Ayubu
32 Nĩ ũndũ ũcio, athuri acio atatũ magĩtiga gũcokeria Ayubu, tondũ we aarĩ na ma atĩ nĩ mũthingu.*+ 2 No Elihu mũrũ wa Barakeli ũrĩa Mũbuzi+ wa famĩlĩ ya Ramu aarĩ mũrakaru mũno. Aacinĩtwo nĩ marakara nĩ ũndũ wa Ayubu kũgeria kuonania atĩ we nĩ mwagĩrĩru handũ ha Ngai.+ 3 Ningĩ nĩ aarakarĩtio mũno nĩ arata acio atatũ a Ayubu tondũ matiahotete kuona ũndũ wa gũcokia no moonanĩtie atĩ Ngai nĩ mũũru.+ 4 Elihu aaikarĩte etereire gũcokeria Ayubu, tondũ acio maarĩ akũrũ kũmũkĩra.+ 5 Rĩrĩa Elihu oonire atĩ athuri acio atatũ matiarĩ na macokio, agĩcinwo nĩ marakara. 6 Nĩ ũndũ ũcio Elihu mũrũ wa Barakeli ũrĩa Mũbuzi akĩambĩrĩria kwaria akiuga atĩrĩ:
Nĩkĩo ndĩgirĩrĩirie kwaria nĩ ũndũ wa gĩtĩo,+
Na ndetigĩra kũmwĩra maũndũ marĩa njũĩ.
7 Nguugĩte atĩrĩ, ‘Reke matukũ marie,
Nayo mĩaka mĩingĩ ĩheane ũũgĩ.’
8 No rĩrĩ, roho ũrĩa ũrĩ thĩinĩ wa andũ,
O guo mĩhũmũ ya Mwene-Hinya-Wothe, ũcio nĩguo ũmaheaga ũtaũku.+
9 Matukũ maingĩ to mo matũmaga mũndũ akorũo arĩ mũũgĩ,
Ningĩ to athuri arĩa akũrũ moĩ maũndũ marĩa magĩrĩire.+
10 Nĩkĩo ndĩroiga ũũ, ‘Thikĩrĩriai,
O na niĩ nĩ ngũmwĩra maũndũ marĩa njũĩ.’
11 Atĩrĩrĩ, ngwetereire njigue ciugo cianyu;
Ngũikarĩte thikĩrĩirie mwĩcirĩrie wanyu+
Mũgĩcaria maũndũ marĩa mũkuuga.+
12 Ngũmũthikĩrĩirie na kinyi,
No gũtirĩ o na ũmwe wanyu ũhotire kuonia Ayubu atĩ nĩ ahĩtĩtie*
Kana kũmũcokeria.
13 Kwoguo mũtikoige atĩrĩ, ‘Nĩ tuonete ũũgĩ;
Ngai nĩwe ũronania mahĩtia make, no ti mũndũ.’
14 Ndekwerekeirie ciugo ciake harĩ niĩ,
Kwoguo ndikũmũcokeria kũringana na ciugo cianyu.
15 Nĩ amaku, na matirĩ na macokio mangĩ;
Gũtirĩ ũndũ ũngĩ mangiuga.
16 Nĩ njetereire, no matirathiĩ na mbere kwaria;
Marũgamĩte o hau, matarĩ na macokio mangĩ.
17 Kwoguo o na niĩ nĩ ngũcokia;
O na niĩ nĩ nguuga maũndũ marĩa njũĩ,
18 Nĩ gũkorũo njiyũirũo nĩ ciugo;
Roho ũrĩa ũrĩ thĩinĩ wakwa nĩ ũrandindĩka njarie.
19 Thĩinĩ wakwa haana ta ndibei ĩtarĩ na huhĩrio,
O ta mondo njerũ cia ndibei irĩ hakuhĩ gũtumũka.+
20 Reke njarie nĩgetha njigue ndahoorera!
Nĩ ngũtumũra kanua gakwa njokie.