Ezekieli

45 “‘Hĩndĩ ĩrĩa mũkaagaya bũrũri ũtuĩke igai-rĩ,+ nĩ mũkaarutĩra Jehova gĩcigo kĩamũre thĩinĩ wa bũrũri ũcio gĩtuĩke mũhothi.+ Ũraihu wakĩo wagĩrĩire gũkorũo ũrĩ mĩkono* 25,000 na wariĩ wa mĩkono 10,000.+ Gĩcigo kĩu gĩothe* gĩgaakorũo kĩrĩ kĩamũre. 2 Thĩinĩ wakĩo nĩ gũgaakorũo na gĩcigo kĩiganaine mĩena yothe ĩna kĩrĩ na ũraihu wa mĩkono 500 na wariĩ wa mĩkono 500 kĩa handũ harĩa hatheru,+ na o mwena nĩ gĩgaakorũo na kũndũ gwa kũrĩithia kũrĩ na wariĩ wa mĩkono 50.+ 3 Thĩinĩ wa gĩcigo kĩu mũthime ũraihu wa mĩkono 25,000 na wariĩ wa mĩkono 10,000, na thĩinĩ wakĩo nĩkuo handũ harĩa hatheru hagaakorũo, kĩndũ gĩtheru mũno. 4 Gĩgaakorũo kĩrĩ gĩcigo kĩamũre thĩinĩ wa bũrũri nĩ ũndũ wa athĩnjĩri-Ngai,+ arĩa matungataga thĩinĩ wa handũ harĩa hatheru na magakuhĩrĩria Jehova nĩguo mamũtungatĩre.+ Kũu nĩkuo nyũmba ciao igaakorũo na gũgaatuĩka kũndũ gũtheru nĩ ũndũ wa hekarũ.

5 “‘Ningĩ nĩ gũgaakorũo na gĩcigo kĩrĩ na ũraihu wa mĩkono 25,000 na wariĩ wa mĩkono 10,000+ kĩa Alawii arĩa matungataga thĩinĩ wa hekarũ, na nĩ magaakorũo na rumu 20 cia kũrĩĩra*+ irĩ igai rĩao.

6 “‘Nĩ mũkaagaya gĩcigo kĩrĩ na ũraihu wa mĩkono 25,000 (kĩringaine na mũhothi ũrĩa mwamũre) na wariĩ wa mĩkono 5,000 gĩtuĩke gĩa itũũra.+ Gĩgaakorũo kĩrĩ kĩa nyũmba yothe ya Isiraeli.

7 “‘Nake mũtongoria nĩ agaakorũo na gĩcigo mĩena yerĩ ya mũhothi ũrĩa mwamũre na gĩcigo kĩrĩa kĩgaĩirũo itũũra. Gĩgaakorũo kĩriganĩtie na mũhothi ũrĩa mwamũre na gĩcigo kĩrĩa kĩgaĩirũo itũũra. Na gĩgaakorũo mwena wa ithũĩro na wa irathĩro. Ũraihu wakĩo kuuma mũhaka wa mwena wa ithũĩro nginya mũhaka wa mwena wa irathĩro ũgaakorũo ũringaine na wa gĩcigo kĩmwe kĩrĩa kĩgaĩirũo mĩhĩrĩga.+ 8 Gĩcigo kĩu nĩkĩo gĩgaatuĩka igai rĩake thĩinĩ wa Isiraeli. Atongoria akwa matigaacoka kũhinyĩrĩria andũ akwa,+ na nĩ makaagaĩra andũ a nyũmba ya Isiraeli bũrũri kũringana na mĩhĩrĩga yao.’+

9 “Jehova Mwathani Ũrĩa Mũnene oigĩte ũũ: ‘Nĩ mwakĩria njano, inyuĩ atongoria a Isiraeli!’

“‘Tiganai na maũndũ manyu ma ũhinya na ma kũhinyanĩrĩria, mwĩke maũndũ ma kĩhooto na ma ũthingu.+ Tigai gũtunya andũ akwa indo ciao,’+ ũguo nĩguo Jehova Mwathani Ũrĩa Mũnene oigĩte. 10 ‘Mwagĩrĩirũo kũhũthĩra ratiri itarĩ na mahĩtia, gĩthimi kĩrĩa kĩagĩrĩire kĩa eba* na gĩthimi kĩrĩa kĩagĩrĩire kĩa mbathi.*+ 11 Kwagĩrĩire gũkorũo na gĩthimi kĩrĩa gĩtuĩtwo kĩa eba na kĩa mbathi. Gĩthimi kĩa mbathi kĩagĩrĩire kũiganĩra gĩcunjĩ kĩmwe harĩ ikũmi kĩa homeri,* nakĩo gĩthimi kĩa eba kĩagĩrĩire kũiganĩra gĩcunjĩ kĩmwe harĩ ikũmi kĩa homeri. Homeri nĩyo ĩrĩhũthagĩrũo gũthima. 12 Cekeri*+ ĩmwe yagĩrĩire gũkorũo ĩrĩ gera* 20. Nacio cekeri 20 ituranĩirũo na cekeri 25 na igaturanĩrũo na cekeri 15 irĩkoragwo irĩ mane* ĩmwe harĩ inyuĩ.’

