Kũrĩ Aroma
9 Ndĩraria ũhoro wa ma ndĩ thĩinĩ wa Kristo; ti maheeni ndĩraria, na thamiri yakwa nĩ mũira wakwa kũgerera roho mũtheru, 2 atĩ ndĩ na kĩeha kĩingĩ na ruo rũtarathira ngoro-inĩ yakwa. 3 Nĩ gũkorũo ingĩendire niĩ mwene ndigithũkanio na Kristo ndĩ mũrume ithenya rĩa ariũ a baba, andũ a rũrĩrĩ rwitũ kũringana na mwĩrĩ, 4 nĩo Aisiraeli. Acio nĩo maatuirũo ariũ+ na makĩheo riri, na irĩkanĩro,+ na Watho,+ na ũtungata mũtheru,+ o na ciĩranĩro.+ 5 Maithe maitũ ma tene maarĩ a rũrĩrĩ rwao,+ nake Kristo ooimanire nao kũringana na mwĩrĩ.+ Ngai o we wathaga indo ciothe arogoocagwo tene na tene. Ameni.
6 No ũguo ti kuuga atĩ kiugo kĩa Ngai gĩtihingĩte. Tondũ ti arĩa othe moimanĩte na Isiraeli makoragwo marĩ “Isiraeli” kũna.+ 7 Ningĩ o na marĩ mbeũ ya* Iburahimu+ ti othe ciana ciake, ĩndĩ nĩ kwandĩke atĩrĩ: “Ũrĩa ũgeetwo mbeũ yaku* akooima harĩ Isaaka.”+ 8 Ũguo nĩ kuuga atĩ, ciana iria ciumanĩte na mwĩrĩ ti cio ciana cia Ngai kũna,+ ĩndĩ ciana cia kĩĩranĩro+ nĩcio itaragwo atĩ nĩ mbeũ.* 9 Nĩ gũkorũo kiugo gĩa kĩĩranĩro kĩarĩ gĩkĩ: “Ihinda-inĩ o ta rĩrĩ nĩ ngooka, na Sara nĩ agaakorũo agĩĩte mwana wa kahĩĩ.”+ 10 Na to hĩndĩ ĩyo tu, no nĩ nginya rĩrĩa Rebeka oohire nda ya ciana cia mahatha cia mũndũ ũrĩa ũmwe, Isaaka ithe witũ wa tene;+ 11 nĩ gũkorũo ciana icio itanaciarũo na itekĩte ũndũ o na ũmwe mwega kana mũũru, nĩgetha muoroto wa Ngai ũhoro-inĩ wĩgiĩ gũthuura ũthiĩ na mbere kwĩhocia harĩ Ũrĩa wĩtanaga no ti harĩ ciĩko, 12 Rebeka eerirũo atĩrĩ: “Ũrĩa mũkũrũ agaatuĩka ngombo ya ũrĩa mũnini.”+ 13 O ta ũrĩa kwandĩkĩtwo: “Nĩ ndendete Jakubu, no Esau nĩ ndamũthũire.”+
14 Tũkiuge atĩa? Hihi Ngai nĩ kwaga agĩte kĩhooto? Aca, tiguo kũrĩ!+ 15 Tondũ eerire Musa ũũ: “Mũndũ ũrĩa ndĩrĩendaga kũiguĩra tha nĩwe ndĩrĩiguagĩra tha, na ũrĩa ndĩrĩendaga gũcaĩra nĩwe ndĩrĩcayagĩra.”+ 16 Nĩ ũndũ ũcio, gũtiringanaga na wendi wa mũndũ kana kĩyo gĩake,* ĩndĩ kũringanaga na Ngai, o we ũrĩ tha.+ 17 Tondũ rĩandĩko-inĩ Firauni erĩtwo atĩrĩ: “Ũndũ ũyũ nĩguo ũtũmĩte ngwĩtĩkĩrie ũthiĩ na mbere gũkorũo kuo: nĩguo nyonanie hinya wakwa ũhoro-inĩ waku, na rĩĩtwa rĩakwa rĩmenyithanio thĩ yothe.”+ 18 Nĩkĩo aiguagĩra tha mũndũ ũrĩa ekwenda, no akareka ũrĩa ekwenda omie ngoro.+
