Ũhoro Mwega Ũrĩa Waandĩkirũo nĩ Luka
23 Nĩ ũndũ ũcio kĩrĩndĩ kĩu gĩgĩũkĩra kĩrĩ gĩothe hamwe, na gĩkĩmũtwara kũrĩ Pilato.+ 2 Gĩkĩambĩrĩria kũmũthitanga+ gĩkiugaga: “Nĩ tuonete mũndũ ũyũ akĩhĩtithia rũrĩrĩ rwitũ, akĩgiragia andũ kũrĩha Kaisari igooti,+ na akiugaga atĩ we mwene nĩ Kristo mũthamaki.”+ 3 Nake Pilato akĩmũũria atĩrĩ: “Wee nĩwe Mũthamaki wa Ayahudi?” Nake akĩmũcokeria: “Wee mwene nĩ woiga.”+ 4 Pilato agĩcoka akĩra anene a athĩnjĩri-Ngai na kĩrĩndĩ kĩu atĩrĩ: “Gũtirĩ ihĩtia ndĩrona harĩ mũndũ ũyũ.”+ 5 No magĩthiĩ na mbere kuuga: “Nĩ acogagĩra andũ kũgerera ũrutani ũrĩa arutanĩte Judea guothe, kuuma o Galili nginya gũkũ.” 6 Rĩrĩa Pilato aaiguire ũguo, akĩũria kana mũndũ ũcio nĩ Mũgalili. 7 Rĩrĩa aamenyire atĩ ooimĩte kũrĩa Herode aathanaga,+ akiuga atwarũo kũrĩ Herode, ũrĩa o nake warĩ Jerusalemu matukũ-inĩ macio.
8 Rĩrĩa Herode oonire Jesu, agĩkena mũno. Kwa ihinda iraya nĩ aakoretwo akĩĩrirĩria kuona Jesu tondũ nĩ aaiguĩte maũndũ maingĩ mamwĩgiĩ,+ na nĩ eerĩgagĩrĩra kuona akĩringa ciama. 9 Nĩ ũndũ ũcio akĩambĩrĩria kũmũũria ciũria nyingĩ, no Jesu ndaamũcokagĩria.+ 10 O na kũrĩ ũguo, anene a athĩnjĩri-Ngai na andĩki-watho maaikaraga makĩrũgamaga makamũthitanga marĩ na marũrũ maingĩ. 11 Nake Herode hamwe na thigari ciake makĩmwĩka maũndũ ma kũmũnyararithia,+ na akĩmũnyũrũria+ na njĩra ya kũmũhumba nguo ya goro, agĩcoka akiuga acokio kũrĩ Pilato. 12 Mũthenya o ro ũcio Herode na Pilato magĩtuĩka arata, nĩ gũkorũo mbere ĩyo maarĩ thũ.
13 Nake Pilato agĩcokanĩrĩria hamwe anene a athĩnjĩri-Ngai, atongoria, na andũ 14 akĩmeera atĩrĩ: “Mũndeheire mũndũ ũyũ atĩ nĩ aracogera andũ matuĩke aregani. No rĩrĩ, niĩ nĩ ndamũhũnga mahũri mbere yanyu na ndinona gĩtũmi o na kĩmwe kĩa maũndũ marĩa mũramũthitangĩra.+ 15 O na Herode ndanona, nĩ gũkorũo oigire acokio kũrĩ ithuĩ, ndarĩ ũndũ ekĩte ũngĩtũma atuĩrũo kũũragwo. 16 Nĩ ũndũ ũcio, ngũmũherithia+ njoke ndĩmuohore.” 17 *—— 18 No kĩrĩndĩ gĩothe gĩkĩanĩrĩra gĩkiuga: “Ũraga mũndũ ũyũ,* ũtuohorere Baraba!”+ 19 (Mũndũ ũcio aaikĩtio njera nĩ ũndũ wa kũregana na thirikari thĩinĩ wa itũũra rĩu na kũũragana.) 20 Pilato akĩmaarĩria o rĩngĩ, tondũ nĩ eendaga kuohora Jesu.+ 21 Nao makĩambĩrĩria kwanĩrĩra makiugaga: “Nĩ acuurio mũtĩ-inĩ! Nĩ acuurio mũtĩ-inĩ!”*+ 22 Riita rĩa gatatũ akĩmeera: “Nĩkĩ? Nĩ ũũru ũrĩkũ mũndũ ũyũ ekĩte? Gũtirĩ ũndũ ndona harĩ we ũngĩtũma oragwo; nĩ ũndũ ũcio ngũmũherithia njoke ndĩmuohore.” 23 Nao maigua ũguo makĩanĩrĩra na mĩgambo mĩnene mategũtigithĩria makiugaga oragwo,* na mĩgambo yao ĩkĩhootana.+ 24 Kwoguo Pilato agĩtua itua rĩa gwĩka ũguo mooigaga. 25 Akĩohora mũndũ ũcio meetagia, ũrĩa waikĩtio njera nĩ ũndũ wa kũregana na thirikari na kũũragana, no akĩneana Jesu ekwo ũrĩa meendaga.
