Thaburi
Rwĩmbo rwa mũthenya wa Thabatũ.
92 Nĩ wega gũcokeria Jehova ngatho+
Na kũina nyĩmbo cia kũgooca rĩĩtwa rĩaku, wee Ũrĩa ũrĩ Igũrũ Mũno,
2 Kũmenyithania wendo waku mwĩhokeku+ rũcinĩ
Na wĩhokeku waku ũtukũ,
3 Gũkĩhũũragwo kĩnanda kĩa ndigi ikũmi o na kĩnanda kĩa ndigi,
Na mũgambo mwega wa kĩnanda kĩa mũgeeto.+
4 Nĩ gũkorũo nĩ ũtũmĩte ngene, wee Jehova, nĩ ũndũ wa ciĩko ciaku;
Ndĩranĩrĩra ngenete tondũ wa mawĩra ma moko maku.
5 Atĩrĩrĩ Jehova, kaĩ mawĩra maku nĩ manene-ĩ!+
Namo meciria maku-rĩ, kaĩ nĩ marikĩru mũno-ĩ!+
6 Gũtirĩ mũndũ ũtarĩ wĩcirio ũngĩmamenya;
Na gũtirĩ mũndũ mũkĩgu ũngĩtaũkĩrũo nĩ ũndũ ũyũ:+
7 Rĩrĩa andũ arĩa aganu mathundũka ta ria*
Na arĩa othe mekaga maũndũ moru magaacĩra,
Gĩtũmi nĩgetha maniinwo tene na tene.+
8 No wee Jehova ũtũũraga ũtũũgĩrĩte tene na tene.
9 Atĩrĩrĩ Jehova, wĩrorere thũ ciaku ikĩhootwo,
Wĩrorere ũrĩa thũ ciaku igũthira;
Arĩa othe mekaga maũndũ moru nĩ mekũhurunjwo.+
10 No wee nĩ ũgũtũũgĩria hinya wakwa ũhaane* ta wa ndegwa ya gĩthaka;
Nĩ ngũhaka ngothi yakwa maguta marĩa mega mũno.+
11 Maitho makwa nĩ mekwĩrorera thũ ciakwa ikĩhootwo;+
Matũ makwa nĩ mekũigua ũhoro wa kũgwa kwa andũ aganu arĩa matharĩkagĩra.
12 Ĩndĩ andũ arĩa athingu marĩgaacagĩra o ta mũtĩ wa mũkĩndũ
Na makaneneha o ta mũtarakwa wa Lebanoni.+
13 Mahandĩtwo thĩinĩ wa nyũmba ya Jehova;
Magaacagĩra marĩ kũu nja-inĩ cia Ngai witũ.+
14 O na marĩ akũrũ-rĩ,* no makaagaacagĩra;+
Magaakoragwo na hinya* na marĩ aruru,+
15 Makĩmenyithanagia atĩ Jehova nĩ mũrũngĩrĩru.
Nĩwe Rwaro Rwakwa rwa Ihiga,+ na thĩinĩ wake ndakoragwo na ũndũ ũtarĩ wa ũthingu.