19 No wahota kũnjũria atĩrĩ: “Ngai akĩroraga mahĩtia nĩkĩ? Tondũ rĩrĩ, nũũ wanagiria ahingie wendi wake?” 20 No wee mũndũ ũyũ-rĩ, ũkĩrĩ ũ, nĩguo ũcokanĩrie na Ngai?+ Hihi kĩndũ kĩrĩa kĩũmbĩtwo no kĩũrie mũkĩũmbi, “Wathondekire ũũ nĩkĩ?”+ 21 Atĩrĩrĩ, githĩ mũũmbi ndarĩ na kĩhooto gĩa kũhũthĩra rĩũmba+ kũũmba kĩndũ kĩmwe gĩa kũheo gĩtĩo na kĩngĩ gĩtarĩ gĩa kũheo gĩtĩo kuuma o gĩkũmba-inĩ kĩmwe? 22 Ĩ angĩkorũo Ngai aarĩ na wendi wa kuonania mangʼũrĩ make na wa kũmenyithania hinya wake, na agĩkirĩrĩria arĩ na wetereri mũnene indo cia kũrakarĩrũo iria ciagĩrĩire kwanangwo? 23 Ningĩ-rĩ, ĩ angĩkorũo eekire ũguo nĩguo amenyithanie ũtonga wa riri wake kwerekera indo cia kũiguĩrũo tha,+ iria aahaarĩirie o mbere nĩ ũndũ wa riri, 24 nĩcio ithuĩ, o ithuĩ eetire, to kuuma kũrĩ Ayahudi no nĩ nginya kuuma kũrĩ ndũrĩrĩ?+ 25 Ningĩ no ta ũrĩa oigĩte thĩinĩ wa ibuku rĩa Hosea: “Andũ arĩa matarĩ akwa+ ngaameta ‘andũ akwa,’ nake mũtumia ũrĩa ũteendetwo, ndĩmwĩte ‘mwendwa’;+ 26 na kũndũ kũrĩa meerirũo atĩrĩ, ‘Inyuĩ mũtirĩ andũ akwa,’ kũu mageetagwo ‘ariũ a Ngai ũrĩa ũtũũraga muoyo.’”+
27 Makĩria ma ũguo-rĩ, Isaia aanĩrĩire akiuga ũũ ũhoro wĩgiĩ Isiraeli: “O na gũtuĩka mũigana wa ariũ a Isiraeli no ũkorũo ũtariĩ ta mũthanga wa iria-inĩ, no matigari tu makaahonokio.+ 28 Nĩ gũkorũo Jehova* nĩ agaatuanĩra ciira thĩinĩ wa thĩ, aũrĩkie na aũhingie.”*+ 29 Ningĩ, o ta ũrĩa Isaia aarathĩte akoiga atĩrĩ: “Tiga nĩ ũrĩa Jehova* mũnene wa ita aatũtigĩirie mbeũ,* tũngĩatuĩkire o ta Sodomu na tũhaane o ta Gomora.”+
30 Tũkiuge atĩa rĩu? Atĩ andũ a ndũrĩrĩ, o na gũtuĩka matiathingataga ũthingu, nĩ maagĩire na ũthingu,+ ũthingu ũrĩa uumanaga na wĩtĩkio;+ 31 no andũ a Isiraeli, o na gũtuĩka nĩ maathingataga watho wa ũthingu, matiakinyĩire watho ũcio. 32 Nĩ ũndũ kĩ? Tondũ matiaũthingatire na wĩtĩkio no maaũthingatire na ciĩko. Nao makĩhĩngwo nĩ “ihiga rĩa kũhĩngithia”;+ 33 o ta ũrĩa kwandĩkĩtwo ũũ: “Atĩrĩrĩ, nĩ ngũiga ihiga rĩa kũhĩngithia thĩinĩ wa Zayuni+ na rwaro rwa ihiga rwa gũtũma andũ magwe, no ũrĩa ũigaga wĩtĩkio wake harĩ rĩo ndagaaconorithio.”+