26 Na rĩrĩa maamũtwaraga, makĩnyita mũndũ wa kuuma Kurene wetagwo Simoni akiuma mĩgũnda-inĩ, makĩmũigĩrĩra mũtĩ wa kũnyarirĩrũo* aũkuue arĩ thutha wa Jesu.+ 27 Andũ aingĩ nĩ maamũrũmĩrĩire, hamwe na atumia arĩa maathiaga makĩĩhũũraga nĩ kĩeha na makarĩra nĩ ũndũ wake. 28 Jesu akĩĩhũgũra akĩrora atumia acio akiuga: “Inyuĩ aarĩ a Jerusalemu, tigai kũndĩrĩra. Mwĩrĩrĩrei arĩ inyuĩ na mũrĩrĩre ciana cianyu;+ 29 tondũ matukũ nĩ maroka rĩrĩa andũ makooiga, ‘Gũkena nĩ atumia arĩa thata, nda iria itarĩ ciagĩa mwana na nyondo iria itarĩ ciongwo!’+ 30 Na nĩ magaacoka mambĩrĩrie kwĩra irĩma, ‘Tũgwĩrei!’ o na tũrĩma, ‘Tũhumbĩrei!’+ 31 Angĩkorũo mareka maũndũ macio hĩndĩ ĩrĩa mũtĩ ũrĩ mũigũ-rĩ, gũgathiĩ atĩa rĩrĩa ũkooma?”
32 Ningĩ kwarĩ na arũme erĩ maarĩ eki-naĩ, arĩa o nao maatwaragwo moragwo hamwe nake.+ 33 Na rĩrĩa maakinyire kũndũ gwĩtagwo Ihĩndĩ rĩa Kĩongo,+ makĩmũhũũrĩra mũtĩ-inĩ na mĩcumarĩ kũu hamwe na eki-naĩ acio, ũmwe mwena wake wa ũrĩo nake ũcio ũngĩ mwena wake wa ũmotho.+ 34 No Jesu ooigaga atĩrĩ: “Awa, mohere, nĩ gũkorũo matiramenya ũrĩa mareka.” Makĩria ma ũguo, magĩcuka mĩtĩ nĩguo magayane nguo ciake.+ 35 Nao andũ maarũgamĩte meroreire. No atongoria nĩ maamũnyiiraga makiugaga: “Nĩ arahonokagia arĩa angĩ; rĩu nĩ ehonokie angĩkorũo nĩwe Kristo wa Ngai, Ũrĩa Mũthuure.”+ 36 Nginya thigari nĩ ciamũnyũrũragia, igĩthiaga harĩ we na ikamũhe ndibei ngagatu+ 37 ikĩmwĩraga ũũ: “Angĩkorũo wee nĩwe Mũthamaki wa Ayahudi-rĩ, wĩhonokie.” 38 Na igũrũ rĩake nĩ haarĩ na maandĩko mooigĩte atĩrĩ: “Ũyũ nĩwe Mũthamaki wa Ayahudi.”+
39 Na ũmwe wa eki-naĩ acio maacuurĩtio hau akĩambĩrĩria kũmũnyũrũria+ akiugaga: “Githĩ wee tiwe Kristo? Wĩhonokie na ũtũhonokie o na ithuĩ!” 40 Nake ũcio ũngĩ akĩmũkũũma akĩmwĩra atĩrĩ: “Kaĩ ũtaretigĩra Ngai o na hanini, kuona atĩ ũramũkĩra ituĩro rĩmwe na mũndũ ũyũ? 41 Ithuĩ tũramũkĩra ituĩro rĩrĩa rĩtwagĩrĩire nĩ ũndũ wa maũndũ marĩa twĩkĩte, no gũtirĩ ũndũ o na ũmwe mũũru mũndũ ũyũ ekĩte.” 42 Agĩcoka akiuga ũũ: “Jesu, ũkaandirikana rĩrĩa ũkaaingĩra thĩinĩ wa Ũthamaki waku.”+ 43 Nake akĩmwĩra: “Ũmũthĩ ndakwĩra atĩrĩ na ma, nĩ ũgaakorũo hamwe na niĩ thĩinĩ wa Paradiso.”+
