Samueli wa Mbere

27 No rĩrĩ, Daudi akiuga ũũ na ngoro: “Mũthenya ũmwe nĩ ndĩthirĩra guoko-inĩ gwa Saulu. Ũndũ ũrĩa mwega harĩ niĩ nĩ kũũrĩra+ bũrũri-inĩ wa Afilisti; na Saulu no kũnoga ekũnoga atige kũnjaria gĩcigo-inĩ gĩothe kĩa Isiraeli,+ na niĩ honoke kuuma guoko-inĩ gwake.” 2 Nĩ ũndũ ũcio Daudi akĩarahũka marĩ na arũme 600+ arĩa maarĩ hamwe nake na magĩthiĩ kũrĩ Akishi+ mũrũ wa Maoku, mũthamaki wa Gathu. 3 Daudi agĩgĩikara na Akishi kũu Gathu, we hamwe na arũme ake, o mũndũ na andũ a nyũmba yake. Daudi aarĩ hamwe na atumia ake eerĩ, Ahinoamu+ wa kuuma Jezireeli na Abigaili+ Mũkarimeli, ũrĩa warĩ mũtumia wa ndigwa wa Nabali. 4 Rĩrĩa Saulu aamenyithirio atĩ Daudi nĩ orĩra Gathu, agĩtiga kũmũcaria.+

5 Daudi agĩcoka akĩra Akishi ũũ: “Angĩkorũo nĩ njĩtĩkĩrĩkĩte maitho-inĩ maku, reke maahe handũ thĩinĩ wa itũũra rĩmwe rĩa matũũra ma mĩgũnda-inĩ, nĩguo njikarage kuo. Nĩ kĩĩ kĩngĩgĩtũma ndungata yaku ĩikarage itũũra-inĩ rĩa ũthamaki hamwe nawe?” 6 Nĩ ũndũ ũcio Akishi akĩmũhe Zikilagi+ mũthenya ũcio. Nĩkĩo Zikilagi ĩkoragwo ĩrĩ ya athamaki a Juda nginyagia ũmũthĩ.

7 Ihinda rĩrĩa* Daudi aaikarire mĩgũnda-inĩ kwa Afilisti rĩarĩ mwaka na mĩeri ĩna.+ 8 Daudi aambataga hamwe na arũme ake agathiĩ gũtharĩkĩra Ageshuru,+ Agirizi, na Aamaleki,+ nĩ gũkorũo maaikaraga bũrũri-inĩ ũrĩa woimĩte Telamu ũgathiĩ Shuri+ na ũgaikũrũka o nginya bũrũri-inĩ wa Misiri. 9 Daudi atharĩkĩra bũrũri ũcio, ndaahonokagia mũndũrũme o na kana mũtumia,+ ĩndĩ nĩ aatahaga ndũũru cia mbũri na ngʼondu, ndũũru cia ngʼombe, ndigiri, ngamĩra, na nguo, thutha ũcio agacoka kũrĩ Akishi. 10 Nake Akishi akamũũria ũũ: “Ũmũthĩ ũtharĩkĩire kũ?” Daudi akamũcokeria atĩrĩ: “Tharĩkĩire mwena wa mũhuro wa* Juda”+ kana “Tharĩkĩire mwena wa mũhuro wa Ajerameeli”+ kana “Tharĩkĩire mwena wa mũhuro wa Akeni.”+ 11 Daudi ndaahonokagia mũndũrũme kana mũtumia o na ũmwe atwarũo Gathu, tondũ ooigaga ũũ: “Nĩgetha matikameere ũhoro witũ moige atĩrĩ, ‘Ũũ nĩguo Daudi ekire.’” (Ũguo nĩguo aamenyerete gwĩka ihinda rĩrĩa rĩothe aaikarire mĩgũnda-inĩ kwa Afilisti.) 12 Nĩ ũndũ ũcio Akishi agĩtĩkia Daudi, akĩĩraga ũũ: ‘Hatarĩ nganja nĩ atuĩkĩte kĩndũ kĩranunga gatagatĩ-inĩ ka andũ ao a Isiraeli, kwoguo egũtũũra arĩ ndungata yakwa.’