Ũhoro Mwega Ũrĩa Waandĩkirũo nĩ Johana
12 Thikũ ithathatũ mbere ya Pasaka, Jesu agĩkinya Bethania kũrĩa Lazaro+ aarĩ, ũrĩa Jesu aariũkĩtie kuuma kũrĩ arĩa akuũ. 2 Nĩ ũndũ ũcio makĩhaarĩria irio cia hwaĩ-inĩ kũu nĩ ũndũ wake, na Maritha nĩwe wamaihũragĩra,+ no Lazaro aarĩ ũmwe wa arĩa maarĩanagĩra* nake. 3 Nake Mariamu akĩoya ratiri* ĩmwe ya maguta manungi wega ma nado ĩtatukanĩtio na kĩndũ, ma goro mũno, akĩmaitĩrĩria magũrũ-inĩ ma Jesu na akĩmũhuura magũrũ na njuĩrĩ yake. Nayo nyũmba ĩkĩiyũra mũtararĩko wa maguta macio.+ 4 No Judasi Mũisikariota,+ ũmwe wa arutwo ake, ũrĩa warĩ hakuhĩ kũmũkunyanĩra, akiuga: 5 “Maguta maya manungi wega magire kwendio dinari* 300 nĩkĩ iheo athĩni?” 6 No we ndooigire ũguo tondũ wa kũrũmbũyia athĩni, no nĩ ũndũ aarĩ mũici na nĩwe wakoragwo na ithandũkũ rĩa mĩhothi na nĩ aaiyaga mbeca iria ciaikagio thĩinĩ warĩo. 7 Nake Jesu akiuga: “Tiganai nake aahaarĩrie nĩ ũndũ wa mũthenya wa mathiko makwa.+ 8 Tondũ athĩni mũkoragwo nao hĩndĩ ciothe+ no mũtirĩkoragwo na niĩ hĩndĩ ciothe.”+
9 Hĩndĩ ĩyo kĩrĩndĩ kĩnene kĩa Ayahudi gĩkĩmenya atĩ aarĩ kũu, nakĩo gĩgĩũka, ti ũndũ tu wa Jesu, no nĩguo kĩone Lazaro o nake, ũrĩa aariũkĩtie kuuma kũrĩ arĩa akuũ.+ 10 Hĩndĩ ĩyo anene a athĩnjĩri-Ngai makĩbanga njama ya kũũraga nginya Lazaro, 11 nĩ gũkorũo Ayahudi aingĩ nĩ maathiaga kũu nĩ ũndũ wake na makagĩa na wĩtĩkio harĩ Jesu.+
12 Mũthenya ũyũ ũngĩ andũ aingĩ arĩa mookĩte gĩathĩ-inĩ makĩigua atĩ Jesu nĩ aroka Jerusalemu. 13 Magĩkĩoya mathĩgĩ ma mĩtĩ ya mĩkĩndũ magĩthiĩ kũmũtũnga, na makĩambĩrĩria kwanĩrĩra ũũ: “Twakũhoya ũmũhonokie! Kũrathimwo nĩ ũrĩa ũroka na rĩĩtwa rĩa Jehova,*+ Mũthamaki wa Isiraeli!”+ 14 Rĩrĩa Jesu oonire njaũ ya ndigiri, akĩmĩikarĩra,+ o ta ũrĩa kwandĩkĩtwo atĩrĩ: 15 “Ndũgetigĩre, mwarĩ wa Zayuni. Atĩrĩrĩ, mũthamaki waku nĩ aroka, aikarĩire njaũ ya ndigiri.”+ 16 Arutwo ake matiambĩte gũtaũkĩrũo nĩ maũndũ macio, no hĩndĩ ĩrĩa Jesu aatũũgĩririo,+ makĩririkana atĩ maũndũ macio nĩ maandĩkĩtwo ũhoro-inĩ ũmwĩgiĩ na atĩ nĩ maamwĩkire maũndũ macio.+
17 Na rĩrĩ, kĩrĩndĩ kĩrĩa kĩarĩ hamwe nake rĩrĩa eetire Lazaro oime thĩinĩ wa mbĩrĩra*+ akĩmũriũkia kuuma kũrĩ arĩa akuũ nĩ kĩarutaga ũira.+ 18 Ũndũ ũcio o naguo nĩ watũmire kĩrĩndĩ gĩthiĩ gĩkamũtũnge, tondũ nĩ kĩaiguire atĩ nĩ aaringĩte kĩama kĩu. 19 Nĩ ũndũ ũcio Afarisai makĩĩrana o ene atĩrĩ: “Ta kĩonei gũtirĩ ũndũ mũrahingia! Thĩ yothe nĩwe ĩrũmĩrĩire.”+
20 Na rĩrĩ, nĩ kwarĩ na Angiriki amwe gatagatĩ-inĩ ka andũ arĩa mookĩte gĩathĩ-inĩ gũthathaiya. 21 Magĩkuhĩrĩria Filipu,+ ũrĩa woimĩte Bethisaida ya Galili, makĩambĩrĩria kũmwĩra atĩrĩ: “Mũthuri ũyũ, tũrenda kuona Jesu.” 22 Filipu agĩthiĩ akĩra Andrea. Andrea na Filipu magĩthiĩ makĩra Jesu.