44 Gũkinyĩria hĩndĩ ĩyo kwarĩ ta thaa thita cia mũthenya, no gũkĩgĩa nduma bũrũri-inĩ ũcio wothe nginya ta thaa kenda cia mũthenya,+ 45 tondũ ũtheri wa riũa nĩ wathirire; nakĩo gĩtaama kĩa harĩa hatheru+ gĩgĩtarũka na gatagatĩ kuuma igũrũ nginya thĩ.+ 46 Nake Jesu akĩanĩrĩra na mũgambo mũnene akiuga ũũ: “Awa, roho wakwa nĩ ndaũiga moko-inĩ maku.”+ Arĩkia kuuga ũguo, agĩtuĩkana.*+ 47 Na rĩrĩa mũnene wa mbũtũ oonire ũguo, akĩambĩrĩria kũgooca Ngai akiugaga: “Mũndũ ũyũ nĩ ma ararĩ mũthingu.”+ 48 Na rĩrĩa andũ arĩa othe maagomanĩte hau kwĩrorera moonire maũndũ marĩa maahaanĩkire, makĩinũka makĩĩhũũrahũũraga ithũri ciao. 49 Nao andũ othe arĩa maamenyanĩte nake maarũgamĩte handũ haraya. Ningĩ atumia arĩa maatwaranĩte nake kuuma Galili maarĩ hau na nĩ meeyoneire maũndũ macio.+
50 Na rĩrĩ, nĩ kwarĩ na mũndũ wetagwo Jusufu, warĩ mũthuri wa Kĩama, na aarĩ mũndũ mwega na mũthingu.+ 51 (Mũndũ ũcio ndaanyitĩte mbaru* wara wao na gĩĩko kĩao.) Ooimĩte itũũra rĩa andũ a Judea rĩtagwo Arimathea, na nĩ eetereire Ũthamaki wa Ngai. 52 Akĩingĩra kũrĩ Pilato akĩhoya anengerũo mwĩrĩ wa Jesu. 53 Akĩũcuurũria+ na akĩũthaya na gĩtambaya gĩa gatani ĩrĩa njega, akĩũiga mbĩrĩra-inĩ* yenjetwo rwaro-inĩ rwa ihiga,+ ĩrĩa gũtarĩ mũndũ wakoretwo aigĩtwo thĩinĩ wayo. 54 Na rĩrĩ, kwarĩ mũthenya wa Kũhaarĩria,+ na Thabatũ+ yarĩ hakuhĩ kwambĩrĩria. 55 No atumia arĩa maatwaranĩte nake kuuma Galili o nao magĩthiĩ, magĩcũthĩrĩria mbĩrĩra-inĩ* na makĩona ũrĩa mwĩrĩ wake wakometio,+ 56 na magĩcoka nĩguo makahaarĩrie mahuti marĩa manungaga wega na maguta manungi wega. No makĩhurũka mũthenya wa Thabatũ+ kũringana na ũrĩa gwaathanĩtwo.