Marũa ma Mbere ma Johana
3 Onei wendo mũnene ũrĩa Ithe witũ atuonetie,+ atĩ tũgetwo ciana cia Ngai!+ Na ũguo nĩguo tũtariĩ. Nĩkĩo thĩ ĩtatũĩ,+ tondũ ndĩmũmenyete.+ 2 Endwa akwa, ithuĩ rĩu tũrĩ ciana cia Ngai,+ no gũtirĩ kũraguũrio ũrĩa tũgaatuĩka.+ Nĩ tũĩ atĩ rĩrĩa akaaguũrio tũkaahaanana nake, tondũ tũkaamuona o ta ũrĩa atariĩ. 3 Na mũndũ o wothe ũrĩ na kĩĩrĩgĩrĩro kĩu thĩinĩ wake nĩ etheragia,+ o ta ũrĩa ũcio nake arĩ mũtheru.
4 Mũndũ o wothe ũmenyerete kwĩhia ningĩ nĩ amenyerete kuuna watho, na mehia nĩ uuni-watho. 5 Ningĩ nĩ mũĩ atĩ aaguũririo nĩguo eherie mehia maitũ,+ na ndarĩ mehia thĩinĩ wake. 6 Mũndũ wothe ũtũũraga arĩ na ũiguano nake ndamenyeraga kwĩhia;+ gũtirĩ mũndũ ũmenyerete kwĩhia ũrĩ wamuona kana akamũmenya. 7 Twana tũtũ, mũndũ o na ũrĩkũ ndakanamũhĩtithie; mũndũ ũrĩa ũmenyerete gwĩka maũndũ ma ũthingu nĩ mũthingu, o ta ũrĩa ũcio arĩ mũthingu. 8 Mũndũ ũrĩa ũmenyerete kwĩhia oimanĩte na Mũcukani, tondũ Mũcukani akoretwo akĩhia kuuma o kĩambĩrĩria.*+ Na ũndũ ũcio nĩguo watũmire Mũrũ wa Ngai aguũrio, nĩguo oinange* mawĩra ma Mũcukani.+
9 Mũndũ wothe ũciarĩtwo kuumana na Ngai ndamenyeraga kwĩhia,+ nĩ ũndũ mbeũ* Yake ĩtũũraga thĩinĩ wa mũndũ ta ũcio, na ndangĩmenyera kwĩhia nĩ gũkorũo aciarĩtwo kuumana na Ngai.+ 10 Ciana cia Ngai na ciana cia Mũcukani imenyekaga na ũndũ ũyũ: Mũndũ o wothe ũtamenyerete gwĩka maũndũ ma ũthingu ndoimanĩte na Ngai, o na kana mũndũ ũrĩa ũtendete mũrũ wa Ithe.+ 11 Tondũ ĩno nĩyo ndũmĩrĩri ĩrĩa mwaiguire kuuma o kĩambĩrĩria, atĩ nĩ twagĩrĩirũo kwendana;+ 12 ti ta Kaini, ũrĩa woimanĩte na ũrĩa mũũru na akĩũraga mũrũ wa nyina.+ Na nĩ kĩĩ gĩatũmire amũũrage? Nĩ tondũ ciĩko ciake ciarĩ njũru,+ nacio cia mũrũ wa nyina ciarĩ cia ũthingu.+
13 Ariũ a Ithe witũ, mũtikagege atĩ tondũ thĩ nĩ ĩmũthũire.+ 14 Nĩ tũĩ atĩ nĩ tuumĩte thĩinĩ wa gĩkuũ tũgatonya muoyo-inĩ,+ tondũ nĩ twendete ariũ a Ithe witũ.+ Ũrĩa ũtendanaga atũũraga thĩinĩ wa gĩkuũ.+ 15 Mũndũ o wothe ũthũire mũrũ wa Ithe nĩ mũũragani,+ na nĩ mũĩ atĩ gũtirĩ mũũragani ũrĩ na muoyo wa tene na tene thĩinĩ wake.+ 16 Ũndũ ũyũ nĩguo ũtũmĩte tũmenye ũhoro wa wendo, tondũ ũcio nĩ aarutire muoyo wake nĩ ũndũ witũ,+ na ithuĩ nĩ twagĩrĩirũo kũruta mĩoyo itũ nĩ ũndũ wa ariũ a Ithe witũ.+ 17 No mũndũ o wothe ũrĩ na indo cia thĩ ĩno na akona mũrũ wa Ithe arĩ na thĩna no akarega kũmũcaĩra-rĩ, wendo wa Ngai ũngĩgĩkorũo thĩinĩ wake atĩa?+ 18 Twana tũtũ, ithuĩ tũtiagĩrĩirũo kwendana na ciugo kana na kanua,+ ĩndĩ twagĩrĩirũo kwendana na ciĩko+ na ma.+
19 Ũndũ ũcio nĩguo ũrĩtũmaga tũmenye atĩ tuumanĩte na ũhoro ũrĩa wa ma, na tũkagĩa na ũũma thĩinĩ wa* ngoro citũ tũrĩ mbere yake 20 ũhoro-inĩ wĩgiĩ ũndũ o wothe ũrĩa ngoro citũ ingĩtũtuĩra, tondũ Ngai nĩ mũnene gũkĩra ngoro citũ na nĩ oĩ maũndũ mothe.+ 21 Endwa akwa, ngoro citũ ingĩaga gũtũtuĩra-rĩ, no tũkorũo na wĩyathi wa kwaria na Ngai;+ 22 na kĩrĩa gĩothe tũmũhoyaga nĩ atũheaga,+ tondũ nĩ tũrũmagĩrĩra maathani make na tũgeka maũndũ marĩa magĩrĩru maitho-inĩ make. 23 Na rĩrĩ nĩrĩo rĩathani rĩake: atĩ tũgĩe na wĩtĩkio harĩ rĩĩtwa rĩa Mũrũwe Jesu Kristo+ na twendanage,+ o ta ũrĩa aatũheire rĩathani. 24 Makĩria ma ũguo, mũndũ ũrĩa ũrũmagĩrĩra maathani make atũũraga arĩ na ũiguano hamwe nake, nake agatũũra arĩ na ũiguano hamwe na mũndũ ta ũcio.+ Na kũgerera roho ũrĩa aatũheire, nĩ tũmenyaga atĩ atũũraga arĩ na ũiguano hamwe na ithuĩ.+