Athamaki wa Kerĩ

9 Na rĩrĩ, Elisha ũrĩa mũnabii agĩcoka agĩta ũmwe wa ariũ a anabii akĩmwĩra atĩrĩ: “Wĩyohe nguo ciaku njohero, na woe ndigithũ ĩno ya maguta na ihenya ũthiĩ Ramothu-gileadi.+ 2 Wakinya kuo, ũcarie Jehu+ mũrũ wa Jehoshafatu mũrũ wa Nimushi; ũtonye na ũmweherie harĩ ariũ a ithe ũmũtware rumu-inĩ ya thĩinĩ biũ. 3 Ũcoke woe ndigithũ ĩyo ya maguta ũmũitĩrĩrie mũtwe na uuge atĩrĩ, ‘Ũũ nĩguo Jehova ekuuga: “Nĩ ndagũitĩrĩria maguta ũtuĩke mũthamaki wa Isiraeli.”’+ Thutha ũcio ũhingũre mũrango na ũũre ũtekũmaĩrĩria.”

4 Nĩ ũndũ ũcio, ndungata ĩyo ya mũnabii ĩkiumagara ĩthiĩ Ramothu-gileadi. 5 Rĩrĩa yakinyire, anene a mbũtũ maaikarĩte thĩ hau. Nayo ĩkiuga atĩrĩ: “Ndĩ na ndũmĩrĩri yaku, wee mũnene ũyũ.” Nake Jehu akĩũria: “Nĩ ndũmĩrĩri ya ũ gatagatĩ-inĩ gaitũ?” Nayo ĩkiuga: “Nĩ yaku wee mũnene ũyũ.” 6 Nake Jehu agĩũkĩra agĩtonya thĩinĩ wa nyũmba; ndungata ĩyo ĩkĩmũitĩrĩria maguta mũtwe na ĩkĩmwĩra atĩrĩ, “Ũũ nĩguo Jehova Ngai wa Isiraeli ekuuga: ‘Nĩ ndagũitĩrĩria maguta ũtuĩke mũthamaki wa andũ a Jehova, mũthamaki wa Isiraeli.+ 7 No mũhaka ũniine nyũmba ya Ahabu mwathi waku, na nĩ ngũrĩhĩria thakame ya ndungata ciakwa anabii, na ya ndungata ciothe cia Jehova iria ciakuire moko-inĩ ma Jezebeli.+ 8 Na nyũmba yothe ya Ahabu nĩ ĩgũthira; na nĩ ngũniina mũndũrũme o wothe* wa nyũmba ya Ahabu, nginya arĩa matarĩ na ũteithio na matarĩ hinya thĩinĩ wa Isiraeli.+ 9 Na nĩ ngũtũma nyũmba ya Ahabu ĩhaane o ta nyũmba ya Jeroboamu+ mũrũ wa Nebati na o ta nyũmba ya Baasha+ mũrũ wa Ahija. 10 Ha ũhoro wĩgiĩ Jezebeli, ekũrĩo nĩ ngui mũgũnda-inĩ kũu Jezireeli,+ na gũtirĩ mũndũ ũkũmũthika.’” Ndungata ĩyo yarĩkia kuuga ũguo, ĩkĩhingũra mũrango na ĩkĩũra.+

11 Rĩrĩa Jehu aacokire kũrĩ ndungata cia mwathi wake, makĩmũũria atĩrĩ: “Maũndũ mothe nĩ mega? Mũgũrũki ũcio egũũkĩte kũrĩ wee gwĩka atĩa?” Nake akĩmacokeria akĩmeera: “Nĩ mũĩ ũrĩa mũndũ ta ũcio atariĩ na ũrĩa ndeto ciake itariĩ.” 12 No o makĩmwĩra atĩrĩ: “Ũcio ti ũhoro wa ma! Twĩre ma.” Nake akiuga: “Ũũ nĩguo anjĩra, acoka ongerera atĩrĩ, ‘Ũũ nĩguo Jehova ekuuga: “Nĩ ndagũitĩrĩria maguta ũtuĩke mũthamaki wa Isiraeli.”’”+ 13 Maigua ũguo, o ũmwe wao akĩoya nguo yake na akĩmĩara ngathĩ-inĩ itaarĩ kĩndũ nĩguo arũgame ho,+ ningĩ makĩhuuha coro makiuga atĩrĩ: “Jehu nĩ atuĩka mũthamaki!”+ 14 Nake Jehu+ mũrũ wa Jehoshafatu mũrũ wa Nimushi akĩbanga njama ya gũũkĩrĩra Jehoramu.

