Maũndũ Marĩa Meekirũo nĩ Atũmwo
16 Paulo agĩgĩkinya Deribe o na Listra.+ Na kũu nĩ kwarĩ na mũrutwo ũmwe wetagwo Timotheo,+ mũrũ wa mũtumia Mũyahudi warĩ mwĩtĩkia no ithe aarĩ Mũngiriki, 2 na nĩ aagaathagĩrĩrio nĩ ariũ a Ithe witũ thĩinĩ wa Listra na Ikoniamu. 3 Paulo akĩonania wendi wa gũthiĩ na Timotheo, na agĩthiĩ nake na akĩmũruithia nĩ ũndũ wa Ayahudi arĩa maarĩ matũũra-inĩ macio,+ tondũ othe nĩ mooĩ atĩ ithe aarĩ Mũngiriki. 4 Na matũũra-inĩ marĩa maageragĩra, maathiaga makĩmenyithanagia matua ma kũrũmĩrĩrũo marĩa maatuĩtwo nĩ atũmwo na athuri arĩa maarĩ Jerusalemu.+ 5 Nacio ciũngano igĩthiĩ na mbere kũgĩa na hinya ũhoro-inĩ wa wĩtĩkio na kuongerereka mũthenya o mũthenya.
6 Ningĩ magĩtuĩkanĩria Ferugia o hamwe na bũrũri wa Galatia,+ tondũ nĩ maagiririo nĩ roho mũtheru kwaria kiugo kĩa Ngai gĩcigo-inĩ kĩa Asia. 7 Makĩria ma ũguo, rĩrĩa maaikũrũkire magĩkinya Misia, makĩĩrutanĩria gũthiĩ Bithinia,+ no roho wa Jesu ndwametĩkĩririe. 8 Kwoguo makĩhĩtũka* Misia, magĩikũrũka magĩkinya Teroa. 9 Na kũrĩ ũtukũ, Paulo akĩona kĩoneki—mũndũ ũmwe Mũmakedonia aarũgamĩte hau akĩmũthaitha akĩmwĩra: “Ringa ũũke Makedonia ũtũteithie.” 10 Arĩkia kuona kĩoneki kĩu o ũguo, tũkĩgeria gũthiĩ Makedonia, tũgĩtua atĩ nĩ Ngai watwĩtĩte tũkamahunjĩrie ũhoro ũrĩa mwega.
11 Nĩ ũndũ ũcio, tũgĩthiĩ na meri kuuma Teroa ĩmwe kwa ĩmwe nginya Samotherake, no mũthenya ũrĩa warũmĩrĩire tũgĩthiĩ Neapoli; 12 na kuuma kũu tũgĩthiĩ Filipi,+ itũũra rĩarĩ rĩa Roma, rĩrĩa rĩarĩ igweta mũno gĩcigo-inĩ kĩu kĩa Makedonia. Tũgĩikara itũũra-inĩ rĩu thikũ cigana ũna. 13 Mũthenya wa Thabatũ tũgĩthiĩ nja ya kĩhingo hakuhĩ na rũũĩ, harĩa tweciragia atĩ nĩ haarĩ na handũ ha kũhoerũo, tũgĩikara thĩ na tũkĩambĩrĩria kwarĩria atumia arĩa maagomanĩte ho. 14 Na mũtumia ũmwe wetagwo Lidia wa kuuma itũũra rĩa Thiatira,+ warĩ mwendia wa nguo cia rangi wa papũ na mũthathaiya wa Ngai nĩ aathikagĩrĩria, na Jehova* akĩhingũra ngoro yake biũ nĩguo athikĩrĩrie wega maũndũ marĩa Paulo ooigaga. 15 Na rĩrĩa mũtumia ũcio na andũ a nyũmba yake maabatithirio,+ agĩtũthaitha agĩtwĩra: “Angĩkorũo nĩ muona atĩ ndĩ mwĩhokeku harĩ Jehova,* ũkai gwakwa mũikare kuo.” Agĩtũringĩrĩria mũno o nginya tũgĩthiĩ gwake.
