Ruthu
4 Nake Boazu akĩambata kĩhingo-inĩ gĩa itũũra+ na agĩikara thĩ hau. Na rĩrĩ, mũkũũri* ũrĩa Boazu aagwetete+ akĩhĩtũkĩra hau. Hĩndĩ ĩyo Boazu akĩmwĩra ũũ: “Ũka haha Ngʼania-wa-ngʼania na ũikare thĩ.” Nake agĩthiĩ na agĩikara thĩ. 2 Boazu agĩcoka agĩta athuri ikũmi a itũũra+ akĩmeera ũũ: “Ikarai thĩ haha.” Nao magĩikara thĩ.
3 Boazu akĩra mũkũũri+ ũcio atĩrĩ: “Naomi ũrĩa wacokire kuuma bũrũri wa Moabi+ nĩ ekwendia mũgũnda ũrĩa warĩ wa Elimeleku+ wa mbarĩ citũ. 4 Kwoguo ndĩrona ngũmenyithie ũndũ ũcio ngwĩre atĩrĩ, ‘Ũũgũre ũrĩ mbere ya aikari a gũkũ na athuri* a andũ aitũ.+ Angĩkorũo nĩ ũkũũkũũra, ũũkũũre. No angĩkorũo ndũkũũkũũra, njĩĩra nĩgetha menye, tondũ wee nĩwe ũrĩ na kĩhooto gĩa kũũkũũra, na niĩ nĩ niĩ wa kerĩ kuuma harĩ wee.’” Nake agĩcokia ũũ: “Nĩ ngũũkũũra.”+ 5 Boazu agĩkiuga atĩrĩ: “Mũthenya ũrĩa ũkaagũra mũgũnda ũcio kuuma harĩ Naomi-rĩ, ningĩ no mũhaka ũkaaũgũra kuuma harĩ Ruthu ũrĩa Mũmoabi, mũtumia wa mũndũ ũcio mũkuũ, nĩgetha rĩĩtwa rĩa ũcio mũkuũ rĩcokio harĩ igai rĩake.”+ 6 Nĩ ũndũ ũcio, mũkũũri ũcio akiuga ũũ: “Niĩ ndikũhota kũũkũũra, tondũ ndahota gũthũkia igai rĩakwa niĩ mwene. Wee ũkũũre arĩ we na kĩhooto gĩakwa gĩa kũũkũũra, tondũ ndingĩhota kũũkũũra.”
7 Na rĩrĩ, ũyũ nĩguo mũtugo ũrĩa warũmagĩrĩrũo thĩinĩ wa Isiraeli gwĩkĩra ũhoro mũkonde maũndũ-inĩ megiĩ kĩhooto gĩa gũkũũra na gũkũũrania indo: Mũndũ no mũhaka angĩarutire kĩratũ+ na akĩnengere mũndũ ũcio ũngĩ, na ũguo nĩguo andũ thĩinĩ wa Isiraeli meekĩraga mũkonde ũndũ ũrĩa maiguithanĩria.* 8 Nĩ ũndũ ũcio, rĩrĩa mũkũũri ũcio eerire Boazu, “Ũgũre arĩ we,” akĩruta kĩratũ gĩake. 9 Nake Boazu akĩra athuri acio o na andũ othe atĩrĩ: “Inyuĩ mũrĩ aira+ ũmũthĩ atĩ nĩ ndĩragũra kuuma kũrĩ Naomi indo ciothe iria ciarĩ cia Elimeleku na iria ciothe ciarĩ cia Kilioni na Mahaloni. 10 Ningĩ nĩ nguoya Ruthu ũcio Mũmoabi, mũtumia wa Mahaloni, atuĩke mũtumia wakwa nĩguo njokie rĩĩtwa rĩa mũndũ ũcio mũkuũ harĩ igai rĩake,+ nĩgetha rĩĩtwa rĩa ũcio mũkuũ rĩtikaneherio harĩ ariũ a ithe na kuuma harĩ kĩhingo gĩa itũũra rĩa kwao mũciĩ. Inyuĩ mũrĩ aira ũmũthĩ.”+
11 Hĩndĩ ĩyo andũ othe arĩa maarĩ kĩhingo-inĩ gĩa itũũra o na athuri makiuga ũũ: “Ithuĩ tũrĩ aira! Jehova arotũma mũtumia ũcio ũkũingĩra nyũmba yaku ahaane ta Rakeli na Lea, arĩa maakire nyũmba ya Isiraeli+ marĩ eerĩ. Ũrogaacĩra thĩinĩ wa Efiratha+ na wĩthondekere rĩĩtwa* rĩega thĩinĩ wa Bethilehemu.+ 12 Nyũmba yaku ĩrohaana o ta nyũmba ya Perezu,+ ũrĩa waciarirũo nĩ Tamaru na Juda, kuumana na rũciaro rũrĩa Jehova agaakũhe kũgerera mũtumia ũyũ mwĩthĩ.”+
13 Kwoguo Boazu akĩoya Ruthu na agĩtuĩka mũtumia wake. Agĩkoma nake, na Jehova akĩreka ohe nda na agĩciara kahĩĩ. 14 Nao atumia makĩra Naomi atĩrĩ: “Jehova arogoocwo, o we ũtanagũtiga ũtarĩ na mũgũkũũri ũmũthĩ. Rĩĩtwa rĩake rĩromenyithanio thĩinĩ wa Isiraeli! 15 Nĩ* acoketie* muoyo* waku na nĩ arĩgũteithagia ũkũrũ-inĩ waku, tondũ aciarĩtwo nĩ mwarĩguo, o ũcio ũkwendete+ na nĩ wa bata harĩ wee gũkĩra ariũ mũgwanja.” 16 Naomi akĩoya kaana kau na agĩkanyita gĩthũri-inĩ gĩake, na agĩkarũmbũiya.* 17 Nao atumia a itũũra rĩao magĩkahe rĩĩtwa. Makiuga atĩrĩ, “Naomi nĩ aciarĩirũo kahĩĩ,” na magĩgeta Obedi.+ Nĩwe ithe wa Jesii,+ ithe wa Daudi.
18 Na rĩrĩ, ici nĩcio njiarũa cia Perezu:+ Perezu aatuĩkire ithe wa Hezironi;+ 19 Hezironi agĩtuĩka ithe wa Ramu; Ramu agĩtuĩka ithe wa Aminadabu;+ 20 Aminadabu+ agĩtuĩka ithe wa Nahashoni; Nahashoni agĩtuĩka ithe wa Salimoni; 21 Salimoni agĩtuĩka ithe wa Boazu; Boazu agĩtuĩka ithe wa Obedi; 22 Obedi agĩtuĩka ithe wa Jesii;+ nake Jesii agĩtuĩka ithe wa Daudi.+