigi marĩa mekĩtwo nĩ nyũmba ya Isiraeli, nĩ gũkorũo makooragwo na rũhiũ rwa njora, ngʼaragu, na mũrimũ mũũru.+ 12 Mũndũ ũrĩ kũraya akooragwo nĩ mũrimũ mũũru, nake ũrĩa ũrĩ hakuhĩ oragwo nĩ rũhiũ rwa njora, na mũndũ o wothe ũkaahonoka maũndũ macio atigare, akooragwo nĩ ngʼaragu, na nĩ ngaamaitũrũrĩra mangʼũrĩ makwa biũ.+ 13 Na nĩ mũkaamenya atĩ niĩ nĩ niĩ Jehova+ rĩrĩa andũ ao arĩa moragĩtwo magaakorũo magwĩte gatagatĩ-inĩ ka mĩhianano yao ĩrĩ magigi, kũndũ guothe igongona-inĩ ciao,+ tũrĩma-inĩ tuothe tũrĩa tũraihu, tũcũmbĩrĩ-inĩ tuothe twa irĩma, rungu rwa mĩtĩ yothe ĩrĩa mĩruru, na rungu rwa honge cia mĩtĩ mĩnene kũrĩa maarutagĩra magongona maranunga wega* nĩguo makenie mĩhianano ĩyo yao yothe ĩrĩ magigi.+ 14 Nĩ ngaatambũrũkia guoko gwakwa ndĩmokĩrĩre na ndũme bũrũri ũcio ũtuĩke kũndũ gũtiganĩrie, na kũrĩa guothe matũũraga gũgaakorũo gũtiganĩirio gũkĩra werũ ũrĩa ũkuhĩrĩirie Dibila. Na nĩ makaamenya atĩ niĩ nĩ niĩ Jehova.’”