Jehoramu nĩ aathiĩte Ramothu-gileadi kũrangĩra,+ we hamwe na Isiraeli yothe, tondũ wa Hazaeli+ mũthamaki wa Siria. 15 Thutha ũcio Mũthamaki Jehoramu agĩcoka Jezireeli+ nĩguo akahonie nguraro iria aagurarĩtio nĩ Asiria rĩrĩa aarũire na Mũthamaki Hazaeli wa Siria.+

Nake Jehu akiuga atĩrĩ: “Angĩkorũo nĩ mũretĩkania na niĩ, mũtikareke mũndũ o na ũrĩkũ ethare kuuma itũũra-inĩ athiĩ akaheane ũhoro ũcio Jezireeli.” 16 Jehu agĩcoka akĩhaica ngaari yake ya mbarathi na agĩthiĩ Jezireeli, nĩ gũkorũo Jehoramu aakomete kũu arĩ na nguraro, na Mũthamaki Ahazia wa Juda nĩ aaikũrũkĩte agathiĩ kuona Jehoramu. 17 Hĩndĩ ĩrĩa mũrangĩri aarũgamĩte igũrũ rĩa nyũmba ndaya na igũrũ kũu Jezireeli, akĩona kĩrĩndĩ kĩa arũme a Jehu gĩgĩũka. O rĩmwe akiuga: “Ndĩrona kĩrĩndĩ kĩa arũme.” Jehoramu akiuga: “Oya mũtwarithia ũmwe wa mbarathi ũmũtũme agacemanie nao, amorie atĩrĩ, ‘Hihi mũroka na thayũ?’” 18 Nĩ ũndũ ũcio, mũtwarithia ũmwe wa mbarathi agĩthiĩ gũcemania nake na akiuga atĩrĩ: “Mũthamaki aroria atĩrĩ, ‘Hihi mũroka na thayũ?’” No Jehu akĩmwĩra: “Ũrĩ na ũhoro ũrĩkũ na ‘thayũ’? Thiĩ thutha wakwa!”

Mũrangĩri ũcio agĩcoka akĩheana ũhoro akiuga: “Mũtũmwo nĩ akinyire harĩ o, no ndanacoka.” 19 Nĩ ũndũ ũcio, agĩtũma mũtwarithia wa mbarathi wa kerĩ na akinya harĩ o akĩmeera atĩrĩ: “Mũthamaki aroria atĩrĩ, ‘Hihi mũroka na thayũ?’” No Jehu akĩmwĩra: “Ũrĩ na ũhoro ũrĩkũ na ‘thayũ’? Thiĩ thutha wakwa!”

20 Mũrangĩri ũcio agĩcoka akĩheana ũhoro akiuga: “Nĩ akinyire harĩ o, no ndanacoka, na mũtwarithĩrie wa ngaari nĩ ta wa Jehu mũcũkũrũ* wa Nimushi, nĩ gũkorũo atwarithagia ta mũgũrũki.” 21 Nake Jehoramu akiuga: “Haarĩriai ngaari!” Nĩ ũndũ ũcio ngaari yake ya mbaara ĩkĩhaarĩrio na Mũthamaki Jehoramu wa Isiraeli na Mũthamaki Ahazia+ wa Juda magĩthiĩ gũcemania na Jehu, o mũndũ arĩ ngaari-inĩ yake ya mbaara. Magĩcemania nake mũgũnda-inĩ wa Nabothu+ ũrĩa Mũjezireeli.