23 No Jesu akĩmacokeria: “Ihinda nĩ ikinyu rĩa Mũrũ wa mũndũ gũtũũgĩrio.+ 24 Ngũmwĩra atĩrĩ o ma o ma, mbegũ ya ngano ĩtangĩgwa thĩ na ĩkue, ĩtũũraga ĩrĩ o ĩmwe; no ĩngĩkua,+ ĩcokaga ĩgaciara maciaro maingĩ. 25 Mũndũ o wothe wendete muoyo* wake nĩ kũũniina aũniinaga, no mũndũ o wothe ũthũire muoyo* wake+ thĩinĩ wa thĩ ĩno nĩ aũgitagĩra nĩ ũndũ wa muoyo wa tene na tene.+ 26 Mũndũ o wothe angĩenda kũndungatĩra, nĩ anũmagĩrĩre, na harĩa niĩ ndĩrĩkoragwo nĩ ho ndungata yakwa o nayo ĩrĩkoragwo.+ Mũndũ o wothe angĩenda kũndungatĩra, Awa nĩ arĩmũtĩaga. 27 Rĩu nĩ ndĩratangĩka,+ ngũkiuga atĩa? Awa, honokia kuumana na ithaa rĩrĩ.+ No ningĩ-rĩ, ithaa rĩrĩ no mũhaka rĩngore, kĩu nĩkĩo gĩtũmĩte njũke. 28 Awa, goocithia rĩĩtwa rĩaku.” Naguo mũgambo+ ũkiuma igũrũ ũkiuga: “Nĩ ndĩrĩgoocithĩtie na nĩ ngũrĩgoocithia rĩngĩ.”+
29 Nakĩo kĩrĩndĩ kĩrĩa kĩarũgamĩte hau gĩkĩigua na gĩkĩambĩrĩria kuuga atĩ nĩ marurumĩ. Angĩ makiuga: “Nĩ mũraika wamwarĩria.” 30 Jesu agĩcokia atĩrĩ: “Mũgambo ũcio ndũnaiguĩka nĩ ũndũ wakwa, no nĩ ũndũ wanyu. 31 Rĩu thĩ ĩno nĩ ĩgũtuĩrũo; rĩu mũnene wa thĩ ĩno+ nĩ egũikio nja.+ 32 No rĩrĩ, rĩrĩa ngaacuurio kuuma gũkũ thĩ,+ ngaagucĩrĩria andũ a mĩthemba yothe moke kũrĩ niĩ.” 33 Ooigire ũguo kuonania mũthemba wa gĩkuũ kĩrĩa aarĩ hakuhĩ gũkua.+ 34 Nakĩo kĩrĩndĩ gĩkĩmũcokeria ũũ: “Tũiguĩte Watho-inĩ atĩ Kristo atũũraga tene na tene.+ Ũngiuga atĩa atĩ no mũhaka Mũrũ wa mũndũ acuurio?+ Mũrũ ũcio wa mũndũ nĩ we ũ?” 35 Kwoguo Jesu akĩmeera: “Ũtheri ũgũkorũo hamwe na inyuĩ o kahinda kanini. Thiĩi hĩndĩ ĩrĩa mũrĩ na ũtheri ũcio nĩguo nduma ndĩkamũtoorie; mũndũ o wothe ũthiagĩra nduma-inĩ ndamenyaga kũrĩa arathiĩ.+ 36 Hĩndĩ ĩrĩa mũrĩ na ũtheri, onanagiai wĩtĩkio harĩ ũtheri ũcio, nĩguo mũtuĩke ciana cia ũtheri.”+
