Maũndũ Marĩa Meekirũo nĩ Atũmwo
15 Hĩndĩ ĩyo arũme amwe magĩikũrũka kuuma Judea na makĩambĩrĩria kũruta ariũ a Ithe witũ atĩrĩ: “Mũngĩaga kũrua kũringana na ũndũire wa Musa-rĩ,+ mũtingĩhonokio.” 2 No thutha wa Paulo na Baranaba gũcokanĩria na gũkararania nao, gũkĩbangwo atĩ Paulo na Baranaba, hamwe na andũ angĩ mambate mathiĩ Jerusalemu+ kũrĩ atũmwo na athuri nĩ ũndũ wa ũhoro ũcio.*
3 Na thutha wa kuumagario hanini nĩ kĩũngano, magĩthiĩ na mbere na rũgendo magereire Foenicia na Samaria, magĩtaaragĩria na njĩra ndikĩru ũhoro wa kũgarũrũka kwa andũ a ndũrĩrĩ na magĩtũma ariũ a Ithe witũ othe makene mũno. 4 Maakinya Jerusalemu, makĩamũkĩrũo wega nĩ kĩũngano na atũmwo o hamwe na athuri, na makĩmataarĩria maũndũ maingĩ marĩa Ngai eekĩte kũgerera harĩ o. 5 No arũmĩrĩri amwe a gĩkundi kĩa nyamũkano kĩa Afarisai arĩa maatuĩkĩte etĩkia makĩrũgama makiuga atĩrĩ: “Nĩ harĩ bata maruithio na mathwo marũmagĩrĩre Watho wa Musa.”+
6 Nĩ ũndũ ũcio atũmwo hamwe na athuri makĩgomana nĩguo maarĩrĩrie ũndũ ũcio. 7 Thutha wa kũwarĩrĩria* na njĩra ndikĩru, Petero akĩrũgama akĩmeera atĩrĩ: “Athuri aya, ariũ a Ithe witũ, nĩ mũĩ wega atĩ kuuma o matukũ ma mbere Ngai nĩ aathuurire gatagatĩ-inĩ kanyu nĩguo kũgerera kanua gakwa andũ a ndũrĩrĩ maigue kiugo kĩa ũhoro ũrĩa mwega na metĩkie.+ 8 Nake Ngai, o we ũĩ ngoro,+ akĩruta ũira na njĩra ya kũmahe roho mũtheru,+ ta ũrĩa o na ithuĩ aatũheire. 9 Na ndeekĩrire ũtiganu gatagatĩ gaitũ nao,+ ĩndĩ aatheririe ngoro ciao kũgerera wĩtĩkio.+ 10 Gũkĩrĩ ũguo-rĩ, mũrakĩgeria Ngai nĩkĩ na njĩra ya kũigĩrĩra arutwo icoki ngingo+ rĩrĩa ithuĩ o na maithe maitũ ma tene twaremirũo nĩ gũkuua?+ 11 O na kũrĩ ũguo, nĩ twĩtĩkĩtie atĩ nĩ tũhonoketio kũgerera ũtugi mũnene wa Mwathani Jesu,+ o tao.”+
12 Hĩndĩ ĩyo gĩkundi kĩu gĩothe gĩgĩkira ki, gĩkĩambĩrĩria gũthikĩrĩria Baranaba na Paulo magĩtaarĩria ciama nyingĩ na maũndũ ma magegania* marĩa Ngai eekĩte gatagatĩ-inĩ ka ndũrĩrĩ kũgerera harĩ o. 13 Marĩkia kwaria, Jakubu akiuga atĩrĩ: “Athuri aya, ariũ a Ithe witũ, ta thikĩrĩriai. 14 Simeoni+ nĩ ataarĩria biũ ũrĩa Ngai aambĩrĩirie kwerekeria meciria make kũrĩ ndũrĩrĩ nĩguo egĩĩre na andũ kuuma kũrĩ cio metanĩtio na rĩĩtwa rĩake.+ 15 Na ciugo cia Anabii nĩ itwaranaga na ũndũ ũcio, o ta ũrĩa kwandĩkĩtwo atĩrĩ: 16 ‘Thutha wa maũndũ macio nĩ ngaacoka na ndũgamie rĩngĩ hema ya* Daudi ĩrĩa ĩgwĩte; ndĩmĩake rĩngĩ kũrĩa yanangĩkĩte na ndĩmĩcokie ũrĩa yatariĩ, 17 nĩguo andũ arĩa matigarĩte macarie Jehova* na kĩyo, marĩ hamwe na andũ a ndũrĩrĩ ciothe, arĩa metanĩtio na rĩĩtwa rĩakwa, ũguo nĩguo Jehova* ekuuga, o we ũreka maũndũ macio,+ 18 mooĩkaine kuuma tene.’+ 19 Nĩ ũndũ ũcio-rĩ, itua rĩakwa* ti gũthĩnia arĩa moimĩte thĩinĩ wa ndũrĩrĩ makagarũrũkĩra Ngai,+ 20 ĩndĩ nĩ kũmaandĩkĩra methemage indo iria ithahĩtio nĩ mĩhianano,+ ngomanio itagĩrĩire,*+ nyamũ cia gũitwo,* na thakame.+ 21 Tondũ kuuma mahinda ma tene ũhoro ũrĩa waandĩkirũo nĩ Musa nĩ ũhunjagio itũũra-inĩ rĩmwe nginya rĩrĩa rĩngĩ, nĩ gũkorũo nĩ ũthomagwo na kayũ thunagogi-inĩ thabatũ ciothe.”+
