Marũa ma Mbere Kũrĩ Akorintho
12 Rĩu ariũ a Ithe witũ-rĩ, ha ũhoro wĩgiĩ iheo cia kĩĩroho,+ ndikwenda mwage kũmenya. 2 Nĩ mũĩ atĩ rĩrĩa mwarĩ andũ a ndũrĩrĩ,* mwagucagĩrĩrio na mũkahĩtithio nĩguo mũthathaiye mĩhianano ĩyo ĩtaragia,+ mũkamĩrũmĩrĩra o kũrĩa mũrĩtwarũo. 3 Rĩu ngwenda mũmenye atĩ gũtirĩ mũndũ waragia arĩ na roho wa Ngai uugaga: “Jesu nĩ mũrume!” na gũtirĩ mũndũ ũngiuga: “Jesu nĩ Mwathani!” atatongoretio nĩ roho mũtheru.+
4 Rĩu-rĩ, gũkoragwo na iheo mwanya mwanya, no roho no ũmwe;+ 5 na gũkoragwo na ũtungata mwanya mwanya,+ ĩndĩ Mwathani no ũmwe; 6 na gũkoragwo na mawĩra mwanya mwanya, na Ngai o ũrĩa ũmwe nĩwe ũmahingagia mothe thĩinĩ wa andũ othe.+ 7 No roho nĩ wonekaga harĩ o mũndũ nĩguo andũ arĩa angĩ magunĩke.+ 8 Nĩ gũkorũo mũndũ ũmwe nĩ aheagwo ciugo cia* ũũgĩ kũgerera roho ũcio, na ũngĩ akaheo ciugo cia ũmenyo kũgerera roho o ũcio, 9 ũngĩ nake akaheo wĩtĩkio+ kũgerera roho o ũcio, nake ũngĩ akaheo iheo cia kũhonania+ kũgerera roho o ro ũcio ũmwe, 10 na ũngĩ akaheo ũhoti wa gwĩka mawĩko ma hinya,+ ũngĩ kũratha mohoro, nake ũngĩ gũtaũkĩrũo nĩ ciugo iria itongoretio nĩ roho,+ ũngĩ akaheo ũhoti wa kwaria na thiomi mwanya mwanya,+ nake ũngĩ akaheo ũhoti wa gũtaũra thiomi.+ 11 No maũndũ macio mothe mekĩkaga kũgerera roho o ũcio, ũkamagaĩra o mũndũ kũringana na wendi waguo.
12 Nĩ gũkorũo o ta ũrĩa mwĩrĩ ũrĩ ũmwe no nĩ ũrĩ ciĩga nyingĩ, na ciĩga ciothe cia mwĩrĩ ũcio o na irĩ nyingĩ nĩ mwĩrĩ ũmwe-rĩ,+ ũguo noguo Kristo o nake atariĩ. 13 Nĩ gũkorũo ithuothe, kana tũrĩ Ayahudi kana Angiriki, kana tũrĩ ngombo kana tũrĩ na wĩyathi, twabatithirio tũgĩtuĩka mwĩrĩ ũmwe kũgerera roho o ũmwe, na ithuothe twanyuithirio roho o ũmwe.
14 Nĩ gũkorũo mwĩrĩ ndũthondeketwo nĩ kĩĩga kĩmwe no ũthondeketwo nĩ ciĩga nyingĩ.+ 15 Kũgũrũ kũngiuga, “Tondũ ti niĩ guoko, niĩ ndirĩ kĩĩga kĩa mwĩrĩ,” ũndũ ũcio ndũngĩtũma gũtige gũtuĩka kĩĩga kĩa mwĩrĩ. 16 Na gũtũ kũngiuga, “Tondũ ti niĩ riitho, niĩ ndirĩ kĩĩga kĩa mwĩrĩ,” ũndũ ũcio ndũngĩtũma gũtige gũtuĩka kĩĩga kĩa mwĩrĩ. 17 Korũo mwĩrĩ wothe nĩ riitho-rĩ, mũndũ angĩiguaga na kĩĩ? Korũo wothe nĩ gũtũ-rĩ, mũndũ angĩnungagĩra na kĩĩ? 18 No Ngai abangĩte o kĩĩga kĩa mwĩrĩ kũringana na ũrĩa oonire kwagĩrĩire.
19 Korũo ciĩga ciothe ikoragwo irĩ kĩĩga o kĩmwe-rĩ, mwĩrĩ ũngĩrĩ ha? 20 No rĩu ikoragwo irĩ ciĩga nyingĩ, ĩndĩ mwĩrĩ no ũmwe. 21 Riitho rĩtingĩra guoko, “Niĩ ndirakũbatara,” ningĩ-rĩ, kĩongo gĩtingĩra magũrũ, “Ndiramũbatara.” 22 Handũ ha ũguo, ciĩga cia mwĩrĩ iria cionekaga ta itarĩ na hinya mũingĩ nĩ cia bata, 23 na ciĩga cia mwĩrĩ iria twĩciragia atĩ ti cia kũheo gĩtĩo kĩnene nĩcio tũheaga gĩtĩo mũno,+ na kwoguo ciĩga iria cionagwo itarĩ cia kwendeka ikaheo gĩtĩo makĩria, 24 no ciĩga citũ iria igucagĩrĩria itibataraga kĩndũ. O na kũrĩ ũguo, Ngai athondekete mwĩrĩ na njĩra ĩyo, kĩĩga kĩrĩa kĩanyihĩirũo agĩkĩhe gĩtĩo kĩnene, 25 nĩguo mwĩrĩ ndũkagĩage na ngayũkano, no ciĩga ciaguo irũmbũyanagie.+ 26 Kĩĩga kĩmwe kĩngĩnyamarĩka, ciĩga iria ingĩ ciothe inyamarĩkaga hamwe nakĩo;+ kana kĩĩga kĩmwe kĩngĩtũũgĩrio, ciĩga iria ingĩ ciothe ikenaga hamwe nakĩo.+
27 Rĩu-rĩ, inyuĩ mũrĩ mwĩrĩ wa Kristo,+ na o ũmwe wanyu kĩũmbe nĩ kĩĩga.+ 28 Na Ngai nĩ aheete andũ matiganĩte mawĩra thĩinĩ wa kĩũngano: mbere, atũmwo;+ kerĩ, anabii;+ gatatũ, arutani;+ ningĩ mawĩko ma hinya;+ iheo cia kũhonania;+ ũtungata wa gũteithia arĩa angĩ; ũhoti wa gũtongoria;+ ũhoti wa kwaria na thiomi mwanya mwanya.+ 29 Hihi nĩ othe atũmwo? Hihi nĩ othe anabii? Hihi nĩ othe arutani? Hihi nĩ othe mekaga mawĩko ma hinya? 30 Hihi nĩ othe makoragwo na iheo cia kũhonania? Hihi nĩ othe maragia na thiomi?+ Hihi nĩ othe mataũraga?+ 31 Ĩndĩ thiĩi na mbere kwĩrutanĩria kwamũkĩra* iheo nene makĩria.+ Na no ngũmuonia njĩra ĩrĩa njega makĩria.+