Jesu ooigire maũndũ macio agĩcoka akiumagara akĩmeehitha. 37 O na gũtuĩka nĩ aaringĩte ciama nyingĩ makĩyonagĩra, matiamwĩtĩkagia, 38 nĩguo kiugo kĩa mũnabii Isaia kĩhinge, ũrĩa woigire atĩrĩ: “Jehova,* nũũ ũgĩĩte na wĩtĩkio harĩ ũndũ ũrĩa ũiguĩtwo kuuma kũrĩ ithuĩ?*+ Na ha ũhoro wa guoko kwa Jehova-rĩ,* hihi nũũ ũguũrĩirio?”+ 39 Kĩrĩa gĩatũmire mage gwĩtĩkia nĩ atĩ Isaia ningĩ nĩ ooigire ũũ: 40 “Nĩ atumumarĩtie maitho mao na akomia ngoro ciao, nĩguo matikone na maitho mao kana mataũkĩrũo na ngoro ciao na magarũrũke, na niĩ ndĩmahonie.”+ 41 Isaia ooigire maũndũ macio tondũ nĩ oonire riri wake, na akĩaria ũhoro wake.+ 42 O na kũrĩ ũguo, nginya atongoria aingĩ nĩ maamwĩtĩkirie,+ no nĩ ũndũ wa Afarisai, matiamumbũraga nĩguo matikaingatwo thunagogi-inĩ;+ 43 nĩ gũkorũo meendete gũtũũgĩrio nĩ andũ gũkĩra gũtũũgĩrio nĩ Ngai.+
44 O na kũrĩ ũguo, Jesu akĩanĩrĩra akiuga: “Mũndũ o wothe ũgĩaga na wĩtĩkio harĩ niĩ to harĩ niĩ agĩaga na wĩtĩkio ĩndĩ nĩ nginya harĩ ũrĩa wandũmire;+ 45 na ũrĩa wothe ũnyonaga onaga nginya Ũrĩa wandũmire.+ 46 Njũkĩte thĩinĩ wa thĩ ndariĩ ta ũtheri,+ nĩguo ũrĩa wothe ũrĩgĩaga na wĩtĩkio harĩ niĩ ndagatũũre nduma-inĩ.+ 47 No mũndũ o wothe angĩigua uuge wakwa na age kũwathĩkĩra, ndingĩmũtuĩra; nĩ gũkorũo ndiokire gũtuĩra thĩ, ĩndĩ ndokire kũmĩhonokia.+ 48 Ũrĩa wothe wagaga kũũhe gĩtĩo na akaga kwamũkĩra uuge wakwa nĩ harĩ ũrĩa ũkaamũtuĩra. Kiugo kĩrĩa njarĩtie nĩkĩo gĩkaamũtuĩra mũthenya wa mũthia. 49 Nĩ gũkorũo ndiarĩtie ndĩĩrĩte niĩ mwene, ĩndĩ Awa ũrĩa wandũmire we mwene nĩwe ũũheete rĩathani rĩgiĩ ũhoro ũrĩa nguuga na ũrĩa ngwaria.+ 50 Na nĩ njũĩ atĩ rĩathani rĩake rĩtongoragia muoyo-inĩ wa tene na tene.+ Kwoguo ũndũ o wothe ũrĩa njaragia, ndĩwaragia o ũrĩa Awa anjĩrĩte.+