Ũhoro Mwega Ũrĩa Waandĩkirũo nĩ Luka
12 O hĩndĩ ĩyo, rĩrĩa kĩrĩndĩ kĩa andũ ngiri nyingĩ kĩagomanĩte hamwe nginya gĩkinyanganage, akĩamba kwĩra arutwo ake atĩrĩ: “Mwĩmenyererei ndawa ya kũimbia ya Afarisai, nĩyo ũhinga.+ 2 No gũtirĩ ũndũ mũhithe biũ ũtakaguũrio, na gũtirĩ hitho ĩtakamenyeka.+ 3 Nĩ ũndũ ũcio-rĩ, ũndũ o wothe ũrĩa muugaga mũrĩ nduma-inĩ ũkaaiguo ũtheri-inĩ, naguo ũrĩa mũheehanagĩrĩra rumu-inĩ cia thĩinĩ nĩ ũkaahunjio kuuma nyũmba igũrũ. 4 Ningĩ ngũmwĩra atĩrĩ arata akwa,+ mũtigetigĩre arĩa moragaga mwĩrĩ na thutha ũcio gũtirĩ ũndũ ũngĩ mangĩhota gwĩka.+ 5 No nĩ ngũmwĩra nũũ mwagĩrĩirũo nĩ gwĩtigĩra: Mwĩtigĩrei Ũrĩa ũrĩ na hinya wa gũikia mũndũ Jehanamu* thutha wa kũmũũraga.+ Ĩni, ngũmwĩra atĩrĩ, mwĩtigagĩrei Ũcio.+ 6 Githĩ tũnyoni tũtano tũtiendagio tũthendi twĩrĩ twa thogora mũnini?* No gũtirĩ o na kamwe ga tuo Ngai ariganagĩrũo nĩko.*+ 7 Ĩndĩ nginya njuĩrĩ cia mĩtwe yanyu ciothe ikoragwo itarĩtwo.+ Mũtigetigĩre; inyuĩ mũrĩ a bata gũkĩra tũnyoni tũingĩ.+
8 “Ngũmwĩra atĩrĩ, mũndũ ũrĩa wothe ũnyumbũraga mbere ya andũ,+ Mũrũ wa mũndũ nĩ akaamumbũra mbere ya araika a Ngai.+ 9 No mũndũ wothe ũkaangaana mbere ya andũ nĩ agaakaanwo mbere ya araika a Ngai.+ 10 Na mũndũ o wothe waragia ũũru igũrũ rĩa Mũrũ wa mũndũ, nĩ akooherũo, no ũrĩa wothe ũrumaga roho mũtheru ndakooherũo.+ 11 Rĩrĩa makaamũtwara mbere ya igomano cia mũingĩ,* anene a thirikari, na athani, mũtikanatangĩke mũgĩciria njĩra ĩrĩa mũgwĩtetera nayo kana ũrĩa mũkuuga,+ 12 nĩ gũkorũo roho mũtheru nĩ ũkaamũruta o hĩndĩ ĩyo maũndũ marĩa mwagĩrĩirũo nĩ kuuga.”+
13 Hĩndĩ ĩyo mũndũ ũmwe warĩ thĩinĩ wa kĩrĩndĩ akĩmwĩra atĩrĩ: “Mũrutani, ĩra mũrũ wa maitũ tũgayane igai ritũ.” 14 Nake akĩmwĩra: “Mũndũ ũyũ, nũũ ũnduĩte mũtuanĩri ciira kana mũtuithania wanyu inyuerĩ?” 15 Agĩcoka akĩmeera: “Ikaragai mũhingũrĩtie maitho manyu na mwĩmenyagĩrĩre ũkoroku wa* mĩthemba yothe,+ tondũ o na rĩrĩa mũndũ arĩ na ũingĩ, muoyo wake nduumanaga na indo iria arĩ nacio.”+ 16 Nĩ ũndũ ũcio akĩmahe ngerekano, akiuga: “Mũgũnda wa mũndũ ũmwe warĩ mũtongu nĩ waciarire wega. 17 Kwoguo akĩambĩrĩria kwĩĩra na ngoro atĩrĩ, ‘Rĩu ngwĩka atĩa na ndirĩ na kũndũ gwa gũcokanĩrĩria magetha makwa?’ 