22 Rĩrĩa Jehoramu oonire Jehu, akiuga: “Hihi ũroka na thayũ Jehu?” No we akĩmũũria atĩrĩ: “Kũngĩkorũo na thayũ ũrĩkũ kũrĩ na ũmaraya wa maitũguo Jezebeli+ na ũrogi wake mũingĩ?”+ 23 O hĩndĩ ĩyo Jehoramu akĩgarũra ngaari yake ya mbarathi nĩguo ore, na akĩra Ahazia atĩrĩ: “Nĩ twaheenererio Ahazia!” 24 Jehu akĩnyita ũta wake na guoko na akĩratha Jehoramu gatagatĩ ga ciande ciake, naguo mũguĩ ũkiumĩrĩra ngoro-inĩ yake, na akĩgwa ngaari-inĩ yake ya mbaara. 25 Jehu agĩcoka akĩra Bidikari mũnene ũrĩa wamũteithagia atĩrĩ: “Muoe ũmũikie mũgũnda-inĩ wa Nabothu ũrĩa Mũjezireeli.+ Ririkana atĩ niĩ nawe twatwarithagia ngaari hamwe tũrĩ thutha wa ithe Ahabu rĩrĩa Jehova we mwene aamenyithanirie ũndũ ũyũ kũmwerekera:+ 26 ‘“Hatarĩ nganja, o ta ũrĩa ndĩronire thakame ya Nabothu+ na thakame ya ariũ ake ira,” ũguo nĩguo Jehova ekuuga, “Nĩ ngerĩhĩria+ harĩ wee mũgũnda-inĩ o ũyũ,” ũguo nĩguo Jehova ekuuga.’ Nĩ ũndũ ũcio, muoe ũmũikie mũgũnda-inĩ ũcio kũringana na kiugo kĩa Jehova.”+

27 Rĩrĩa Mũthamaki Ahazia+ wa Juda oonire ũrĩa gwekĩkaga, akĩũra agereire njĩra ya nyũmba ya mũgũnda-inĩ. (Thutha ũcio Jehu akĩmũrũmĩrĩra na akiuga atĩrĩ: “Mũũragei o nake!” Nĩ ũndũ ũcio makĩmũguraria arĩ ngaari-inĩ yake ya mbarathi rĩrĩa aambataga erekeire Guri, ĩrĩa ĩrĩ Ibileamu.+ No we agĩthiĩ na mbere kũũra agĩkinya Megido na agĩkuĩra kuo. 28 Nacio ndungata ciake ikĩmũkuua na ngaari ya mbarathi ikĩmũtwara Jerusalemu, ikĩmũthika mbĩrĩra-inĩ yake hamwe na maithe make ma tene thĩinĩ wa Itũũra rĩa Daudi.+ 29 Ahazia+ aatuĩkĩte mũthamaki wa Juda mwaka-inĩ wa 11 wa Jehoramu mũrũ wa Ahabu.)

30 Rĩrĩa Jehu aathiire Jezireeli,+ Jezebeli+ nĩ aaiguire ũhoro ũcio. Kwoguo akĩĩhaka rangi mũirũ* maitho na akĩĩgemia njuĩrĩ na akĩrora thĩ arĩ ndirica-inĩ. 31 Rĩrĩa Jehu aaingĩraga kĩhingo-inĩ, Jezebeli akĩmũũria atĩrĩ: “Hihi maũndũ nĩ maathiire wega harĩ Zimuri, ũrĩa woragire mwathi wake?”+ 32 Jehu akĩrora igũrũ ndirica-inĩ akiuga atĩrĩ: “Nũũ ũrĩ mwena wakwa? Nũũ?”+ O hĩndĩ ĩyo, anene erĩ kana atatũ a kwa mũthamaki makĩrora thĩ harĩ we. 33 Nake akiuga atĩrĩ: “Mũikiei thĩ!” Kwoguo makĩmũikia thĩ, na thakame ĩmwe yake ĩkĩminjũkĩra rũthingo na mbarathi, nake akĩmũrangĩrĩria thĩ. 34 Agĩcoka akĩingĩra thĩinĩ, akĩrĩa na akĩnyua. Agĩcoka akiuga ũũ: “Menyai ũhoro wa mũtumia ũyũ mũrume na mũmũthike. Tondũ o na kũrĩ o ũguo, nĩ mwarĩ wa mũthamaki.”+ 35 Rĩrĩa maathiire kũmũthika, matiakorire kĩndũ tiga o ihĩndĩ rĩa mũtwe wake na magũrũ make na hĩ cia moko make.+ 36 Rĩrĩa maacokire na makĩmũhe ũhoro ũcio, akiuga: “Ũndũ ũcio nĩ wahingia kiugo kĩa Jehova+ kĩrĩa aaririe kũgerera harĩ ndungata yake Elija ũrĩa Mũtishibi, akiuga atĩrĩ, ‘Ngui nĩ ikaarĩa nyama cia mwĩrĩ wa Jezebeli mũgũnda-inĩ ũrĩa ũrĩ Jezireeli.+ 37 Nakĩo kĩimba kĩa Jezebeli gĩgaatuĩka ta thumu igũrũ rĩa mũgũnda ũcio ũrĩ Jezireeli, nĩguo matikanoige atĩrĩ: “Ũyũ nĩ Jezebeli.”’”