13 “‘Ũyũ nĩguo mũhothi ũrĩa mwagĩrĩirũo kũruta: gĩcunjĩ kĩmwe harĩ ithathatũ kĩa eba kuuma harĩ o homeri ya ngano na gĩcunjĩ kĩmwe harĩ ithathatũ kĩa eba kuuma harĩ o homeri ya cairi. 14 Gĩcunjĩ kĩrĩa gĩtuĩtwo kĩa maguta kĩrĩthimagwo na gĩthimi kĩa mbathi. Mbathi nĩ gĩcunjĩ kĩmwe harĩ ikũmi gĩa kori,* nacio mbathi ikũmi nĩ homeri ĩmwe, nĩ gũkorũo mbathi ikũmi nĩ ciganaine na homeri ĩmwe. 15 Na kuuma harĩ rũũru rwa mahiũ ma Isiraeli, kũrĩrutagwo ngʼondu ĩmwe harĩ ngʼondu 200. Icio nĩcio irĩkoragwo irĩ cia igongona rĩa mũtu,+ igongona igima rĩa njino,+ na magongona ma ũiguano,+ nĩ ũndũ wa kũhumbĩra mehia ma andũ,’+ ũguo nĩguo Jehova Mwathani Ũrĩa Mũnene oigĩte.

16 “‘Andũ othe thĩinĩ wa bũrũri nĩ marĩrutaga mũhothi ũcio+ makanengera mũtongoria thĩinĩ wa Isiraeli. 17 No mũtongoria ũcio nĩwe ũrĩrutaga magongona magima ma njino,+ igongona rĩa mũtu,+ na igongona rĩa ndibei hĩndĩ ya ciathĩ,+ tũrũgamo twa mweri, na Thabatũ,+ hamwe na ciathĩ ciothe iria ituĩtwo cia nyũmba ya Isiraeli.+ Nĩwe ũrĩrutaga igongona rĩa mehia, igongona rĩa mũtu, igongona igima rĩa njino, na magongona ma ũiguano, nĩ ũndũ wa kũhumbĩra mehia ma nyũmba ya Isiraeli.’

18 “Jehova Mwathani Ũrĩa Mũnene ekuuga atĩrĩ: ‘Mweri-inĩ wa mbere, mũthenya wa mbere wa mweri ũcio, nĩ mũrĩoyaga gategwa gatarĩ na kaũgũ, na mũgatheria handũ harĩa hatheru kuumana na mehia.+ 19 Mũthĩnjĩri-Ngai arĩoyaga thakame ĩmwe ya igongona rĩa mehia akahaka gĩtugĩ-inĩ kĩa mũrango wa hekarũ,+ kona-inĩ inya cia gĩcunjĩ kĩrĩa gĩthiũrũrũkĩirie gĩa kĩgongona, na gĩtugĩ-inĩ gĩa kĩhingo kĩa nja ĩrĩa nini. 20 Ũguo nĩguo mũrĩĩkaga mũthenya wa mũgwanja wa mweri ũcio nĩ ũndũ wa mũndũ ũngĩkorũo ehĩtie atekwenda kana atekũmenya;+ na nĩ mũrĩrutaga igongona rĩa kũhumbĩra mehia nĩ ũndũ wa hekarũ.+

21 “‘Mweri-inĩ wa mbere, mũthenya wa 14 wa mweri ũcio, nĩ mũrĩkũngũyagĩra gĩathĩ kĩa Pasaka.+ Mũrĩrĩaga mĩgate ĩtarĩ mĩkĩre ndawa ya kũimbia ihinda rĩa thikũ mũgwanja.+ 22 Mũthenya ũcio mũtongoria nĩ arĩrutaga gategwa gatuĩke igongona rĩa mehia nĩ ũndũ wake na tondũ wa andũ othe thĩinĩ wa bũrũri.+ 23 O mũthenya harĩ thikũ icio mũgwanja cia gĩathĩ nĩ arĩrutaga tũtegwa mũgwanja tũtarĩ na kaũgũ hamwe na ndũrũme mũgwanja itarĩ na kaũgũ ituĩke igongona igima rĩa njino rĩa kũrutĩrũo Jehova,+ o na akaruta thenge ĩmwe o mũthenya ĩtuĩke igongona rĩa mehia. 24 Ningĩ nĩ arĩrutaga igongona rĩa mũtu rĩa eba ĩmwe harĩ o gategwa na eba ĩmwe harĩ o ndũrũme, hamwe na hini* ĩmwe ya maguta harĩ eba.

25 “‘Mweri-inĩ wa mũgwanja, mũthenya wa 15 wa mweri ũcio, ihinda-inĩ rĩa thikũ mũgwanja cia gĩathĩ,+ arĩrutaga indo o ta icio cia igongona rĩa mehia, igongona igima rĩa njino, igongona rĩa mũtu, na maguta.’”