Ezekieli

44 Ningĩ akĩnjokia kũgerera njĩra ya kĩhingo kĩa mwena wa nja kĩa handũ harĩa hatheru kĩrĩa kĩarorete irathĩro,+ na kĩarĩ kĩhinge.+ 2 Nake Jehova akĩnjĩra atĩrĩ: “Kĩhingo gĩkĩ kĩrĩikaraga kĩrĩ kĩhinge. Gĩtiagĩrĩire kũhingũrũo, na gũtirĩ mũndũ ũrĩtonyagĩra ho; nĩ gũkorũo Jehova, Ngai wa Isiraeli, nĩ atonyeire ho,+ kwoguo no mũhaka gĩikarage kĩrĩ kĩhinge. 3 No rĩrĩ, mũtongoria nĩ arĩikaraga thĩ thĩinĩ wakĩo nĩguo arĩe mũgate arĩ mbere ya Jehova,+ nĩ gũkorũo we nĩ mũtongoria. Arĩtonyagĩra gĩthaku-inĩ gĩa kĩhingo kĩu, na akoimĩra o ho.”+

4 Agĩcoka akĩndonyeria kĩhingo kĩa mwena wa rũgongo akĩndwara mwena wa mbere wa hekarũ. Na rĩrĩa ndarorire, ngĩona atĩ riri wa Jehova nĩ waiyũrĩte hekarũ ya Jehova.+ Nĩ ũndũ ũcio, ngĩĩgũithia ngĩturumithia ũthiũ thĩ.+ 5 Nake Jehova akĩnjĩra atĩrĩ: “Mũrũ wa mũndũ, rũmbũiya,* ũrore, na ũthikĩrĩrie na kinyi maũndũ mothe marĩa ngũkwĩra megiĩ maathani na mawatho ma hekarũ ya Jehova. Rũmbũiya mũno njĩra ya gũtonya hekarũ na njĩra ciothe cia kuuma handũ harĩa hatheru.+ 6 Ĩra nyũmba ĩyo nemi ya Isiraeli atĩrĩ, ‘Jehova Mwathani Ũrĩa Mũnene oigĩte ũũ: “Inyuĩ nyũmba ya Isiraeli, maũndũ macio manyu marĩ magigi nĩ maiganĩte. 7 Rĩrĩa mwarehe andũ a kũngĩ arĩa matarĩ aruu ngoro na mwĩrĩ handũ hakwa harĩa hatheru, nĩ mathahagia hekarũ yakwa. Mũndutagĩra mũgate, maguta na thakame, na hĩndĩ ĩyo kĩrĩkanĩro gĩakwa nĩ gĩthũkie tondũ wa mĩtugo yanyu yothe ĩrĩ magigi. 8 Mũtimenyagĩrĩra indo ciakwa iria theru.+ Ithenya rĩa ũguo, mwĩhokagĩra andũ angĩ kũruta mawĩra thĩinĩ wa handũ hakwa harĩa hatheru.”’

9 “‘Jehova Mwathani Ũrĩa Mũnene oigĩte ũũ: “Gũtirĩ mũndũ wa kũngĩ ũikaraga thĩinĩ wa Isiraeli ũtarĩ mũruu ngoro na mwĩrĩ wagĩrĩirũo gũtonya handũ hakwa harĩa hatheru.”’

10 “‘No Alawii arĩa maanjehereire+ rĩrĩa Aisiraeli maandiganĩirie nĩguo marũmĩrĩre mĩhianano yao ĩrĩ magigi* nĩ makoona moimĩrĩro ma mehia mao. 11 Na nĩ magaatungataga thĩinĩ wa handũ hakwa harĩa hatheru marũgamagĩrĩre ihingo cia hekarũ+ na matungatage thĩinĩ wa hekarũ. Nĩ magaathĩnja igongona igima rĩa njino na marute magongona nĩ ũndũ wa andũ, na nĩ makaarũgama mbere ya andũ mamatungatĩre. 12 Tondũ nĩ maamatungatagĩra marĩ mbere ya mĩhianano yao ĩrĩ magigi, magĩtuĩka mũhĩnga magĩtũma nyũmba ya Isiraeli ĩhie,+ nĩkĩo gĩtũmĩte njoe guoko gwakwa na igũrũ ngehĩta atĩ nĩ ngũmokĩrĩra, na nĩ makoona moimĩrĩro ma mehia mao,’ ũguo nĩguo Jehova Mwathani Ũrĩa Mũnene oigĩte. 13 Matikanguhĩrĩria nĩguo mandungatĩre marĩ athĩnjĩri-Ngai kana makuhĩrĩrie kĩndũ o na kĩmwe harĩ indo ciakwa iria theru kana iria theru mũno, na nĩ magaaconorithio nĩ ũndũ wa maũndũ marĩ magigi marĩa meekire. 14 No nĩ ngaamatua arũgamĩrĩri a mawĩra ma hekarũ, marorage ũtungata wayo na maũndũ mothe marĩa magĩrĩire gwĩkwo thĩinĩ wayo.’+