16 Rĩrĩa twathiaga handũ hau ha kũhoerũo, tũgĩcemania na mũirĩtu ũmwe ndungata warĩ na ndaimono ya ũragũri.+ Na nĩ aatongagia arĩa maamwathaga, na njĩra ya kũratha mohoro. 17 Mũirĩtu ũcio agĩthiĩ atũrũmĩrĩire tũrĩ hamwe na Paulo akĩanagĩrĩra akoiga ũũ: “Athuri aya nĩ ndungata cia Ngai Ũrĩa ũrĩ Igũrũ Mũno+ na maramũhunjĩria njĩra ya ũhonokio.” 18 Agĩikara agĩkaga ũguo thikũ nyingĩ. Nake Paulo akĩnogio nĩ ũndũ ũcio na akĩĩhũgũra akĩra ndaimono ĩyo ũũ: “Ndagwatha thĩinĩ wa rĩĩtwa rĩa Jesu Kristo uume thĩinĩ wake.” Nayo ĩkiuma o hĩndĩ ĩyo.+
19 Rĩrĩa arĩa maamwathaga moonire atĩ njĩra yao ya gwĩtongia nĩ yathira,+ makĩnyita Paulo na Sila makĩmakururia nginya thoko kũrĩ atongoria.+ 20 Makĩmatwara kũrĩ aciirithania, makĩmeera atĩrĩ: “Athuri aya nĩ marathumbũra itũũra ritũ.+ Nĩ Ayahudi, 21 na mararutana mĩtugo ĩrĩa ithuĩ Aroma tũtetĩkĩrĩtio kũiyũkia kana kũrũmĩrĩra.” 22 Nakĩo kĩrĩndĩ gĩkĩmokĩrĩra, na thutha wa aciirithania acio kũmatembũrangĩra nguo, magĩathana mahũũrũo na thanju.+ 23 Thutha wa kũmahũũra iboko nyingĩ, makĩmaikia njera na magĩatha mũrangĩri wa njera amarangĩre biũ.+ 24 Tondũ wa gwathwo ũguo, akĩmaikia njera ya thĩinĩ na akĩoherera magũrũ mao ndungu-inĩ.
25 No kĩndũ ta ũtukũ gatagatĩ, Paulo na Sila nĩ kũhoya maahoyaga makĩgoocaga Ngai na nyĩmbo,+ nao ohwo nĩ maamathikagĩrĩria. 26 O rĩmwe gũkĩgĩa gĩthingithia kĩnene nginya mĩthingi ya njera ĩyo ĩgĩthingithio. Ningĩ, mĩrango yothe ĩkĩhingũka o rĩo, na mĩnyororo ya andũ othe ĩkĩohoka.+ 27 Rĩrĩa mũrangĩri wa njera ookĩrire na akĩona atĩ mĩrango ya njera yarĩ mĩhingũku, agĩcomora rũhiũ rwake rwa njora na aarĩ hakuhĩ kwĩyũraga, ecirĩtie atĩ ohwo nĩ moorĩte.+ 28 No Paulo akĩanĩrĩra akiuga: “Ndũkegere ngero, tondũ tũrĩ haha ithuothe!” 29 Kwoguo mũrangĩri ũcio agĩtia matawa na akĩguthũka thĩinĩ, akĩgwa mbere ya Paulo na Sila ainainĩte mũno. 30 Akĩmoimia nja akĩmoria: “Athuri aya, njagĩrĩirũo gwĩka atĩa nĩguo honoke?” 31 Nao makĩmwĩra: “Ĩtĩkia Mwathani Jesu, na nĩ ũkũhonoka, wee o hamwe na andũ a nyũmba yaku.”+ 32 Magĩkĩmũhunjĩria kiugo kĩa Jehova* arĩ hamwe na andũ othe a nyũmba yake. 33 O hĩndĩ ĩyo kũrĩ ũtukũ akĩmoya akĩmathambia ironda ciao. Thutha ũcio akĩbatithio marĩ hamwe na andũ othe a nyũmba yake hatarĩ gũte mahinda.+ 34 Akĩmatwara gwake mũciĩ na akĩmarehera irio metha-inĩ, na agĩkena mũno marĩ hamwe na andũ othe a nyũmba yake nĩ ũndũ wa gwĩtĩkia Ngai.
35 Gwakĩa-rĩ, aciirithania magĩtũma thigari ikoige ũũ: “Rekereria arũme acio.” 36 Mũrangĩri wa njera akĩmenyithia Paulo ũhoro ũcio akĩmwĩra: “Aciirithania nĩ maatũma andũ moiga inyuerĩ mũrekererio. Kwoguo umai mũthiĩ na thayũ.” 37 No Paulo akĩmeera atĩrĩ: “Maratũhũũrire mbere ya mũingĩ tũtatuĩrĩirũo,* o na gũtuĩka tũrĩ Aroma,+ maracoka maratũikia njera. Anga rĩu marenda gũtũrekereria na hitho? Aca, gũtingĩthiĩ ũguo! Reke moke matũrekererie arĩ o.” 38 Thigari icio igĩthiĩ ikĩhe aciirithania ũhoro ũcio. Maigua atĩ arũme acio nĩ Aroma magĩĩtigĩra mũno.+ 39 Nĩ ũndũ ũcio magĩthiĩ na makĩmahooreria, na thutha wa kũmoimagaria nginya nja, makĩmathaitha moime itũũra rĩu. 40 No rĩrĩa mooimire njera maathiire mũciĩ kwa Lidia; na rĩrĩa moonire ariũ a Ithe witũ, makĩmekĩra ngoro+ na makiumagara.