Maũndũ ma Matukũ ma Tene wa Mbere

28 Na rĩrĩ, Daudi agĩcoka agĩcokanĩrĩria anene othe a Isiraeli kũu Jerusalemu: anene a mĩhĩrĩga, anene a ikundi+ iria ciatungatagĩra mũthamaki, anene a andũ ngiri na anene a andũ igana,+ anene arĩa maarũgamagĩrĩra indo ciothe na mahiũ ma mũthamaki+ na ma ariũ ake,+ o hamwe na anene a kwa mũthamaki na mũndũrũme wothe ũrĩ na hinya na ũhoti.+ 2 Mũthamaki Daudi agĩcoka akĩrũgama akiuga ũũ:

“Thikĩrĩriai ariũ a ithe witũ na andũ akwa. Warĩ wendi wa ngoro yakwa gwaka nyũmba ĩtuĩke handũ ha kũhurũka ha ithandũkũ rĩa kĩrĩkanĩro kĩa Jehova na ĩtuĩke gaturũa ka magũrũ ma Ngai witũ,+ na ngĩhaarĩria maũndũ megiĩ mwako.+ 3 Ĩndĩ Ngai ũrĩa wa ma akĩnjĩra atĩrĩ, ‘Ndũgwaka nyũmba nĩ ũndũ wa rĩĩtwa rĩakwa,+ nĩ gũkorũo ũrĩ mũndũ wa mbaara, na nĩ ũitĩte thakame.’+ 4 No rĩrĩ, Jehova Ngai wa Isiraeli nĩ niĩ aathuurire kuuma harĩ nyũmba yothe ya baba nduĩke mũthamaki igũrũ rĩa Isiraeli tene na tene,+ tondũ aathuurire Juda atuĩke mũtongoria+ na kuuma harĩ nyũmba ya Juda, agĩthuura nyũmba ya baba,+ na kuuma harĩ ariũ a baba, niĩ nĩ niĩ eetĩkĩrire, akĩndua mũthamaki igũrũ rĩa andũ othe a Isiraeli.+ 5 Na kuuma harĩ ariũ akwa othe—nĩ gũkorũo Jehova nĩ aheete ariũ aingĩ+—agĩthuura mũrũ wakwa Suleimani+ aikarĩre gĩtĩ kĩa ũnene kĩa ũthamaki wa Jehova athamakagĩre Isiraeli.+

6 “Aanjĩrire atĩrĩ, ‘Mũrũguo Suleimani nĩwe ũgaaka nyũmba yakwa o hamwe na nja ciakwa, tondũ nĩ ndĩmũthuurĩte atuĩke mũrũ wakwa na niĩ nduĩke ithe.+ 7 Nĩ ngaahanda ũthamaki wake ũrũme tene na tene+ angĩkorũo nĩ agaakorũo ehotorete biũ kũrũmĩrĩra maathani makwa na matuĩro makwa ma ciira,+ o ta ũrĩa areka ũmũthĩ.’ 8 Nĩ ũndũ ũcio nguuga ũũ maitho-inĩ ma andũ othe a Isiraeli, kĩũngano kĩa Jehova, na matũ-inĩ ma Ngai witũ: Rũmagĩrĩrai na kinyi maathani mothe ma Jehova Ngai wanyu na mũmathuthuragie, nĩgetha mwĩgwatĩre bũrũri ũyũ mwega+ na mũkaaũtigĩra ariũ anyu arĩa magooka thutha wanyu ũrĩ igai rĩa gũtũũra.

9 “Nawe mũrũ wakwa Suleimani-rĩ, menya Ngai wa thoguo na ũmũtungatagĩre na ngoro yothe*+ wĩyendeire kuuma ngoro, nĩ gũkorũo Jehova athuthuragia ngoro ciothe,+ na nĩ amenyaga mwerekera wothe wa meciria.+ Angĩkorũo nĩ ũkũmũcaria, nĩ ekũreka ũmuone,+ ĩndĩ ũngĩmũtiga, nake nĩ egũgũtiga tene na tene.+ 10 Atĩrĩrĩ, rĩu Jehova nĩ agũthuurĩte wake nyũmba ĩtuĩke handũ harĩa hatheru. Gĩa na ũmĩrĩru na wambĩrĩrie wĩra.”

