Atiirĩrĩri Bũrũri
4 No rĩrĩ, thutha wa Ehudi gũkua, o rĩngĩ Aisiraeli magĩka maũndũ moru maitho-inĩ ma Jehova.+ 2 Nĩ ũndũ ũcio Jehova akĩmendia guoko-inĩ kwa Jabini mũthamaki wa Kanaani,+ ũrĩa wathamakaga Hazoru. Mũnene wa mbũtũ yake aarĩ Sisera, ũrĩa waikaraga Haroshethu+ ya ndũrĩrĩ.* 3 Aisiraeli magĩkaĩra Jehova,+ tondũ Jabini aarĩ na ngaari 900 cia mbaara irĩ na mĩthece ya kĩgera,*+ na aahinyĩrĩirie Aisiraeli+ atarĩ na tha mĩaka 20.
4 Na rĩrĩ, Debora, mũnabii+ ũrĩa wahikĩtio nĩ Lapidothu, nĩwe watuagĩra Isiraeli hĩndĩ ĩyo. 5 Aamenyerete gũikara thĩ rungu rwa mũtĩ wa mũkĩndũ wa Debora gatagatĩ ka Rama+ na Betheli+ gĩcigo-inĩ kĩrĩa kĩrĩ irĩma kĩa Efiraimu; Aisiraeli maambataga magathiĩ kũrĩ we nĩguo amatuĩre. 6 Agĩtũmanĩra Baraki+ mũrũ wa Abinoamu kuuma Kedeshi-nafitali+ akĩmwĩra atĩrĩ: “Na githĩ Jehova Ngai wa Isiraeli ndathanĩte? ‘Thiĩ wĩyarĩre* Kĩrĩma-inĩ gĩa Taboru, na woe arũme 10,000 a Nafitali na Zebuluni mũthiĩ nao. 7 Nĩ ngũkũrehera Sisera mũnene wa mbũtũ ya Jabini, hamwe na ngaari ciake cia mbaara na thigari ciake karũũĩ-inĩ ga Kishoni,+ na ndĩmũneane guoko-inĩ gwaku.’”+
8 Nĩ ũndũ ũcio Baraki akĩmwĩra: “Nĩ ngũthiĩ angĩkorũo nĩ tũgũthiĩ nawe, no angĩkorũo tũtigũthiĩ nawe, ndigũthiĩ.” 9 Nake akiuga ũũ: “Hatarĩ nganja nĩ tũgũthiĩ hamwe. O na kũrĩ ũguo, mbaara ĩrĩa ũrathiĩ kũrũa ndĩgũgũtũũgĩria, nĩ gũkorũo Jehova ekũneana Sisera guoko-inĩ kwa mũtumia.”+ Thutha ũcio Debora agĩũkĩra na marĩ hamwe na Baraki magĩthiĩ Kedeshi.+ 10 Baraki agĩta Zebuluni na Nafitali+ mathiĩ kũu Kedeshi, na arũme 10,000 makĩmũrũmĩrĩra. O na Debora akĩambata hamwe nake.
11 Na rĩrĩ, Heberi Mũkeni nĩ eeyamũranĩtie na Akeni,+ njiarũa cia Hobabu ithe wa mũtumia wa Musa,+ na aambĩte hema yake hakuhĩ na mũtĩ ũrĩa mũnene ũrĩ Zaananimu, ũrĩa ũrĩ Kedeshi.
12 Sisera agĩkinyĩrio ndũmĩrĩri atĩ Baraki mũrũ wa Abinoamu nĩ ambatĩte Kĩrĩma-inĩ gĩa Taboru.+ 13 O rĩo Sisera agĩcokanĩrĩria ngaari ciake ciothe cia mbaara—ngaari 900 cia mbaara irĩ na mĩthece ya kĩgera*—na thigari ciothe iria aarĩ nacio kuuma Haroshethu ya ndũrĩrĩ nĩguo mathiĩ karũũĩ-inĩ ga Kishoni.+ 14 Hĩndĩ ĩyo Debora akĩra Baraki ũũ: “Arahũka, nĩ gũkorũo ũyũ nĩguo mũthenya ũrĩa Jehova ekũneana Sisera guoko-inĩ gwaku. Na githĩ Jehova ndarathiĩ arĩ mbere yaku?” Nake Baraki agĩikũrũka kuuma Kĩrĩma-inĩ gĩa Taboru arĩ na arũme 10,000 mamũrũmĩrĩire. 15 Nake Jehova agĩtũma Sisera na ngaari ciake ciothe cia mbaara na mbũtũ yothe matukanĩrũo+ marĩ mbere ya rũhiũ rwa njora rwa Baraki. Nake Sisera akiuma ngaari-inĩ yake ya mbaara akĩũra na magũrũ. 16 Baraki agĩtengʼeria ngaari icio cia mbaara na mbũtũ ĩyo o nginya Haroshethu ya ndũrĩrĩ. Nĩ ũndũ ũcio mbũtũ yothe ya Sisera ĩkĩniinwo na rũhiũ rwa njora; gũtirĩ o na ũmwe watigarire.+
17 No Sisera akĩũra na magũrũ nginya hema-inĩ ya Jaeli+ mũtumia wa Heberi+ Mũkeni, nĩ ũndũ nĩ kwarĩ na thayũ gatagatĩ-inĩ ka Jabini+ mũthamaki wa Hazoru na andũ a nyũmba ya Heberi Mũkeni. 18 Nake Jaeli akiuma nja agatũnge Sisera, akĩmwĩra ũũ: “Ingĩra mwathi wakwa, tonya gũkũ thĩinĩ. Ndũgetigĩre.” Nĩ ũndũ ũcio akĩingĩra thĩinĩ wa hema yake, nake akĩmũhumbĩra na mũrengeti. 19 Nake Sisera akĩmwĩra atĩrĩ: “Ndagũthaitha ũũhe tũũĩ tũnini nyue, nĩ gũkorũo ndĩ mũnyotu.” Agĩgĩkunũra cuba ya iria ya rũũa na akĩmũhe iria anyue,+ na thutha ũcio akĩmũhumbĩra rĩngĩ. 20 Sisera akĩmwĩra ũũ: “Rũgama mũromo-inĩ wa hema, na mũndũ angĩũka akũũrie atĩrĩ, ‘Kũrĩ mũndũ ũrĩ gũkũ?’ ũmwĩre, ‘Aca!’”
21 No Jaeli mũtumia wa Heberi akĩoya mũcumarĩ wa hema na nyundo. Na Sisera arĩ toro biũ arĩ mũnogu, Jaeli akĩmũkuhĩrĩria aceemete na akĩhũũrĩrĩra mũcumarĩ ũcio thikĩrĩrio-inĩ ciake, akĩũhũũrĩrĩra nginya ũgĩĩthecerera thĩ, nake agĩkua.+
22 Baraki agĩthiĩ kuo agĩetha Sisera, nake Jaeli akiuma akamũtũnge na akĩmwĩra atĩrĩ: “Ũka nguonie mũndũ ũrĩa ũretha.” Baraki agĩtonya marĩ hamwe nake akĩona Sisera akomete arĩ mũkuũ, mũcumarĩ wa hema ũthecereirio thikĩrĩrio-inĩ ciake.
23 Kwoguo mũthenya ũcio Ngai agĩtooria Jabini mũthamaki wa Kanaani mbere ya Aisiraeli.+ 24 Guoko kwa Aisiraeli gũgĩkĩrĩrĩria kũgĩa na hinya igũrũ rĩa Jabini mũthamaki wa Kanaani,+ nginya makĩniina Jabini mũthamaki wa Kanaani.+