Maũndũ Marĩa Meekirũo nĩ Atũmwo
17 Ningĩ magĩtuĩkanĩria Amfipoli na Apolonia, magĩkinya Thesalonike,+ kũrĩa kwarĩ na thunagogi ya Ayahudi. 2 Paulo agĩtonya thĩinĩ o ta ũrĩa aamenyerete,+ na kwa ihinda rĩa thabatũ ithatũ akĩhũthĩra ihooto ciumĩte Maandĩko-inĩ kũmaiguithia,+ 3 akĩmataaragĩria na akĩmonagia na njĩra ya maandĩko atĩ no mũhaka Kristo angĩanyarirĩkire+ na ariũkio kuuma kũrĩ arĩa akuũ,+ akiugaga atĩrĩ: “Ũyũ nĩwe Kristo, Jesu ũyũ ndĩramũhunjĩria ũhoro wake.” 4 Nĩ ũndũ ũcio, andũ amwe magĩtuĩka etĩkia na makĩnyitanĩra na Paulo na Sila,+ na noguo Angiriki aingĩ arĩa maathathayagia Ngai meekire o hamwe na atumia aingĩ arĩa maarĩ igweta.
5 No Ayahudi makĩigua ũiru,+ magĩcokanĩrĩria arũme maigana ũna oru arĩa moorũraga kũu thoko-inĩ na magĩthondeka gĩkundi kĩa andũ na gĩkĩambĩrĩria ngũĩ thĩinĩ wa itũũra. Gĩkĩingĩra na gĩthũri nyũmba kwa Jasoni gĩkiugaga atĩ Paulo na Sila marutũrũrũo nja kũrĩ gĩkundi kĩu. 6 No rĩrĩa maamaagire, magĩkururia Jasoni na ariũ amwe a Ithe witũ makĩmatwara kũrĩ anene a itũũra, makiugaga: “Andũ arĩa mahagũranĩtie* thĩ yothe ĩrĩa ĩikaragwo nĩ makinyĩte gũkũ o nakuo,+ 7 na Jasoni nĩ amanyitĩte ũgeni gwake. Andũ aya othe nĩ mareganaga na mawatho ma Kaisari, makoiga atĩ nĩ kũrĩ mũthamaki ũngĩ, nĩwe Jesu.”+ 8 Rĩrĩa kĩrĩndĩ na anene a itũũra maaiguire ũguo, makĩrakara; 9 na rĩrĩa Jasoni na acio angĩ maamanengerire mbeca cia kũigana cia kũmarũgamĩrĩra, makĩmareka mathiĩ.
10 Na gwatuka-rĩ, o rĩo ariũ a Ithe witũ magĩtũma Paulo na Sila mathiĩ Beroia. Rĩrĩa maakinyire, makĩingĩra thĩinĩ wa thunagogi ya Ayahudi. 11 Na rĩrĩ, andũ a kũu maarĩ na mwerekera mwega gũkĩra a Thesalonike, nĩ gũkorũo nĩ maamũkagĩra kiugo meciria-inĩ marĩ na wendi mũnene, na nĩ maathuthuragia Maandĩko o mũthenya na njĩra ndikĩru nĩguo mone kana maũndũ macio nĩguo maatariĩ. 12 Nĩ ũndũ ũcio, andũ aingĩ magĩtuĩka etĩkia, nginya atumia aingĩ a Ngiriki arĩa maarĩ igweta o ũndũ ũmwe na arũme maigana ũna. 13 No hĩndĩ ĩrĩa Ayahudi a kuuma Thesalonike maamenyire Paulo nĩ aahunjagia kiugo kĩa Ngai kũu Beroia, magĩũka kuo nĩguo macogere kĩrĩndĩ na magĩthogothe.+ 14 Nao ariũ a Ithe witũ makĩra Paulo o rĩo athiĩ iria-inĩ,+ no Sila na Timotheo magĩtigwo kũu. 15 Na rĩrĩ, arĩa maarĩ hamwe na Paulo makĩmũtwara nginya Athene, magĩcoka makiumagara thutha wa kwĩrũo atĩ Sila na Timotheo+ nĩ magĩrĩirũo gũthiĩ kũrĩ Paulo narua o ũrĩa kũngĩahotekire.
