Ezekieli

32 Na rĩrĩ, mwaka-inĩ wa 12, mweri wa 12, mũthenya wa mbere wa mweri ũcio, kiugo kĩa Jehova nĩ kĩanginyĩire o rĩngĩ ngĩrũo atĩrĩ: 2 “Mũrũ wa mũndũ, ina rwĩmbo rwa gũcakaĩra Firauni mũthamaki wa Misiri, ũmwĩre atĩrĩ,

‘Watariĩ ta mũrũthi mwĩthĩ ũrĩ na hinya* gatagatĩ-inĩ ka ndũrĩrĩ,

No rĩu nĩ ũkirĩtio.

Watariĩ ta nyamũ nene ya iria-inĩ+ ũkĩhũũra maĩ njũũĩ-inĩ ciaku,

Ũkiunjuga maĩ na magũrũ maku na ũgĩtũma njũũĩ igĩe gĩko.’

 3 Jehova Mwathani Ũrĩa Mũnene ekuuga atĩrĩ:

‘Ngaahũthĩra andũ a ndũrĩrĩ nyingĩ gũgũikĩria neti yakwa,

Nao nĩ magaakũgucia ũrĩ thĩinĩ wa neti yakwa ya gũtega.

 4 Ngaagũtiganĩria igũrũ rĩa thĩ nyũmũ;

Ngũikie werũ-inĩ.

Nĩ ngaatũma nyoni ciothe cia rĩera-inĩ ciũmbe igũrũ rĩaku,

Na ngũneane kũrĩ nyamũ cia gĩthaka cia thĩ yothe nĩguo ihũne.+

 5 Ngaaikia nyama ciaku irĩma-inĩ

Na njiyũrie mĩkuru na matigari maku.+

 6 Nĩ ngaaiyũria bũrũri thakame yaku ĩrĩa ĩgaatherera ĩkinye irĩma-inĩ,

Nayo nĩ ĩkaaiyũra tũrũũĩ-inĩ.’

 7 ‘Na rĩrĩa ũgaakorũo ũniinĩtwo, nĩ ngaahumbĩra igũrũ na njĩkĩre njata nduma.

Riũa ngaarĩhumbĩra na matu,

Naguo mweri ndũkaaruta ũtheri waguo.+

 8 Nĩ ngaatũma imũrĩ ciothe cia igũrũ iria irutaga ũtheri igĩe nduma nĩ ũndũ waku,

Na humbĩre bũrũri waku na nduma,’ ũguo nĩguo Jehova Mwathani Ũrĩa Mũnene oigĩte.

 9 ‘Nĩ ngaatũma ngoro cia ikundi nyingĩ cia andũ ithĩnĩke rĩrĩa ngaatwara andũ amwe anyu ndũrĩrĩ-inĩ ingĩ marĩ mĩgwate,

Ndĩmatware mabũrũri-inĩ marĩa mũtoĩ.+

10 Nĩ ngaatũma ikundi nyingĩ cia andũ ihahũke,

Na athamaki ao mainaine marĩ na guoya nĩ ũndũ waku rĩrĩa ngaahiũria rũhiũ rwakwa rwa njora mbere yao.

Matigaatiga kũinaina, o mũndũ nĩ ũndũ wa muoyo wake,

Mũthenya ũrĩa ũkaagwa.’

11 Nĩ gũkorũo Jehova Mwathani Ũrĩa Mũnene oigĩte ũũ:

‘Rũhiũ rwa njora rwa mũthamaki wa Babuloni nĩ rũgaagũũkĩrĩra.+

12 Nĩ ngaatũma irĩndĩ ciaku cianangwo nĩ hiũ cia njora cia njamba cia ita irĩ hinya,

Ndũrĩrĩ iria itarĩ tha o na hanini, ciothe.+

Nĩ ikaahehenja kĩrĩa gĩtũmaga Misiri ĩkorũo na mwĩtĩo, na irĩndĩ ciayo ciothe nĩ ikaaniinwo.+

13 Nĩ ngaaniina mahiũ mao mothe hakuhĩ na maĩ mao maingĩ,+

Na gũtirĩ kũgũrũ kwa mũndũ kana ihũngũ rĩa nyamũ rĩkaaunjuga maĩ macio rĩngĩ.’+

14 ‘Hĩndĩ ĩyo nĩ ngaatheria maĩ macio mao,

Na ndũme njũũĩ ciao itherere ta maguta,’ ũguo nĩguo Jehova Mwathani Ũrĩa Mũnene ekuuga.

15 ‘Rĩrĩa ngaatũma bũrũri wa Misiri ũtuĩke kũndũ gũtiganĩrie na kwanangĩku, ũkorũo weheretio kĩrĩa gĩothe kĩiyũire kuo,+

Hĩndĩ ĩrĩa ngaaniina aikari a kuo othe,

Nĩrĩo makaamenya atĩ niĩ nĩ niĩ Jehova.+

16 Rũu nĩ rwĩmbo rwa macakaya, na no mũhaka andũ makaarũina;

Airĩtu a ndũrĩrĩ nĩ makaarũina.

Makaarũinĩra Misiri na irĩndĩ ciayo ciothe,’ ũguo nĩguo Jehova Mwathani Ũrĩa Mũnene oigĩte.”

