Ayubu
40 Na rĩrĩ, Jehova agĩthiĩ na mbere kwarĩria Ayubu akĩmwĩra atĩrĩ:
2 “Hihi mũndũ ũcaragĩrĩria mahĩtia nĩ agĩrĩirũo gũtetia Mwene-Hinya-Wothe?+
Mũndũ ũrĩa ũrenda kũrũnga Ngai-rĩ, nĩ acokie.”+
3 Nake Ayubu agĩcokeria Jehova akĩmwĩra ũũ:
4 “Atĩrĩrĩ, niĩ ndĩ mũndũ ũtarĩ bata.+
Ingĩgĩgũcokeria ngwĩre atĩa?
Nĩ ndahumbĩra kanua gakwa na guoko.+
5 Nĩ ndaririe riita rĩa mbere, no ndigũcokia rĩngĩ;
O na ngĩaria rĩa kerĩ, no gũtirĩ ũndũ ũngĩ nguuga.”
6 Nake Jehova arĩ kĩhuhũkanio-inĩ agĩcokeria Ayubu akĩmwĩra atĩrĩ:+
7 “Ta wĩhotore ta mũndũrũme;
Nĩ ngũkũũria ciũria, nawe ũnjokerie.+
8 Kaĩ ũrenda gwĩkĩrĩra nganja kĩhooto gĩakwa?
Hihi ũrenda kũndua mwĩhia nĩgetha ũtuĩke atĩ ndũhĩtĩtie?+
9 Guoko gwaku-rĩ, hihi nĩ kũrĩ hinya ta kwa Ngai ũrĩa wa ma,+
Kana hihi mũgambo waku no ũrurume ta wake?+
10 Ta wĩgemie na riri na ũnene;
Wĩhumbe gĩtĩo na ũkaru.
11 Rekereria marakara maku marũrũ;
Ũrore mũndũ o wothe mwĩtĩi ũmũcokie thĩ.
12 Ũrore mũndũ o wothe mwĩtĩi, ũmũnyihie,
Na ũrangĩrĩrie andũ arĩa aganu o harĩa marũgamĩte.
13 Ũmahithe tĩri-inĩ othe;
Ũmohe* kũndũ kũrĩa kwĩhithĩte,
14 Ũngĩka ũguo, o na niĩ no njĩtĩkanie nawe
Atĩ guoko gwaku kwa ũrĩo no gũkũhonokie.
15 Ta rora nyamũ ĩrĩa ĩtagwo Behemothu,* o ĩyo ndombire ta ũrĩa ndakũmbire.
Ĩrĩaga nyeki o ta ndegwa.
16 Ta rora hinya ũrĩa ũrĩ njohero-inĩ yayo
Na ũhoti ũrĩa ũrĩ mĩkiha-inĩ ya nda yayo!
17 Yũmagia mũtingʼoe wayo ta mũtarakwa;
Mĩkiha ĩrĩa ĩrĩ njohero-inĩ yayo ĩkoragwo yohanĩtio hamwe.
18 Mahĩndĩ mayo mahaana ta mĩberethi ya gĩcango;
Ciĩga ciayo ihaana ta ithondeketwo na kĩgera.
19 Nĩyo ya mbere harĩ* mawĩra ma Ngai;
Mũũmbi wayo nowe ũngĩhota kũmĩkuhĩrĩria arĩ na rũhiũ rwake rwa njora.
20 Irĩma nĩ irutaga irio ciayo,
Kũrĩa nyamũ ciothe cia gĩthaka ithaakagĩra.
21 Ĩkomaga ihinga-inĩ,
Ĩgaikara ĩĩgitĩtie mathanjĩ-inĩ kũrĩa kũrĩ na itomboya.
22 Ihinga icio nĩ imĩheaga kĩĩruru,
Nayo mĩtĩ ya mĩcũgũcũgũ ya mũkuru-inĩ ĩkamĩrigicĩria.
23 O na rũũĩ rũngĩkorũo rũgĩtherera na hinya, ndĩmakaga.
Ĩkoragwo na ũmĩrĩru o na maĩ ma Rũũĩ rwa Jorodani+ mangĩmĩhũũra kanua.
24 Hihi nĩ kũrĩ mũndũ ũngĩhota kũmĩnyita ĩkĩonaga,
Kana amĩthece iniũrũ na ndwano?*