Kũguũrĩrio kwa Johana
16 Na ngĩigua mũgambo mũnene woima harĩa hatheru+ ũkĩra araika acio mũgwanja atĩrĩ: “Thiĩi mũgaite mbakũri iria mũgwanja cia marakara ma Ngai igũrũ rĩa thĩ.”+
2 Wa mbere agĩthiĩ na agĩita mbakũri yake igũrũ rĩa thĩ.+ Nao andũ arĩa maarĩ na rũũri rwa nyamũ+ ĩrĩa ya gĩthaka, o hamwe na arĩa maathathayagia mũhianano wayo+ makĩgĩo nĩ kĩronda kĩrĩ na ruo mũno na gĩtaahonaga.+
3 Wa kerĩ agĩita mbakũri yake thĩinĩ wa iria.+ Narĩo rĩgĩtuĩka thakame+ ĩhaana ta ya mũndũ mũkuũ, na ciũmbe ciothe iria ciarĩ muoyo igĩkua, iria ciarĩ iria-inĩ.+
4 Wa gatatũ agĩita mbakũri yake thĩinĩ wa njũũĩ na matherũkĩro ma maĩ.+ Nacio igĩtuĩka thakame.+ 5 Ngĩigua mũraika ũrĩa wa maĩ oiga atĩrĩ: “Wee, o wee ũrĩ kuo na nowe warĩ kuo,+ Wee mwĩhokeku,+ ũrĩ mũthingu, nĩ gũkorũo nĩ ũtuanĩire matuĩro macio,+ 6 tondũ nĩ maaitire thakame ya arĩa aamũre na ya anabii,+ na nĩ ũmaheete thakame nĩguo mamĩnyue;+ ituĩro rĩu nĩ rĩmagĩrĩire.”+ 7 Na ngĩigua kĩgongona kĩoiga atĩrĩ: “Ĩni, Jehova* Ngai, wee Mwene-Hinya-Wothe,+ matuĩro maku* nĩ ma ma na nĩ ma ũthingu.”+
8 Wa kana agĩita mbakũri yake igũrũ rĩa riũa,+ narĩo riũa rĩgĩtĩkĩrio gũcina andũ na mwaki. 9 Nao andũ magĩcinwo nĩ ũrugarĩ ũcio mũnene, no makĩruma rĩĩtwa rĩa Ngai, o ũcio ũrĩ na wathani igũrũ rĩa mahũũra macio, na matieririre na matiamũgoocire.
10 Wa gatano agĩita mbakũri yake igũrũ rĩa gĩtĩ kĩa ũnene kĩa nyamũ ĩrĩa ya gĩthaka. Naguo ũthamaki wayo ũkĩgĩa nduma,+ nao makĩambĩrĩria kwĩrũma nĩmĩ tondũ wa ruo rwao, 11 no makĩruma Ngai wa igũrũ tondũ wa ruo rwao na ironda ciao, na matieririre ciĩko ciao.
12 Wa gatandatũ agĩita mbakũri yake igũrũ rĩa rũũĩ rũrĩa rũnene rwa Farati,+ na maĩ ma rũũĩ rũu makĩhũa nĩguo+ njĩra ĩhaarĩrio nĩ ũndũ wa athamaki+ a mwena wa irathĩro.
13 Ningĩ ngĩona ciugo ithatũ itarĩ theru itongoretio nĩ roho itariĩ* ta ciũra ikiuma kanua-inĩ ka ndamathia+ na kanua-inĩ ka nyamũ ĩrĩa ya gĩthaka o na kanua-inĩ ka mũnabii ũrĩa wa maheeni. 14 Icio nĩ ciugo itongoretio nĩ ndaimono na nĩ cionanagia imenyithia,+ na ithiaga kũrĩ athamaki a thĩ yothe ĩrĩa ĩikaragwo nĩguo imacokanĩrĩrie nĩ ũndũ wa mbaara+ ya mũthenya ũrĩa mũnene wa Ngai Mwene-Hinya-Wothe.+
15 “Atĩrĩrĩ, ngũka ta mũici.+ Gũkena nĩ mũndũ ũrĩa ũikaraga eiguĩte+ na akamenyagĩrĩra nguo ciake cia igũrũ, nĩguo ndagathiĩ njaga nao andũ mone gĩconoko gĩake.”+
16 Na ikĩmacokanĩrĩria hamwe handũ harĩa hetagwo na Kĩhibirania Hari-Magedoni.*+
17 Wa mũgwanja agĩita mbakũri yake rĩera-inĩ. Hĩndĩ ĩyo mũgambo mũnene ũkiuma harĩa hatheru+ kuuma gĩtĩ-inĩ kĩa ũnene, ũkiuga: “Ũhoro ũcio nĩ warĩka!” 18 Na gũkĩgĩa mĩhenũko ya rũheni na mĩgambo na marurumĩ, na gũkĩgĩa gĩthingithia kĩnene gũtarĩ kwagĩa ta kĩo kuuma rĩrĩa andũ maagĩire kuo thĩinĩ wa thĩ,+ gĩthingithia kĩu kĩarĩ kĩnene na kĩarĩ na hinya mũno. 19 Itũũra rĩrĩa inene+ rĩgĩatũkana icunjĩ ithatũ, namo matũũra ma ndũrĩrĩ makĩgwa; na Babuloni Ũrĩa Mũnene+ akĩririkanwo mbere ya Ngai, nĩguo aheo gĩkombe kĩa ndibei ya marakara ma mangʼũrĩ make.+ 20 Ningĩ icigĩrĩra ciothe ikĩũra, nacio irĩma ikĩagwo.+ 21 Gũgĩcoka gũkĩgĩa mbembe nene mũno cia mbura, o ĩmwe yacio yarĩ na ũritũ ta wa taranda* ĩmwe, ikĩgwĩra andũ kuuma igũrũ,+ nao andũ acio makĩruma Ngai tondũ wa ihũũra rĩu rĩa mbura ya mbembe,+ tondũ ihũũra rĩu rĩarĩ inene mũno.