Kũrĩ Aroma
10 Atĩrĩrĩ ariũ a Ithe witũ, ha ũhoro wao-rĩ, wendi wakwa wa kuuma ngoro na mathaithana makwa kũrĩ Ngai nĩ atĩ makaahonokio.+ 2 Tondũ niĩ ndĩ mũira atĩ nĩ makoragwo na kĩyo ũhoro-inĩ wĩgiĩ Ngai,+ no ti kũringana na ũmenyo wa ma. 3 Tondũ wa kwaga kũmenya ũthingu wa Ngai+ na makerutanĩria kwĩhandĩra ũthingu wao ene,+ matienyihĩirie ũthingu wa Ngai.+ 4 Nĩ gũkorũo Kristo nĩwe mũthia wa Watho,+ nĩguo mũndũ o wothe wonanagia wĩtĩkio akorũo na ũthingu.+
5 Tondũ Musa aandĩkire ũũ igũrũ rĩgiĩ ũthingu ũrĩa uumanaga na Watho: “Mũndũ ũrĩa wĩkaga maũndũ macio nĩ agaatũũra nĩ ũndũ wamo.”+ 6 No ũthingu ũrĩa uumanaga na wĩtĩkio uugaga ũũ: “Ndũkoige na ngoro atĩrĩ,+ ‘Nũũ ũkwambata igũrũ?’+ ũguo nĩ kuuga, agaikũrũkie Kristo, 7 kana, ‘Nũũ ũgũikũrũka thĩinĩ wa irima rĩrĩa rĩtarĩ gĩturi?’*+ ũguo nĩ kuuga, agacokie Kristo kuuma kũrĩ arĩa akuũ.” 8 No rĩandĩko riugaga atĩa? “Kiugo kĩrĩ hakuhĩ nawe, o kanua-inĩ gaku na ngoro-inĩ yaku”;+ ũguo nĩ kuuga “kiugo” kĩa wĩtĩkio, kĩrĩa ithuĩ tũrahunjia. 9 Nĩ gũkorũo ũngiumbũra na kanua gaku mbere ya andũ atĩ Jesu nĩ Mwathani,+ na wonanagie wĩtĩkio ngoro-inĩ yaku atĩ Ngai nĩ aamũriũkirie kuuma kũrĩ arĩa akuũ-rĩ, nĩ ũkaahonokio. 10 Tondũ mũndũ onanagia wĩtĩkio ngoro-inĩ nĩguo atuĩke mũthingu, no mũndũ oimbũraga na kanua mbere ya andũ+ nĩguo ahonokio.
11 Nĩ gũkorũo rĩandĩko riugaga atĩrĩ: “Gũtirĩ mũndũ ũigaga wĩtĩkio wake harĩ we ũgaaconorithio.”+ 12 Tondũ gũtirĩ ngũrani ya Mũyahudi na Mũngiriki.+ Mwathani wa andũ othe no ũmwe, na nĩ arathimaga mũno* arĩa othe mamũkayagĩra. 13 Nĩ gũkorũo “mũndũ o wothe ũkayagĩra rĩĩtwa rĩa Jehova* nĩ akaahonokio.”+ 14 O na kũrĩ ũguo-rĩ, mangĩmũkaĩra atĩa matagĩĩte na wĩtĩkio harĩ we? Na rĩrĩ, mangĩgĩa atĩa na wĩtĩkio harĩ we mataiguĩte ũhoro wake? Ningĩ-rĩ, mangĩigua atĩa hatarĩ na mũndũ wa kũmahunjĩria? 15 Na mangĩhunjia atĩa matatũmĩtwo?+ O ta ũrĩa kwandĩkĩtwo atĩrĩ: “Kaĩ magũrũ ma arĩa mahunjagia ũhoro mwega wa maũndũ mega nĩ mathaka-ĩ!”+
16 No rĩrĩ, ti othe maathĩkĩire ũhoro ũrĩa mwega. Nĩ gũkorũo Isaia oigĩte atĩrĩ: “Jehova,* nũũ ũgĩĩte na wĩtĩkio harĩ ũndũ ũrĩa ũiguĩtwo kuuma kũrĩ ithuĩ?”*+ 17 Nĩ ũndũ ũcio-rĩ, wĩtĩkio uumanaga na ũndũ ũrĩa ũiguĩtwo.+ Naguo ũndũ ũrĩa ũiguĩtwo uumanaga na kiugo kĩgiĩ Kristo. 18 No ngũũria atĩrĩ, Hihi ũguo nĩ kuuga atĩ matiaiguire? Nĩ maaiguire, nĩ gũkorũo “mũgambo wao nĩ wakinyire thĩinĩ wa thĩ yothe, na ndũmĩrĩri yao ĩgĩkinya ituri-inĩ cia thĩ ĩrĩa ĩikaragwo.”+ 19 No ngũũria atĩrĩ, Hihi ũguo nĩ kuuga Isiraeli matiamenyire?+ Musa oigĩte atĩrĩ o mbere: “Ngũtũma mũigue ũiru kũgerera andũ a rũrĩrĩ rũngĩ; ngũtũma mũgĩe na marakara manene kũgerera rũrĩrĩ rũkĩgu.”+ 20 Nake Isaia akoiga ũũ arĩ na ũcamba: “Ndonirũo nĩ arĩa mataanjaragia;+ ndamenyekire nĩ arĩa mataanjũragĩrĩria.”+ 21 No akoiga atĩrĩ ũhoro-inĩ wĩgiĩ Isiraeli: “Ndindaga ndambũrũkĩtie moko makwa mũthenya wothe harĩ andũ matarĩ athĩki na momĩtie ngoro.”+