Ezekieli

26 Na rĩrĩ, mwaka-inĩ wa 11, mũthenya wa mbere wa mweri, kiugo kĩa Jehova nĩ kĩanginyĩire ngĩrũo atĩrĩ: 2 “Mũrũ wa mũndũ, itũũra rĩa Turo riugĩte ũũ igũrũ rĩgiĩ Jerusalemu,+ ‘Aha! Kĩhingo gĩa gũtonyerũo nĩ ikundi cia andũ nĩ kiunange!+ Indo ciothe irĩũkaga kũrĩ niĩ, na rĩu nĩ ngũtonga tondũ itũũra rĩu nĩ rĩanange’; 3 nĩ ũndũ ũcio, Jehova Mwathani Ũrĩa Mũnene oigĩte ũũ: ‘Nĩ ngũgũũkĩrĩra, wee Turo, na nĩ ngaarehe ndũrĩrĩ nyingĩ igũũkĩrĩre, o ta ũrĩa iria rĩikagia makũmbĩ ma rĩo na igũrũ. 4 Nĩ ikaananga thingo cia Turo na imomore nyũmba ciayo iria ndaya na igũrũ,+ na nĩ ngaakũrũra tĩri ndũme kũhaane ta rwaro rwa ihiga itheri rĩrahenia. 5 Gũgaatuĩka kũndũ gwa kwanĩkagwo neti cia gũtega gatagatĩ-inĩ ka iria.’+

“‘Nĩ gũkorũo niĩ mwene nĩ njarĩtie,’ ũguo nĩguo Jehova Mwathani Ũrĩa Mũnene oigĩte, ‘na gũgaatuĩka kũndũ gwa gũtahwo nĩ ndũrĩrĩ. 6 Namo matũũra makuo marĩa marĩ* mĩgũnda-inĩ nĩ makaaniinwo na rũhiũ rwa njora, na andũ nĩ makaamenya atĩ niĩ nĩ niĩ Jehova.’

7 “Nĩ gũkorũo Jehova Mwathani Ũrĩa Mũnene oigĩte atĩrĩ: ‘Nĩ ngaatũma Mũthamaki Nebukadineza* wa Babuloni okĩrĩre Turo oimĩte mwena wa rũgongo;+ we nĩ mũthamaki wa athamaki,+ na arĩ na mbarathi,+ ngaari cia mbaara,+ thigari ihaicĩte mbarathi, na mbũtũ nene ya thigari.* 8 Nake nĩ akaananga matũũra maku marĩa marĩ mĩgũnda-inĩ akĩhũthĩra rũhiũ rwa njora, na nĩ agaaka rũthingo rwa gũthiũrũrũkĩria itũũra na athondeke hĩba ya kũrigicĩria o na ngo nene agũũkĩrĩre. 9 Akaamomora thingo ciaku akĩhũthĩra mũgogo wake mũtungu,* na ahũthĩre mathanwa make* kũmomora nyũmba ciaku iria ndaya na igũrũ. 10 Mbarathi ciake igaakorũo irĩ nyingĩ ũũ atĩ rũkũngũ rwacio nĩ rũgaakũhumbĩra, na mũgambo wa thigari iria ihaicĩte mbarathi, magũrũ ma ngaari, na ngaari cia mbarathi nĩ ũgaatũma thingo ciaku cienyenyeke rĩrĩa akaaingĩra ihingo-inĩ ciaku, ta arũme maratharĩkĩra itũũra rĩmomokete thingo. 11 Mahũngũ ma mbarathi ciake nĩ makaarangĩrĩria barabara ciaku;+ nĩ akooraga andũ aku na rũhiũ rwa njora, nacio itugĩ ciaku iria irĩ hinya igwe thĩ. 12 Nĩ magaataha ũtonga waku o na indo ciaku cia wonjoria,+ mamomore thingo ciaku hamwe na nyũmba ciaku iria njega; macoke maikie mahiga maku maĩ-inĩ hamwe na mbaũ o na tĩri waku.’

13 “‘Na nĩ ngaatũma inegene rĩa nyĩmbo ciaku rĩkinye mũthia, na mũgambo wa inanda ciaku cia mũgeeto ndũgaacoka kũiguĩka rĩngĩ.+ 14 Ningĩ nĩ ngaatũma ũhaane ta rwaro rwa ihiga itheri rĩrahenia, na ũtuĩke kũndũ gwa kwanĩkagwo neti cia gũtega.+ Ndũgaacoka gwakwo rĩngĩ, nĩ gũkorũo niĩ mwene, Jehova, nĩ njarĩtie,’ ũguo nĩguo Jehova Mwathani Ũrĩa Mũnene oigĩte.

15 “Jehova Mwathani Ũrĩa Mũnene arera Turo atĩrĩ: ‘Rĩrĩa mũgambo wa kũgwa gwaku ũkaaiguĩka, nao arĩa magaakorũo makĩũragwo macaye, o na kũgĩe njũragano nene thĩinĩ waku-rĩ, githĩ icigĩrĩra itigaathingitha?+ 16 Anene* othe a iria-inĩ makooima itĩ-inĩ ciao cia ũnene na marute kanjũ ciao* hamwe na nguo ciao iria ngʼemie, na nĩ makaanyitwo nĩ* kĩmako. Magaaikara thĩ tĩri-inĩ makĩinainaga na makwĩrorere magegete.+ 17 Na nĩ makaaina rwĩmbo rwa gũgũcakaĩra+ makwĩre atĩrĩ:

“Kaĩ nĩ wanangĩkĩte-ĩ,+ wee ũratũũragwo nĩ andũ moimĩte iria-inĩ, o wee itũũra rĩrĩ igweta;

Wee na aikari aku mwarĩ na ũhoti mũnene iria-inĩ,+

Mũgatũma aikari othe a thĩ manyitwo nĩ guoya!

18 Icigĩrĩra nĩ igaathingitha mũthenya ũrĩa ũkaagwa,

Icigĩrĩra cia iria-inĩ nĩ igaatangĩka rĩrĩa ũgaathira.”’+

19 “Nĩ gũkorũo Jehova Mwathani Ũrĩa Mũnene oigĩte atĩrĩ: ‘Rĩrĩa ngaakwananga ũhaane ta matũũra marĩa mataikaragwo, rĩrĩa ngaakũrehera maĩ marahũyũka na ũhumbĩrũo nĩ maĩ maingĩ,+ 20 nĩ ngaagũikũrũkia hamwe na arĩa magaaikũrũka hamwe nawe irima-inĩ* kũrĩ arĩa maakuire tene; nĩ ngaatũma ũtũũre kũndũ kũrĩ thĩ biũ, ta kũrĩa kwanangirũo tene, hamwe na arĩa maikũrũkaga irima-inĩ,+ nĩgetha ndũkanatũũrũo. Njoke ndũme bũrũri wa arĩa marĩ muoyo ũgĩe riri.*

21 “‘Nĩ ngaatũma ũnyitwo nĩ guoya o rĩmwe, na ndũgaakorũo ho rĩngĩ.+ Magaagũcaria, no ndũgaacoka kuoneka rĩngĩ,’ ũguo nĩguo Jehova Mwathani Ũrĩa Mũnene oigĩte.”