22 Atũmwo na athuri, o hamwe na kĩũngano gĩothe, magĩtua itua rĩa gũthuura arũme gatagatĩ-inĩ kao mamatũme Antiokia, marĩ hamwe na Paulo na Baranaba; magĩgĩtũma Judasi ũrĩa wetagwo Barasaba, na Sila,+ arũme arĩa maatongoragia gatagatĩ-inĩ ka ariũ a Ithe witũ. 23 Makĩandĩka ũũ na magĩtũmana kũgerera harĩ o:
“Kuuma kũrĩ ariũ a Ithe wanyu, atũmwo o hamwe na athuri, kũrĩ ariũ a Ithe witũ arĩa moimĩte ndũrĩrĩ-inĩ arĩa marĩ Antiokia,+ Siria, na Kilikia: Amũkĩrai ngeithi! 24 Tondũ nĩ tũiguĩte atĩ andũ amwe gatagatĩ-inĩ gaitũ nĩ mookire na makĩmũthĩnia na maũndũ marĩa maaririe,+ makĩgeria kũmwagagia, o na gũtuĩka gũtirĩ ũndũ twamatũmĩte makoige-rĩ, 25 ithuothe nĩ tũiguithanĩirie gũthuura arũme tũmatũme kũrĩ inyuĩ marĩ hamwe na Paulo na Baranaba arĩa twendete mũno, 26 arĩa manaingĩria mĩoyo* yao ũgwati-inĩ nĩ ũndũ wa rĩĩtwa rĩa Mwathani witũ Jesu Kristo.+ 27 Nĩ ũndũ ũcio tũratũma Judasi hamwe na Sila, nĩguo o nao mamũmenyithie maũndũ o ro macio na kanua.+ 28 Nĩ gũkorũo roho mũtheru+ o hamwe na ithuĩ nĩ tuonete arĩ wega tũtikamuongerere mũrigo ũngĩ o tiga maũndũ maya ma o mũhaka: 29 mwĩthemage indo iria irutĩtwo magongona kũrĩ mĩhianano,+ thakame,+ nyamũ cia gũitwo,*+ na ngomanio itagĩrĩire.*+ Mũngĩĩthema biũ maũndũ macio-rĩ, nĩ mũkũgaacĩra. Tigwoi ũhoro!”
30 Kwoguo rĩrĩa arũme acio mooimire kũu, magĩikũrũka magĩthiĩ Antiokia, na magĩcokanĩrĩria gĩkundi gĩothe kĩa arutwo magĩkĩnengera marũa macio. 31 Thutha wa kũmathoma, gĩgĩkena mũno nĩ ũndũ wa gwĩkĩrũo ngoro. 32 Nao Judasi na Sila, tondũ o nao maarĩ anabii, magĩĩkĩra ariũ a Ithe witũ ngoro na njĩra ya kũheana mĩario mĩingĩ na makĩmekĩra hinya.+ 33 Thutha wa gũikara kũu kwa ihinda, makiugĩrũo ũhoro nĩ ariũ a Ithe witũ macoke na thayũ kũrĩ arĩa maamatũmĩte. 34 *—— 35 No Paulo na Baranaba magĩikara kũu Antiokia marĩ hamwe na angĩ aingĩ, makĩrutanaga na makĩhunjagia ũhoro ũrĩa mwega wa kiugo kĩa Jehova.*
36 Thutha wa matukũ maigana ũna, Paulo akĩra Baranaba atĩrĩ: “Reke rĩu* tũcoke matũũra-inĩ mothe marĩa twaheanire kiugo kĩa Jehova,* tũgaceerere ariũ a Ithe witũ nĩguo tuone ũrĩa marathiĩ na mbere.”+ 37 Baranaba nĩ aatuĩte atĩ nĩ megũthiĩ na Johana, ũrĩa wetagwo Mariko.+ 38 No Paulo ndoonaga arĩ wega mathiĩ nake, tondũ nĩ aamatigire rĩrĩa maarĩ Pamfilia akĩaga gũthiĩ nao wĩra-inĩ.+ 39 Nĩ ũndũ ũcio, magĩkararania marakarĩte mũno, nginya magĩtigana; Baranaba+ akĩoya Mariko magĩthiĩ na meri merekeire Kuporo. 40 Nake Paulo agĩthuura Sila na makiumagara thutha wa ariũ a Ithe witũ kũmũneana ũtugi-inĩ mũnene wa Jehova.*+ 41 Akĩgerera Siria na Kilikia, agĩĩkĩraga ciũngano hinya.