11 Ningĩ Daudi akĩnengera mũrũwe Suleimani mũcoro wa mwako+ wa gĩthaku+ na wa nyũmba ciakĩo, rumu ciakĩo cia kũiga indo, tũnyũmba twakĩo twa igũrũ, rumu ciakĩo cia thĩinĩ, na nyũmba ya gĩkunĩko kĩa ũiguano.*+ 12 Aamũnengerire mũcoro wa mwako wa maũndũ marĩa mothe aaguũrĩirio kũgerera roho, ũkoniĩ nja+ cia nyũmba ya Jehova, rumu cia kũrĩĩra iria ciamĩthiũrũrũkĩirie, igĩna cia nyũmba ya Ngai ũrĩa wa ma, na igĩna cia indo iria nyamũre;+ 13 ningĩ akĩmũhe watho wĩgiĩ ikundi cia athĩnjĩri-Ngai+ na Alawii, mawĩra mothe ma ũtungata wa nyũmba ya Jehova, na indo ciothe cia ũtungata wa nyũmba ya Jehova; 14 na akĩmũnengera ithimi cia thahabu, thahabu ya indo ciothe iria ciahũthagĩrũo ũtungata-inĩ ngũrani ngũrani, ithimi cia indo ciothe cia betha, na cia indo ciothe iria ciahũthagĩrũo ũtungata-inĩ ngũrani ngũrani; 15 na akĩmũnengera ithimi cia mĩtĩ ya thahabu ya kũigĩrĩrũo matawa+ na matawa mayo ma thahabu, ithimi cia mĩtĩ ngũrani ngũrani ya kũigĩrĩrũo matawa na matawa mayo, na ithimi cia mĩtĩ ya betha ya kũigĩrĩrũo matawa, nĩ ũndũ wa o mũtĩ wa kũigĩrĩrũo matawa na matawa maguo kũringana na wĩra waguo; 16 ningĩ akĩmũnengera ithimi cia thahabu ya metha cia kũigĩrĩrũo mĩgate ya kũiganĩrĩrũo,*+ nĩ ũndũ wa o metha, o hamwe na betha ya metha cia betha, 17 ningĩ nĩ aamũnengerire ithimi cia hũma, mbakũri, njagi cia thahabu therie, na ithimi cia tũbakũri twa thahabu,+ nĩ ũndũ wa o kabakũri, na ithimi cia tũbakũri twa betha, nĩ ũndũ wa o kabakũri. 18 Ningĩ nĩ aaneanire ithimi cia thahabu therie ya kĩgongona kĩa ũbumba+ na ya mũhianĩre wa ngaari ya mbarathi,+ nĩo akerubi+ a thahabu arĩa maatambũrũkĩtie mathagu mao makahumbĩra ithandũkũ rĩa kĩrĩkanĩro kĩa Jehova. 19 Daudi akiuga ũũ: “Guoko kwa Jehova kwarĩ igũrũ rĩakwa, na nĩ aaheire ũtaũku wa kwandĩka+ maũndũ mothe ma mũcoro wa mwako wa nyũmba ĩyo.”+

20 Daudi agĩcoka akĩra mũrũwe Suleimani ũũ: “Gĩa na ũmĩrĩru na ũgĩe na hinya na wambĩrĩrie wĩra. Ndũgetigĩre kana ũmake, nĩ gũkorũo Jehova Ngai, o we Ngai wakwa, arĩ hamwe nawe.+ Ndagagũtirika o na kana agũtiganĩrie,+ no egũkorũo hamwe nawe nginya wĩra wothe wa ũtungata wa nyũmba ya Jehova ũrĩke. 21 Na rĩrĩ, ũrĩ na ikundi cia athĩnjĩri-Ngai+ na Alawii+ nĩ ũndũ wa ũtungata wothe wa nyũmba ya Ngai ũrĩa wa ma. Ũrĩ na aruti a wĩra marĩ na wendi na ũũgĩ a gũtungata wĩra-inĩ wothe,+ o hamwe na anene+ na andũ othe arĩa marĩrũmagĩrĩra mawatho maku mothe.”