Marũa ma Mbere Kũrĩ Athesalonike
4 Ngĩrĩkĩrĩria ariũ a Ithe witũ-rĩ, o ta ũrĩa mwaamũkĩrire ũtaaro kuuma kũrĩ ithuĩ wĩgiĩ mĩthiĩre ĩrĩa mwagĩrĩirũo gũthiaga nayo nĩguo mũkenagie Ngai,+ o ta ũrĩa kũna mwĩkaga, twamũũria na twamũthaitha thĩinĩ wa Mwathani Jesu atĩ mwĩkage ũguo o na makĩria. 2 Tondũ nĩ mũĩ motaaro* marĩa twamũheire thĩinĩ wa Mwathani Jesu.
3 Nĩ gũkorũo ũyũ nĩguo wendi wa Ngai, atĩ mũkoragwo mũrĩ atheru+ na mwĩthemage ngomanio itagĩrĩire.*+ 4 O ũmwe wanyu nĩ agĩrĩirũo kũmenya ũrĩa angĩgirĩrĩria mwĩrĩ wake+ nĩguo aikarage arĩ mũtheru+ na arĩ na gĩtĩo, 5 ti na mũkoroko wa merirĩria moru ma ngomanio+ ta marĩa ndũrĩrĩ iria itoĩ Ngai ikoragwo namo.+ 6 Gũtirĩ mũndũ wagĩrĩirũo nĩ gũkĩra mĩhaka ĩrĩa yagĩrĩire na aingĩrĩre kĩhooto kĩa mũrũ wa Ithe ũndũ-inĩ ũcio, nĩ gũkorũo Jehova* nĩ aherithanagia nĩ ũndũ wa maũndũ macio mothe, o ta ũrĩa twamwĩrire hau kabere na tũkĩmũhe mũkaana mũrũmu. 7 Nĩ gũkorũo Ngai ndaatwĩtire nĩ ũndũ wa maũndũ matarĩ matheru, ĩndĩ aatwĩtire nĩ ũndũ wa ũtheru.+ 8 Kwoguo mũndũ ũrĩa ũreganaga na ũndũ ũcio, ti mũndũ areganaga nake ĩndĩ nĩ Ngai,+ ũrĩa ũmũheaga inyuĩ roho wake mũtheru.+
9 O na kũrĩ ũguo, ũhoro-inĩ wĩgiĩ wendo ta wa andũ a nyina ũmwe-rĩ,+ tũtirabatara kũmwandĩkĩra, nĩ gũkorũo inyuĩ ene nĩ mũrutagwo kwendana nĩ Ngai.+ 10 Na nĩ mwĩkaga ũguo kwerekera ariũ a Ithe witũ othe thĩinĩ wa Makedonia guothe. No rĩu ariũ a Ithe witũ tũramũringĩrĩria mũthiĩ na mbere gwĩka ũguo na gĩkĩro kĩnene o na makĩria. 11 Mwĩrutanĩriei gũikaraga mwĩkirĩire+ na kũrũmbũyagia o mũndũ maũndũ make+ na kũrutaga wĩra na moko manyu,+ o ta ũrĩa twamũtaarire, 12 nĩguo mĩthiĩre yanyu ĩkoragwo ĩrĩ mĩega maitho-inĩ ma andũ arĩa marĩ nja,+ mũtekwaga kĩndũ o na kĩmwe.
13 Makĩria ma ũguo ariũ a Ithe witũ-rĩ, tũtingĩenda mũrigwo nĩ* ũhoro wa arĩa makomete gĩkuũ-inĩ,+ nĩguo mũtigakoragwo na kĩeha ta andũ arĩa angĩ matarĩ na kĩĩrĩgĩrĩro.+ 14 Tondũ angĩkorũo tũrĩ na wĩtĩkio atĩ Jesu nĩ aakuire na akĩriũka,+ ũguo no taguo Ngai akaarehe hamwe nake arĩa makomete gĩkuũ-inĩ kũgerera harĩ Jesu.+ 15 Nĩ gũkorũo tũramwĩra kũgerera kiugo kĩa Jehova* atĩrĩ, ithuĩ tũrĩ muoyo arĩa tũgaatigara nginya hĩndĩ ya gũkorũo kuo kwa Mwathani-rĩ, gũtirĩ hĩndĩ tũgaathiĩ mbere ya arĩa makomete gĩkuũ-inĩ; 16 tondũ Mwathani we mwene agaaikũrũka kuuma igũrũ na mũgambo mũnene, na mũgambo wa mũraika ũrĩa mũnene+ arĩ na karumbeta ka Ngai, nao arĩa makuĩte marĩ na ũiguano na Kristo nĩo makaamba kũriũka.+ 17 Thutha ũcio ithuĩ tũrĩ muoyo arĩa tũgaakorũo tũtigarĩte, tũkoywo tũtwarũo matu-inĩ hamwe nao+ tũgacemanie na Mwathani+ rĩera-inĩ; na kwoguo hingo ciothe tũgaakoragwo hamwe na Mwathani.+ 18 Nĩ ũndũ ũcio ikaragai mũkĩũmanagĩrĩria na ciugo icio.