Ayubu
2 Hihi no ũhote kũharũkia mũkanda maniũrũ-inĩ mayo
Kana ũthece thĩa ciayo na ndwano?*
3 Hihi no ĩgũthaithe ũmĩiguĩre tha,
Kana ĩkwarĩrie na ũhooreri?
4 Hihi no ĩrĩkanĩre nawe
Atĩ nĩguo ĩtũũre ĩrĩ ngombo yaku?
5 Hihi no ũthaake nayo ta ũrĩa ũngĩthaaka na nyoni
Kana ũmĩoherere handũ nĩguo tũirĩtu twaku tũthaakage nayo?
6 Hihi onjorithia no mamĩkũũranie na indo ingĩ?
Hihi no mamĩgayanĩrie ahũũri biacara?
7 Hihi no ũhote gũtheca ngothi yayo na mĩcengi mĩingĩ+
Kana ũthece mũtwe wayo na matimũ ma gũtega thamaki?
8 Ũngĩmĩhutia na guoko,
Ũngĩtũũra ũririkanaga mbaara yayo na ndũngĩgeeka ũguo rĩngĩ!
9 Kwĩrĩgĩrĩra atĩ no ũmĩhoote nĩ ũndũ wa tũhũ.
O kũmĩona gwiki no gũtũme ũũrũo nĩ hinya.*
10 Gũtirĩ mũndũ ũgeragia kũmĩũgita.
Gũkĩrĩ ũguo-rĩ, nũũ ũcio ũngĩhota gwĩtiiria harĩ niĩ?+
11 Nĩ mũndũ ũrĩkũ ũrĩ wahe kĩndũ atĩ nĩguo ndĩmũrĩhe?+
Indo ciothe iria irĩ mũhuro wa riũa nĩ ciakwa.+
12 Ndingĩaga kwaria ũhoro wĩgiĩ ciĩga ciayo,
Ũhoro wĩgiĩ hinya wayo na mwĩrĩ wayo ũrĩa ũmbĩtwo na njĩra ya magegania.
13 Nũũ ũngĩhota kũmĩaũra nguo yayo ya igũrũ?
Nũũ ũngĩkuhĩrĩria thĩa ciayo iria irĩ hinya?
14 Nĩ mũndũ ũrĩkũ ũngĩhingũra mĩrango ya kanua kayo?*
Magego mayo mothe nĩ ma kũmakania.
15 Mũgongo-inĩ wayo ĩkoragwo na ngũũcĩ*
Inyitithanĩtio hamwe wega.
16 O ĩmwe yacio ĩkoragwo ĩnyitanĩte biũ na ĩrĩa ĩngĩ
Ũũ atĩ gũtirĩ rĩera rĩngĩtonya gatagatĩ-inĩ gacio.
17 Ikoragwo inyitanĩte biũ;
Ikarũma biũ na itingĩamũranio.
18 Ĩrutaga mĩmenũko ya ũtheri rĩrĩa ĩrahuhia
Namo maitho mayo mahaana ta mĩrũri ya ũtheri wa rũcinĩ.
19 Kanua kayo koimaga mĩhenũko ya rũheni;
Ĩkaruta thandĩ cia mwaki.
20 Maniũrũ mayo moimaga ndogo,
O ta riiko rĩakĩtio na nyeki.
21 Mĩhũmũ yayo ĩgwatagia makara mwaki,
Naruo rũrĩrĩmbĩ rũkoima kanua-inĩ kayo.
22 Ngingo yayo ĩkoragwo na hinya mũingĩ,
Na arĩa othe macemanagia nayo nĩ manyitagwo nĩ guoya.
23 Mĩgũtha ya nyama ciayo ĩkoragwo ĩnyitanĩte biũ;
Ĩkoragwo ĩrĩ mĩrũmu ta ĩthondeketwo na cuma na ndĩngĩenyenyeka.
24 Ngoro yayo nĩ nyũmũ ta ihiga,
Ĩkoma o ta ihiga rĩa na thĩ rĩa gũthĩa.
25 Hĩndĩ ĩrĩa yokĩra, o na andũ arĩa marĩ hinya nĩ metigagĩra;
Mũthiĩre wayo maĩ-inĩ ũtũmaga matukanĩrũo.
26 Gũtirĩ rũhiũ rwa njora rũngĩmĩtooria;
O na kana itimũ, mũguĩ, kana mũcengi.+
27 Harĩ yo-rĩ, kĩgera nĩ ta nyeki,
Nakĩo gĩcango nĩ ta rũbaũ rũbuthu.
28 Mũguĩ ndũngĩtũma yũre;
Na mahiga ma kĩgũtha mahaanaga o ta mahuti harĩ yo.
29 Harĩ yo njũgũma nĩ ta ihuti,
Na nĩ ĩthekagĩrĩra mũgambo wa itimũ.
30 Nda yayo ĩtariĩ ta icere cia nyũngũ;
Ĩtigaga mĩkururo ndoro-inĩ ta rũbaũ rwa kũhũũra ngano.+
31 Ĩtũmaga kũrĩa kũriku gũtherũke o ta nyũngũ;
Yunjugaga iria o ta nyũngũ ya gũtherũkia maguta.
32 Ĩtigaga mũhari ũrahenia njĩra-inĩ yayo.
O na mũndũ no ecirie atĩ iria-inĩ kũrĩa kũriku kũrĩ na mbuĩ.
33 Gũtirĩ kĩndũ kĩngĩ kĩhaana tayo thĩinĩ wa thĩ,
Nĩ nyamũ yombirũo ĩtarĩ guoya.
34 Ĩĩroragĩra kĩndũ o gĩothe kĩrĩ mwĩtĩo ĩtegwĩtigĩra.
Nĩyo mũthamaki wa nyamũ ciothe cia gĩthaka iria irĩ hinya.”