18 Agĩcoka akiuga atĩrĩ, ‘Ngwĩka ũũ:+ Ngũtharia makũmbĩ makwa njake mangĩ manene makĩria, na kũu nĩkuo ngũcokanĩrĩria irio ciakwa na indo ciakwa ciothe, 19 njoke ndĩĩre atĩrĩ: “Ũrĩ na indo nyingĩ njega wĩigĩire cia kũhũthĩra mĩaka mĩingĩ; hurũka, ũrĩe na ũnyue na wĩgangare.”’ 20 No Ngai akĩmwĩra, ‘Kĩrimũ gĩkĩ, ũtukũ ũyũ nĩ marenda gũkũruta muoyo.* Indo iria wĩigĩire-rĩ, igũgĩtuĩka cia ũ?’+ 21 Ũguo noguo gũthiaga harĩ mũndũ ũrĩa wĩigagĩra mũthithũ nĩ ũndũ wake mwene no ti mũtongu maitho-inĩ ma Ngai.”+
22 Agĩcoka akĩra arutwo ake atĩrĩ: “Nĩkĩo ngũmwĩra, tigai gũtangĩkĩra mĩoyo* yanyu ũhoro-inĩ wĩgiĩ kĩrĩa mũkũrĩa kana gũtangĩkĩra mĩĩrĩ yanyu ũhoro-inĩ wĩgiĩ kĩrĩa mũkwĩhumba.+ 23 Nĩ gũkorũo muoyo* nĩ wa bata gũkĩra irio na mwĩrĩ nĩ wa bata gũkĩra nguo. 24 Mwĩciriei ũhoro wa mahuru: Matihandaga mbegũ kana makagetha; matirĩ nyũmba cia kũiga irio kana makũmbĩ; ĩndĩ Ngai nĩ amaheaga gĩa kũrĩa.+ Githĩ inyuĩ mũtikĩrĩ a bata makĩria gũkĩra nyoni?+ 25 Nũũ gatagatĩ-inĩ kanyu ũngĩhota kuongerera mũkono* ũmwe harĩ ũtũũro wake nĩ ũndũ wa gwĩtangĩkĩra? 26 Na angĩkorũo mũtingĩhota gwĩka kaũndũ kanini ta kau-rĩ, mũragĩtangĩka nĩ ũndũ wa maũndũ macio mangĩ nĩkĩ?+ 27 Mwĩciriei ũrĩa mahũa ma itoka makũraga: Matiĩnogagia kana makogotha ndigi; no ngũmwĩra atĩrĩ, o na Suleimani na riri wake wothe ndaagemete ta rĩmwe rĩamo.+ 28 Rĩu-rĩ, angĩkorũo ũguo nĩguo Ngai ahumbaga mĩmera ya werũ-inĩ ĩrĩa ĩkoragwo ho ũmũthĩ na rũciũ ĩgaikio riiko-rĩ, githĩ inyuĩ ndarĩkĩmũhumbaga o na makĩria, inyuĩ mũrĩ na wĩtĩkio mũnini! 29 Nĩ ũndũ ũcio tigai gũcaria kĩrĩa mũkũrĩa na kĩrĩa mũkũnyua, na mũtige gwĩtanga mũno;+ 30 tondũ maũndũ macio mothe nĩmo ndũrĩrĩ cia thĩ ithingataga na kĩyo, ĩndĩ Ithe wanyu nĩ oĩ nĩ mũbataraga maũndũ macio.+ 31 Ithenya rĩa ũguo, caragiai Ũthamaki wake, namo maũndũ macio nĩ mũrĩongagĩrĩrũo.+
32 “Mũtigetigĩre inyuĩ karũũru kanini,+ tondũ Ithe wanyu nĩ onete arĩ wega kũmũhe Ũthamaki.+ 33 Endiai indo cianyu na mũheane iheo cia tha.*+ Mwĩthondekerei tũmondo twa mbeca tũrĩa tũtakũraga, mũthithũ ũrĩa ũtabuthaga kũrĩa igũrũ,+ kũu gũtarĩ mũici ũngĩkuhĩrĩria na gũtarĩ memenyi cingĩrĩa. 34 Nĩ gũkorũo harĩa mũthithũ wanyu ũrĩ, hau nĩho ngoro cianyu o nacio irĩkoragwo.