17 Na rĩrĩ, mwaka-inĩ wa 12, mũthenya wa 15 wa mweri, kiugo kĩa Jehova nĩ kĩanginyĩire ngĩrũo atĩrĩ: 18 “Mũrũ wa mũndũ, cakaĩra irĩndĩ cia Misiri na ũmĩharũrũkie rungu rwa thĩ ĩrĩ hamwe na airĩtu a ndũrĩrĩ iria irĩ hinya, hamwe na arĩa maikũrũkaga irima-inĩ.*

19 “‘Wee-rĩ, ũkĩrĩte ũ harĩ ũthaka? Harũrũka ũgakome hamwe na arĩa matarĩ aruu!’

20 “‘Makaagwa hamwe na arĩa moragĩtwo na rũhiũ rwa njora.+ Nĩ aneanĩtwo oragwo na rũhiũ rwa njora; mũkururie ũmweherie hamwe na irĩndĩ ciake ciothe.

21 “‘Kuuma o kũu kũriku thĩinĩ wa Mbĩrĩra,* njamba iria irĩ hinya mũno cia ita nĩ ikaamwarĩria hamwe na arĩa mamũteithagĩrĩria. Hatarĩ nganja nĩ makaaharũrũka na makome o ta andũ matarĩ aruu, arĩa moragĩtwo na rũhiũ rwa njora. 22 Ashuri na kĩrĩndĩ gĩake gĩothe marĩ kũu. Athiũrũrũkĩirio nĩ mbĩrĩra ciao, na othe moragĩtwo na rũhiũ rwa njora.+ 23 Mbĩrĩra ciake irĩ irima-inĩ* kũrĩa kũriku, na kĩrĩndĩ gĩake gĩthiũrũrũkĩirie mbĩrĩra yake, othe moragĩtwo na rũhiũ rwa njora tondũ nĩ maatũmire kũgĩe na guoya bũrũri-inĩ wa arĩa marĩ muoyo.

24 “‘Elamu+ arĩ kũu hamwe na irĩndĩ ciake ciothe mathiũrũrũkĩirie mbĩrĩra yake, othe moragĩtwo na rũhiũ rwa njora. Maharũrũkĩte kũndũ kũrĩa kũriku matarĩ aruu, o acio maatũmire kũgĩe na guoya bũrũri-inĩ wa arĩa marĩ muoyo. Rĩu megũconorithio hamwe na arĩa maikũrũkaga irima-inĩ.* 25 Mamũthondekeire ũrĩrĩ gatagatĩ-inĩ ka arĩa moragĩtwo, hamwe na irĩndĩ ciake ciothe ithiũrũrũkĩirie mbĩrĩra ciake. Acio othe ti aruu, moragĩtwo na rũhiũ rwa njora, tondũ nĩ maatũmire kũgĩe na guoya bũrũri-inĩ wa arĩa marĩ muoyo; na megũconorithio hamwe na arĩa maikũrũkaga irima-inĩ.* Aigĩtwo gatagatĩ-inĩ ka arĩa moragĩtwo.

26 Kũu nĩkuo Mesheki na Tubali+ hamwe na irĩndĩ ciao* ciothe marĩ. Athiũrũrũkĩirio nĩ mbĩrĩra ciao.* Acio othe ti aruu, moragĩtwo na rũhiũ rwa njora, tondũ nĩ maatũmire kũgĩe na guoya bũrũri-inĩ wa arĩa marĩ muoyo. 27 Githĩ matigaakoma hamwe na njamba cia ita irĩ hinya iria ciũragĩtwo, o icio itaruĩte na cikũrũkĩte Mbĩrĩra-inĩ* irĩ na matharaita ma cio ma mbaara? Hiũ ciao cia njora magaaciga rungu rwa mĩtwe yao* na mahĩndĩ mao o namo maherithio nĩ ũndũ wa mehia mao, tondũ njamba icio cia ita irĩ hinya nĩ cianyamaririe bũrũri wa arĩa marĩ muoyo. 28 No wee-rĩ, ũkaaniinĩrũo gatagatĩ-inĩ ka arĩa matarĩ aruu, na ũgaakoma hamwe na arĩa mooragirũo na rũhiũ rwa njora.

29 “‘Edomu+ arĩ kũu, o na athamaki ake na atongoria ake othe, arĩa maakomire hamwe na arĩa mooragirũo na rũhiũ rwa njora, o na gũtuĩka maarĩ na hinya mũingĩ; acio o nao magaakoma hamwe na arĩa matarĩ aruu+ na hamwe na arĩa maikũrũkaga irima-inĩ.*

30 “‘Kũu nĩkuo anene* othe a mwena wa rũgongo marĩ, hamwe na andũ a Sidoni othe+ arĩa maikũrũkĩte na gĩconoko o na arĩa moragĩtwo, o na gũtuĩka nĩ maatũmaga kũgĩe na guoya nĩ ũndũ wa hinya wao. Magaakoma matarĩ aruu hamwe na arĩa moragĩtwo na rũhiũ rwa njora na maikare maconorithĩtio hamwe na arĩa maikũrũkaga irima-inĩ.*

31 “‘Firauni nĩ akoona maũndũ macio mothe na omĩrĩrio nĩ ũndũ wa maũndũ mothe marĩa meekĩkĩte harĩ irĩndĩ ciake;+ Firauni na mbũtũ yake yothe makooragwo na rũhiũ rwa njora,’ ũguo nĩguo Jehova Mwathani Ũrĩa Mũnene ekuuga.

32 “‘Firauni na irĩndĩ ciake ciothe makaahurũkio hamwe na arĩa matarĩ aruu, arĩa mooragirũo na rũhiũ rwa njora, tondũ nĩ aatũmire kũgĩe na guoya bũrũri-inĩ wa arĩa marĩ muoyo,’ ũguo nĩguo Jehova Mwathani Ũrĩa Mũnene oigĩte.”