16 Na hĩndĩ ĩyo Paulo aametereire kũu Athene-rĩ, ngoro yake ĩkĩigua ũũru mũno ona atĩ itũũra rĩu rĩaiyũire mĩhianano. 17 Nĩ ũndũ ũcio akĩambĩrĩria kũhũthĩra ihooto kũiguithia Ayahudi thunagogi-inĩ o hamwe na andũ angĩ arĩa maathathayagia Ngai, na o mũthenya akaiguithia arĩa maakoragwo thoko-inĩ arĩa mangĩoonekire. 18 No andũ amwe arĩa maarũmagĩrĩra ũrutani wa Epikurio na Sitoiko makĩambĩrĩria gũkararania nake, amwe ao makoria: “Mũhũhũtĩki ũyũ arenda gũtwĩra atĩa?” Nao angĩ makoiga: “Aroneka ta arĩ mũhunjia wa ngai ngʼeni.” Mooigaga ũguo tondũ Paulo nĩ aahunjagia ũhoro ũrĩa mwega wa Jesu na wĩgiĩ kũriũka.+ 19 Nĩ ũndũ ũcio makĩmũnyita na makĩmũtwara Areopago, makĩmwĩra: “Ta tũtaarĩrie ũrutani ũcio mwerũ ũraria ũhoro waguo nĩ ũrĩkũ? 20 Nĩ gũkorũo ũraria maũndũ mageni matũ-inĩ maitũ, na tũrenda kũmenya wega ũrĩa maũndũ macio moigĩte.” 21 Nĩ gũkorũo andũ othe a Athene na andũ a kũngĩ arĩa maaikaraga* kuo gũtirĩ ũndũ ũngĩ meekaga tiga kũheana na gũthikĩrĩria maũndũ mageni. 22 Hĩndĩ ĩyo Paulo akĩrũgama Areopago gatagatĩ+ akiuga:
“Athuri aya a Athene, nguona atĩ maũndũ-inĩ mothe inyuĩ mũrĩ etigĩri ngai* gũkĩra andũ arĩa angĩ.+ 23 Ta rĩu-rĩ, rĩrĩa ngũhĩtũkaga na ndarora na kinyi indo cianyu cia ũthathaiya, nyonire nginya kĩgongona kĩandĩkĩtwo ‘Kũrĩ Ngai Ũtoĩo.’ Hakĩrĩ ũguo-rĩ, ũcio mũthathayagia mũtekũmũmenya nĩwe ndĩramũmenyithia. 24 Ngai ũrĩa wombire thĩ na indo iria ciothe irĩ thĩinĩ wayo, arĩ we Mwathani wa igũrũ na thĩ-rĩ,+ ndaikaraga thĩinĩ wa hekarũ ciakĩtwo na moko;+ 25 o na ndatungatagwo na moko ma andũ ta kũrĩ kĩndũ arabatara,+ nĩ gũkorũo we mwene nĩwe ũheaga andũ othe muoyo na mĩhũmũ+ na indo ciothe. 26 Na oombire andũ a ndũrĩrĩ ciothe kuumana na mũndũ ũmwe+ nĩguo maikare kũndũ guothe thĩinĩ wa thĩ,+ agĩtua mahinda marĩa maamũre na agĩĩkĩra mĩhaka ya kũrĩa andũ megũikara,+ 27 nĩguo macarie Ngai, mahambate makĩmwetha nĩgetha mamuone,+ o na gũtuĩka ndarĩ haraya na o ũmwe witũ. 28 Nĩ gũkorũo nĩwe ũtũmaga tũkorũo muoyo, tũkahota gwĩtwara, na tũgakorũo ho, o ta ũrĩa andĩki amwe anyu a marebeta moigĩte, ‘Nĩ gũkorũo o na ithuĩ tũrĩ ciana ciake.’*
29 “Kwoguo-rĩ, tondũ tũrĩ ciana cia* Ngai,+ tũtiagĩrĩirũo gwĩciria atĩ Ngai ahaana ta thahabu kana betha kana ihiga, kana kĩndũ gĩicũhĩtio na ũũgĩ wa andũ.+ 30 Atĩrĩrĩ, Ngai ndaigana gũtindanĩra na mahinda macio ma kwaga ũmenyo;+ no rĩu nĩ aramenyithia andũ othe kũndũ guothe atĩ magĩrĩirũo kwĩrira. 31 Tondũ nĩ atuĩte mũthenya ũrĩa agaaciirithia+ na kĩhooto thĩ ĩrĩa ĩikaragwo akĩhũthĩra mũndũ ũrĩa amũrĩte, na nĩ ekĩrĩte ũndũ ũcio mũkonde na njĩra ya kũmũriũkia kuuma kũrĩ arĩa akuũ.”+
32 Na rĩrĩ, hĩndĩ ĩrĩa maaiguire ũhoro wa kũriũkio kwa arĩa akuũ, amwe makĩambĩrĩria kũmũnyũrũria,+ nao arĩa angĩ makiuga: “Nĩ tũrĩgũthikĩrĩria hĩndĩ ĩngĩ ũtũhe ũhoro ũcio.” 33 Kwoguo Paulo akĩmatiga, 34 no andũ amwe makĩnyitanĩra nake na magĩtuĩka etĩkia. Amwe ao maarĩ Dionisio, ũrĩa warĩ mũciirithania thĩinĩ wa igooti rĩa Areopago, na mũtumia wetagwo Damari, na angĩ.