Ũhoro Mwega Ũrĩa Waandĩkirũo nĩ Mathayo

22 Jesu akĩmaarĩria o rĩngĩ na ngerekano, akĩmeera ũũ: 2 “Ũthamaki wa igũrũ no ũhaananio na mũthamaki wahaarĩirie iruga rĩa ũhiki+ wa mũrũwe. 3 Na agĩtũma ngombo ciake igeete arĩa maanyitĩtwo ũgeni iruga-inĩ rĩu rĩa ũhiki, no matieendaga gũka.+ 4 Ningĩ agĩtũma ngombo ingĩ agĩciĩra, ‘Thiĩi mwĩre arĩa manyitĩtwo ũgeni ũũ: “Nĩ haarĩirie iruga rĩakwa, ngathĩnja ndegwa na nyamũ ciakwa iria norie, na maũndũ mothe nĩ mahaarĩrie. Ũkai iruga-inĩ rĩa ũhiki.”’ 5 No andũ acio makĩaga gũtindanĩra, ũmwe agĩthiĩ mũgũnda-inĩ wake, ũngĩ agĩthiĩ biacara-inĩ yake;+ 6 nao acio angĩ makĩnyita ngombo icio ciake, magĩcinyarira na magĩciũraga.

7 “Mũthamaki akĩrakara, agĩtũma mbũtũ ciake, ikĩũraga oragani acio na igĩcina itũũra rĩao.+ 8 Agĩcoka akĩra ngombo ciake atĩrĩ, ‘Iruga rĩa ũhiki nĩ rĩhaarĩrie, no arĩa maranyitĩtwo ũgeni matinaagĩrĩra.+ 9 Kwoguo thiĩi barabara-inĩ iria itonyete itũũra-inĩ, mwĩte mũndũ ũrĩa wothe mũkuona oke iruga-inĩ rĩa ũhiki.’+ 10 Nĩ ũndũ ũcio, ngombo icio igĩthiĩ barabara-inĩ igĩta andũ arĩa othe cioonire, oru na ega; na nyũmba ĩrĩa yekagĩrũo ũhiki ĩkĩiyũra ageni.*

11 “Rĩrĩa mũthamaki aatonyire kũrora ageni, akĩona mũndũ ũteehumbĩte nguo ya ũhiki. 12 Nĩ ũndũ ũcio akĩmũũria, ‘Mũndũ ũyũ, ũtonyire gũkũ atĩa ũtehumbĩte nguo ya ũhiki?’ Nake akĩaga wa kuuga. 13 Mũthamaki agĩcoka akĩra ndungata ciake atĩrĩ, ‘Muohei moko na magũrũ na mũmũikie nja nduma-inĩ. Kũu nĩkuo ekũrĩrĩra na ahagaranie magego.’

14 “Nĩ gũkorũo arĩa metĩtwo nĩ aingĩ, no arĩa mathuurĩtwo nĩ anini.”

15 Nao Afarisai magĩthiĩ magĩciira nĩguo mamũtege na mĩario yake.+ 16 Kwoguo magĩtũma arutwo ao hamwe na arũmĩrĩri a kĩama kĩa Herode,+ makĩmwĩra ũũ: “Mũrutani, nĩ tũĩ atĩ waragia ma na ũkarutana njĩra ya Ngai na ma, na ndũcaragia ũrĩa ũngĩtĩkĩrĩka nĩ mũndũ o na ũrĩkũ, tondũ ndũroraga ũrĩa andũ matariĩ na nja. 17 Nĩ ũndũ ũcio-rĩ, ta twĩre atĩrĩ, ũkuona atĩa? Hihi nĩ kwagĩrĩire kũrĩha Kaisari igooti kana gũtiagĩrĩire?” 18 No Jesu amenya mwĩcirĩrie wao mũũru, akĩmeera ũũ: “Hinga ici, nĩ kĩĩ kĩratũma mũngerie? 19 Ta nyoniai thendi ĩrĩa mũrĩhaga igooti nayo.” Nao makĩmũrehera dinari.* 20 Nake akĩmoria atĩrĩ: “Mbica ĩno na maandĩko maya nĩ cia ũ?” 21 Nao makĩmũcokeria ũũ: “Nĩ cia Kaisari.” Nake akĩmeera: “Nĩ ũndũ ũcio-rĩ, rĩhai Kaisari indo cia Kaisari, no indo cia Ngai mũrĩhe Ngai.”+ 22 Rĩrĩa maaiguire ũguo, makĩgega na magĩtigana nake magĩthiĩ.