15 “‘Nao athĩnjĩri-Ngai Alawii, acio ariũ a Zadoku,+ arĩa maaroraga mawĩra ma handũ hakwa harĩa hatheru rĩrĩa Aisiraeli maandiganĩirie,+ nĩ makaanguhĩrĩria nĩguo mandungatĩre, na nĩ makaarũgama mbere yakwa mandutĩre maguta+ na thakame,’+ ũguo nĩguo Jehova Mwathani Ũrĩa Mũnene oigĩte. 16 ‘Acio nĩo magaatonya handũ hakwa harĩa hatheru, na nĩ magaakuhĩrĩria metha yakwa nĩguo mandungatĩre,+ na nĩ makaaruta mawĩra marĩa ndĩmaheete.+

17 “‘Hĩndĩ ĩrĩa megũtonya ihingo-inĩ cia nja ĩrĩa nini, magĩrĩirũo kwĩhumba nguo cia gatani.+ Matiagĩrĩirũo kwĩhumba kĩndũ kĩa guoya wa ngʼondu rĩrĩa megũtungata ihingo-inĩ cia nja ĩrĩa nini kana kũu thĩinĩ. 18 Magĩrĩirũo kwĩyoha iremba cia gatani mũtwe, na mekĩre inyatha cia gatani cia kũhumbĩra njohero ciao.+ Matiagĩrĩirũo kwĩhumba kĩndũ kĩngĩtũma mathithine. 19 Matanoima mathiĩ nja ĩrĩa nene—nja ĩrĩa nene kũrĩa andũ marĩ—magĩrĩirũo kũruta nguo iria megũtungataga nacio+ na maciige rumu-inĩ iria nyamũre cia kũrĩĩra.*+ Macoke mehumbe nguo ingĩ, nĩguo matigatũme ũtheru ũcio ũthiĩ kũrĩ* andũ kũgerera nguo ciao. 20 Matiagĩrĩirũo kwenjwo mĩtwe yao+ kana mareke njuĩrĩ ya mĩtwe yao ĩraihe. Magĩrĩirũo kũrengerera njuĩrĩ ya mĩtwe yao. 21 Athĩnjĩri-Ngai matiagĩrĩirũo kũnyua ndibei rĩrĩa megũtonya nja ĩrĩa nini.+ 22 Matiagĩrĩirũo kũhikia mũtumia wa ndigwa, kana mũtumia ũtiganĩte na mũthuri wake;+ no rĩrĩ, no mahikie mũirĩtu gathirange wa rũciaro rwa Isiraeli kana mũtumia wa ndigwa wa mũthĩnjĩri-Ngai.’+

23 “‘Magĩrĩirũo kũruta andũ akwa ngũrani ya kĩndũ gĩtheru na kĩrĩa gĩtarĩ gĩtheru; na mamarute ngũrani ya indo iria irĩ thahu na iria itarĩ thahu.+ 24 Nĩ magĩrĩirũo gũtuanagĩra ciira;+ na matuanagĩre kũringana na matuĩro makwa ma ciira.+ Magĩrĩirũo kũrũmĩrĩra mawatho na maathani makwa megiĩ ciathĩ ciakwa ciothe+ na mamũrage thabatũ ciakwa. 25 Matiagĩrĩirũo gũkuhĩrĩria mũndũ mũkuũ, tondũ nĩ mekũgĩa thahu. O na kũrĩ ũguo, mũndũ no ethahie nĩ ũndũ wa ithe, nyina, mũrũwe, mwarĩ, mũrũ wa nyina, kana mwarĩ wa nyina ũtarĩ mũhiku.+ 26 Na thutha wa mũthĩnjĩri-Ngai gũtherio, magĩrĩirũo kũreka aniine thikũ mũgwanja. 27 Mũthenya ũrĩa egũtonya handũ harĩa hatheru, thĩinĩ wa nja ĩrĩa nini, nĩguo atungate thĩinĩ wa harĩa hatheru, nĩ agĩrĩirũo kũruta igongona rĩake rĩa mehia,’+ ũguo nĩguo Jehova Mwathani Ũrĩa Mũnene ekuuga.

28 “‘Na rĩrĩ nĩrĩo igai rĩao: Niĩ nĩ niĩ igai rĩao.+ Mũtiagĩrĩirũo kũmahe igai o na rĩrĩkũ thĩinĩ wa Isiraeli, nĩ gũkorũo niĩ nĩ niĩ igai rĩao. 29 Nĩo marĩrĩaga igongona rĩa mũtu,+ igongona rĩa mehia, na igongona rĩa mahĩtia,+ na kĩndũ o gĩothe kĩrĩa kĩamũrĩtwo thĩinĩ wa Isiraeli gĩgaatuĩka kĩao.+ 30 Maciaro mothe ma mbere marĩa mega biũ na mĩthemba yothe ya mĩhothi ĩrĩa mũrĩrutaga ĩrĩkoragwo ĩrĩ ya athĩnjĩri-Ngai.+ Na nĩ mwagĩrĩirũo kũheaga athĩnjĩri-Ngai maciaro ma mbere ma mũtu wanyu ũrĩa ũtarĩ mũkonyore.+ Ũndũ ũcio nĩ ũrĩtũmaga mĩciĩ yanyu ĩkorũo na kĩrathimo.+ 31 Athĩnjĩri-Ngai matiagĩrĩirũo kũrĩa nyoni kana nyamũ o yothe yonetwo ĩrĩ nguũ kana ĩtamburangĩtwo.’+