35 “Ikaragai mwĩhumbĩte na mwĩhaarĩirie*+ na mũgwatĩtie matawa manyu,+ 36 mwagĩrĩirũo gũkorũo mũtariĩ ta andũ metereire mwathi wao acoke+ kuuma ũhiki-inĩ,+ nĩguo rĩrĩa arĩũka na aringaringe, mamũhingũrĩre o rĩo. 37 Gũkena nĩ ngombo icio rĩrĩa mwathi wacio arĩcoka acikore ciĩiguĩte! Ngũmwĩra atĩrĩ na ma, akeehumba* nĩguo atungate na aciĩre ciikare metha-inĩ na oke harĩ cio acitungatĩre. 38 Na angĩũka ituanĩra-inĩ rĩa kerĩ,* kana o na ituanĩra-inĩ rĩa gatatũ,* na acikore ciĩhaarĩirie, gũkena nĩcio! 39 No menyai ũndũ ũyũ, korũo mwene nyũmba nĩ aamenyete ithaa rĩrĩa mũici egũka, ndangĩarekire nyũmba yake ĩbunjwo.+ 40 O na inyuĩ ikarai mwĩhaarĩirie, nĩ gũkorũo ithaa rĩrĩa mũtarecirĩria-rĩ, nĩrĩo Mũrũ wa mũndũ egũka.”+
41 Petero agĩcoka akĩmũũria: “Mwathani, hihi ngerekano ĩno nĩ ithuĩ ũrera kana nĩ nginya andũ arĩa angĩ othe?” 42 Nake Mwathani akiuga: “Nũũ kũna mũramati* ũrĩa mwĩhokeku na mũũgĩ, ũrĩa mwathi wake akaamũra arũgamĩrĩre ndungata ciake* nĩguo aciheage rwĩga rwacio rwa irio rwa gũciigana ihinda rĩrĩa rĩagĩrĩire?+ 43 Gũkena nĩ ngombo ĩyo mwathi wayo angĩgooka amĩkore ĩgĩka ũguo! 44 Ngũmwĩra atĩrĩ na ma, nĩ akaamĩamũra ĩrũgamĩrĩre indo ciake ciothe. 45 No ngombo ĩyo ĩngĩkeĩra na ngoro atĩrĩ, ‘Mwathi wakwa ndaroka narua,’ na yambĩrĩrie kũhũũra ndungata cia arũme na cia atumia na kũrĩa na kũnyua na kũrĩĩo,+ 46 mwathi wa ngombo ĩyo agooka mũthenya ũrĩa ĩterĩgĩrĩire na ithaa rĩrĩa ĩtaramenya, na nĩ akaamĩherithia iherithia inene na amĩturanĩre hamwe na arĩa matarĩ ehokeku. 47 Nayo ngombo ĩrĩa yataũkĩirũo nĩ wendi wa mwathi wayo no ndĩigana kwĩhaarĩria kana gwĩka ũrĩa aamĩathĩte* nĩ akaamĩhũũra iboko nyingĩ.+ 48 No ĩrĩa ĩtaataũkĩirũo no ĩgĩka maũndũ mangĩtũma ĩhũũrũo, ĩkaahũũrũo iboko nini. Ũrĩa kũrĩ nĩ atĩ, mũndũ o wothe waheirũo maũndũ maingĩ, noguo akoorio maũndũ maingĩ, nake ũrĩa wehokeirũo kũrũgamĩrĩra maũndũ maingĩ, nĩ akoorio maũndũ maingĩ makĩria.+
49 “Niĩ ndokire gwakia mwaki gũkũ thĩ, na ingĩkĩenda ũndũ ũngĩ ũrĩkũ angĩkorũo nĩ ũrĩkĩtie kũgwata? 50 Hatarĩ nganja, harĩ ũbatithio ũrĩa ngũbatithio naguo, no kaĩ nĩ ndangĩkĩte mũno nginya rĩrĩa ũkaarĩka-ĩ!+ 51 Hihi mũgwĩciria ndokire kũrehe thayũ gũkũ thĩ? Aca tiguo, no ngũmwĩra atĩrĩ, ndokire kũrehe ngayũkano.+ 52 Tondũ kuuma rĩu, kũrĩkoragwo na andũ atano a mũciĩ ũmwe marĩ na ngayũkano, atatũ magokĩrĩra erĩ, na erĩ magokĩrĩra atatũ. 53 Marĩgayũkanaga, mũthuri agokĩrĩra mũrũ wake na mũriũ agokĩrĩra ithe, mũtumia agokĩrĩra mwarĩ na mũirĩtu agokĩrĩra nyina, nyaciara agokĩrĩra mũtumia wa mũrũwe na mũtumia wa mũriũ agokĩrĩra nyaciarawe.”+
54 Ningĩ agĩcoka akĩra kĩrĩndĩ atĩrĩ: “Rĩrĩa muona itu rĩkiumĩra mwena wa ithũĩro-rĩ, o rĩmwe muugaga, ‘Nĩ gũkũgĩa kĩhuhũkanio,’ na noguo gũtuĩkaga. 55 Na rĩrĩa muona rũhuho rwa mwena wa mũhuro rũkĩhurutana, muugaga, ‘Nĩ gũkũgĩa ũrugarĩ,’ na noguo gũtuĩkaga. 56 Inyuĩ hinga ici, nĩ mũmenyaga gũkũũrana ũrĩa thĩ na matu-inĩ gũtariĩ, no nĩ kĩĩ kĩgiragia mũmenye gũkũũrana ũhoro wa ihinda rĩrĩ?+ 57 Ningĩ-rĩ, mwagaga gũtua inyuĩ ene maũndũ marĩa ma ũthingu nĩkĩ? 58 Kwa mũhaano-rĩ, rĩrĩa ũrathiĩ kũrĩ mũtongoria hamwe na mũndũ ũrĩa ũgũthitangĩte, wĩrutanĩrie kũiguithania nake o mũrĩ njĩra-inĩ nĩguo ndagagũtware kũrĩ mũtuanĩri ciira, nake mũtuanĩri ciira akũneane kũrĩ mũthigari wa igooti, nake mũthigari wa igooti agũikie njera.+ 59 Ngũkwĩra atĩrĩ, ndũrĩ hĩndĩ ũkooima kuo o nginya ũkaarĩha gathendi gaku ka mũthia.”*