23 Mũthenya ũcio Asadukai, arĩa moigaga atĩ andũ matikaariũkio,+ magĩthiĩ kũrĩ we makĩmũũria ũũ:+ 24 “Mũrutani, Musa ooigire atĩrĩ: ‘Mũndũ o wothe angĩkua atagĩĩte ciana, no mũhaka mũrũ wa nyina ahikie mũtumia wake aciarĩre mũrũ wa nyina ciana.’*+ 25 Rĩu-rĩ, kwarĩ na ariũ mũgwanja a nyina ũmwe maarĩ hamwe na ithuĩ. Wa mbere akĩhikania no agĩkua atagĩĩte ciana,* na agĩtigĩra mũrũ wa nyina mũtumia ũcio wake. 26 Gũgĩthiĩ o ta ũguo harĩ wa kerĩ na wa gatatũ o nginya wa mũgwanja. 27 Mũthia-inĩ, mũtumia ũcio o nake agĩkua. 28 Hĩndĩ ĩrĩa andũ makaariũkio-rĩ, agaatuĩka mũtumia wa ũ harĩ acio mũgwanja? Nĩ gũkorũo nĩ aatuĩkĩte mũtumia wao othe.”

29 Nake Jesu akĩmeera: “Inyuĩ nĩ mũhĩtĩtie, tondũ mũtiũĩ Maandĩko o na kana hinya wa Ngai;+ 30 nĩ gũkorũo hĩndĩ ĩrĩa andũ makaariũkio, matikahikanagia kana kũhika, no magaakorũo matariĩ ta araika arĩa marĩ igũrũ.+ 31 Ha ũhoro wĩgiĩ kũriũkio kwa arĩa makuĩte-rĩ, kaĩ mũtathomete ũrĩa mwerirũo nĩ Ngai rĩrĩa ooigire ũũ: 32 ‘Niĩ nĩ niĩ Ngai wa Iburahimu na Ngai wa Isaaka na Ngai wa Jakubu’?+ We ti Ngai wa arĩa makuĩte, no nĩ wa arĩa marĩ muoyo.”+ 33 Kĩrĩndĩ kĩaigua ũguo, gĩkĩgegio nĩ ũrutani wake.+

34 Thutha wa Afarisai kũigua atĩ nĩ aatooretie Asadukai na mĩario, magĩthiĩ kũrĩ we marĩ gĩkundi kĩmwe. 35 Na mũndũ ũmwe gatagatĩ-inĩ kao woĩ Watho wega akĩmũũria ũũ nĩguo amũgerie: 36 “Mũrutani, rĩathani rĩrĩa inene mũno thĩinĩ wa Watho nĩ rĩrĩkũ?”+ 37 Akĩmũcokeria atĩrĩ: “‘No mũhaka wende Jehova* Ngai waku na ngoro yaku yothe na muoyo* waku wothe na meciria maku mothe.’+ 38 Rĩu nĩrĩo rĩathani rĩrĩa inene mũno na rĩa mbere. 39 Rĩa kerĩ rĩtariĩ o ta rĩu, na nĩrĩo rĩrĩ: ‘No mũhaka wende mũndũ ũrĩa mũriganĩtie nake o ta ũrĩa wĩyendete wee mwene.’+ 40 Watho wothe hamwe na ciugo cia Anabii ciĩhocetie harĩ maathani macio merĩ.”+

41 Na rĩrĩ, hĩndĩ ĩyo Afarisai moonganĩte hamwe-rĩ, Jesu akĩmoria atĩrĩ:+ 42 “Mũgwĩciria atĩa ũhoro-inĩ wĩgiĩ Kristo? Nĩ mũrũ wa ũ?” Nao makĩmũcokeria: “Nĩ wa Daudi.”+ 43 Nake akĩmoria: “Na nĩ kĩĩ gĩatũmire Daudi atongoretio nĩ roho+ amwĩte Mwathani, akoiga, 44 ‘Jehova* nĩ eerire Mwathani wakwa ũũ: “Ikara thĩ guoko-inĩ gwakwa kwa ũrĩo nginya rĩrĩa ngaaiga thũ ciaku rungu rwa magũrũ maku”’?+ 45 Angĩkorũo Daudi amwĩtĩte Mwathani-rĩ, akĩrĩ mũrũ wake atĩa?”+ 46 Na gũtirĩ mũndũ wahotire kũmũcokeria ũndũ, o na gũtirĩ wageririe kũmũũria kĩũria rĩngĩ kuuma mũthenya ũcio.