Malaki
3 “Atĩrĩrĩ, nĩ ngũtũma mũtũmwo wakwa, na nĩ egũthiĩ mbere yakwa nĩguo athondeke* njĩra.+ Na o rĩmwe Mwathani ũrĩa wa ma, o ũcio mũcaragia, nĩ agooka hekarũ-inĩ yake;+ na mũtũmwo wa kĩrĩkanĩro nĩ agooka, o ũcio mũkenagĩra. Atĩrĩrĩ, hatarĩ nganja nĩ agooka,” ũguo nĩguo Jehova mũnene wa ita ekuuga.
2 “No hihi nũũ ũgeetiiria mũthenya wa gũka gwake, na nũũ ũkaahota kwĩhanda hĩndĩ ĩrĩa akooneka? Tondũ agaakorũo atariĩ ta mwaki wa mũtwekia wa cuma na ta thabuni+ wa athambia a nguo. 3 Na nĩ agaaikara thĩ o ta mũtwekia na mũtheria wa betha+ na atherie ariũ a Lawii; na nĩ akaamatheria o ta thahabu na betha, nao hatarĩ nganja magaatuĩka andũ mararutĩra Jehova igongona marĩ na ũthingu. 4 Na igongona rĩa Juda na rĩa Jerusalemu nĩ rĩgaakenia Jehova, o ta matukũ-inĩ ma tene na o ta mĩaka-inĩ ya tene.+
5 “Nĩ ngaamũkuhĩrĩria nĩguo ndĩmũciirithie, na nĩ ngaahiũha nĩguo ndute ũira wa gũthitanga arogi,+ gũthitanga itharia, gũthitanga arĩa mehĩtaga mĩĩhĩtwa ya maheeni,+ gũthitanga arĩa mahinyagĩrĩria mũruti wĩra wa mũcara,+ mũtumia wa ndigwa, na mwana ũrĩa ũtarĩ ithe,*+ na gũthitanga arĩa maregaga gũteithia* mũndũ wa kũngĩ.+ Andũ acio matinjĩtigĩrĩte,” ũguo nĩguo Jehova mũnene wa ita ekuuga.
6 “Tondũ niĩ nĩ niĩ Jehova; niĩ ndigarũrũkaga.*+ Na inyuĩ mũrĩ ariũ a Jakubu; mũtirĩ mũrakinya mũico wanyu. 7 Kuuma matukũ-inĩ ma maithe manyu ma tene nĩ mũtiganĩte na mawatho makwa na mũkarega kũmarũmĩrĩra.+ Njokererai, na niĩ nĩ ngũmũcokerera,”+ ũguo nĩguo Jehova mũnene wa ita ekuuga.
No inyuĩ muugaga ũũ: “Tũgũgũcokerera atĩa?”
8 “Hihi mũndũ no atunye Ngai? No inyuĩ nĩ mũndunyaga.”
Na muugaga atĩrĩ: “Tũgũtunyĩte na njĩra ĩrĩkũ?”
“Ũhoro-inĩ wĩgiĩ icunjĩ cia ikũmi na mĩhothi. 9 Hatarĩ nganja mũrĩ andũ arume,* tondũ nĩ mũndunyaga—ti itherũ, rũrĩrĩ ruothe nĩ rwĩkaga ũguo. 10 Rehei gĩcunjĩ gĩa ikũmi gĩothe ikũmbĩ-inĩ,+ nĩgetha gũkorũo na irio thĩinĩ wa nyũmba yakwa;+ na mũngerie ũhoro-inĩ ũcio, muone kana ndikũmũhingũrĩra ihingo cia igũrũ+ ndĩmũitũrũrĩre* kĩrathimo nginya gũtuĩke atĩ gũtirĩ kĩndũ kĩraga,”+ ũguo nĩguo Jehova mũnene wa ita ekuuga.
11 “Na nĩ ngaakaania kĩrĩa gĩtamburaga* nĩ ũndũ wanyu, na gĩtikaananga maciaro ma bũrũri wanyu, o na kana mũthabibũ ũrĩa ũrĩ mũgũnda wage maciaro,”+ ũguo nĩguo Jehova mũnene wa ita ekuuga.
12 “No mũhaka ndũrĩrĩ ciothe ikaamwĩta andũ akenu,+ tondũ mũgaatuĩka bũrũri wa kũrehe gĩkeno,” ũguo nĩguo Jehova mũnene wa ita ekuuga.
13 “Ciugo cianyu cia kũnjũkĩrĩra ikoretwo irĩ nditũ,” ũguo nĩguo Jehova ekuuga.
Na muugaga ũũ: “Nĩ maũndũ marĩkũ tuugĩte gatagatĩ-inĩ gaitũ ma gũgũũkĩrĩra?”+
14 “Muugaga atĩrĩ, ‘Gũtungatĩra Ngai gũtirĩ bata.+ Tũgunĩkĩte atĩa nĩ ũndũ wa kũhingia maũndũ marĩa endaga twĩke o hamwe na gũthiaga mbere ya Jehova mũnene wa ita tũrĩ na kĩeha? 15 Rĩu tuonaga andũ arĩa eĩkĩrĩri marĩ akenu. Ningĩ arĩa mamenyerete gwĩka maũndũ ma waganu nĩ magaacĩrĩte.+ Nĩ mageragia Ngai mategwĩtigĩra na gũtirĩ ũndũ mũũru monaga.’”
16 Hĩndĩ ĩyo, arĩa metigĩrĩte Jehova nĩ maaranĩirie mũndũ na ũrĩa ũngĩ, o mũndũ na mũratawe, na Jehova agĩthiĩ na mbere gũtega gũtũ na gũthikĩrĩria. Na ibuku rĩa kĩririkano rĩkĩandĩkwo mbere yake+ nĩ ũndũ wa arĩa metigĩrĩte Jehova na arĩa mecũranagia igũrũ rĩgiĩ* rĩĩtwa rĩake.+
17 Jehova mũnene wa ita oigĩte atĩrĩ, “Nĩ magaatuĩka akwa,+ mũthenya ũrĩa ngaatũma kũgĩe na kĩndũ kĩa mwanya.*+ Nĩ ngaamacaĩra, o ta ũrĩa mũndũ acayagĩra mũriũ wake ũrĩa ũmũtungatagĩra.+ 18 Na o rĩngĩ nĩ mũkoona ngũrani gatagatĩ ka mũndũ mũthingu na mũndũ mwaganu,+ gatagatĩ ka ũrĩa ũtungatagĩra Ngai na ũrĩa ũtamũtungatagĩra.”