Athamaki wa Kerĩ
22 Josia+ aarĩ na mĩaka ĩnana rĩrĩa aatuĩkire mũthamaki, na agĩathana mĩaka 31 thĩinĩ wa Jerusalemu.+ Nyina eetagwo Jedida mwarĩ wa Adaia kuuma Bozikathu.+ 2 Nake agĩka maũndũ marĩa magĩrĩire maitho-inĩ ma Jehova, na akĩrũmĩrĩra njĩra ciothe cia Daudi ithe wao wa tene,+ na ndaigana kũũra njĩra agĩthiĩ mwena wa ũrĩo kana wa ũmotho.
3 Mwaka-inĩ wa 18 wa Mũthamaki Josia, mũthamaki nĩ aatũmire Shafani ũrĩa mwandĩki, o ũcio warĩ mũrũ wa Azalia mũrũ wa Meshulamu, athiĩ nyũmba-inĩ ya Jehova,+ akĩmwĩra atĩrĩ: 4 “Ambata ũthiĩ kũrĩ Hilikia+ mũthĩnjĩri-Ngai ũrĩa mũnene, ũmwĩre acokanĩrĩrie mbeca ciothe iria irehagwo nyũmba-inĩ ya Jehova,+ o icio aikaria a mĩrango monganĩtie kuuma kũrĩ andũ.+ 5 Nao macinengere andũ arĩa mamũrĩtwo marũgamĩrĩre wĩra nyũmba-inĩ ya Jehova, acio nao macinengere arĩa maarutaga wĩra nyũmba-inĩ ya Jehova, arĩa magĩrĩirũo gũthondeka kũrĩa gũthũkangĩte* nyũmba-inĩ ĩyo,+ 6 ũguo nĩ kuuga, macinengere mabundi, aaki, na mabundi a mahiga; na magĩrĩirũo gũcihũthĩra kũgũra mbaũ na mahiga maicũhie ma gũthondeka nyũmba ĩyo.+ 7 No matiagĩrĩirũo gũtuĩrio ũrĩa marahũthĩra mbeca icio manengeretwo, tondũ nĩ ehokeku.”+
8 Thutha ũcio Hilikia mũthĩnjĩri-Ngai ũrĩa mũnene akĩra Shafani ũcio mwandĩki atĩrĩ:+ “Nĩ ndona ibuku rĩa Watho+ thĩinĩ wa nyũmba ya Jehova.” Nĩ ũndũ ũcio Hilikia akĩnengera Shafani ibuku rĩu, nake akĩambĩrĩria kũrĩthoma.+ 9 Nake Shafani ũcio mwandĩki agĩgĩthiĩ kũrĩ mũthamaki akĩmwĩra atĩrĩ: “Ndungata ciaku nĩ cionoretie mbeca iria irarĩ thĩinĩ wa nyũmba ĩyo, na igacineana kũrĩ arĩa mamũrĩtwo kũrũgamĩrĩra wĩra nyũmba-inĩ ya Jehova.”+ 10 Ningĩ Shafani ũcio mwandĩki akĩra mũthamaki ũũ: “Harĩ ibuku+ nengeretwo nĩ Hilikia ũrĩa mũthĩnjĩri-Ngai.” Shafani agĩcoka akĩambĩrĩria kũrĩthoma arĩ mbere ya mũthamaki.
11 Rĩrĩa mũthamaki aaiguire ciugo cia ibuku rĩu rĩa Watho, o hĩndĩ ĩyo agĩtembũra nguo ciake.+ 12 Thutha ũcio mũthamaki agĩatha Hilikia ũrĩa mũthĩnjĩri-Ngai, Ahikamu+ mũrũ wa Shafani, Akibori mũrũ wa Mikaia, Shafani ũrĩa mwandĩki, na Asaia ndungata ya mũthamaki akĩmeera atĩrĩ: 13 “Thiĩi mũtuĩrie ũhoro harĩ Jehova nĩ ũndũ wakwa, nĩ ũndũ wa andũ, na nĩ ũndũ wa Juda yothe igũrũ rĩgiĩ ciugo cia ibuku rĩrĩ rĩonetwo; nĩ gũkorũo marakara ma Jehova marĩa marakana gũtwerekera nĩ manene,+ tondũ maithe maitũ ma tene matiathĩkĩire ciugo cia ibuku rĩrĩ na njĩra ya kũrũmĩrĩra maũndũ marĩa mothe mandĩkĩtwo matwĩgiĩ.”
14 Nĩ ũndũ ũcio Hilikia ũcio mũthĩnjĩri-Ngai, Ahikamu, Akibori, Shafani, na Asaia magĩthiĩ kũrĩ Hulida mũtumia ũrĩa mũnabii.+ Aarĩ mũtumia wa Shalumu mũrũ wa Tikiva mũrũ wa Harihasi, ũrĩa wamenyagĩrĩra harĩa haaigagwo nguo, na aaikaraga Gĩcigo-inĩ Kĩrĩa Kĩerũ kĩa Jerusalemu; na makĩaranĩria nake kuo.+ 15 Nake akĩmeera atĩrĩ: “Ũũ nĩguo Jehova Ngai wa Isiraeli ekuuga, ‘Ĩrai mũndũ ũcio ũmũtũmire kũrĩ niĩ atĩrĩ: 16 “Ũũ nĩguo Jehova ekuuga, ‘Nĩ ngaarehera kũndũ gũkũ thĩna o hamwe na aikari a kuo, hingie ciugo ciothe cia ibuku rĩu mũthamaki wa Juda athomete.+ 17 Tondũ nĩ mandiganĩirie na makarutĩra ngai ingĩ ndogo ya magongona+ nĩguo mandakarie na wĩra wothe wa moko mao,+ mangʼũrĩ makwa nĩ magaakana kwerekera kũndũ gũkũ na matikaahorio.’”+ 18 No mũthamaki ũcio wa Juda ũmũtũmĩte mũtuĩrie ũhoro kũrĩ Jehova, mwagĩrĩirũo kũmwĩra atĩrĩ, “Jehova Ngai wa Isiraeli ekuuga ũũ: ‘Ha ũhoro wa ciugo iria ũiguĩte, 19 tondũ ngoro yaku nĩ yororoire na wenyihia+ mbere ya Jehova thutha wa kũigua ũrĩa njugĩte kwerekera kũndũ gũkũ o hamwe na aikari a kuo—atĩ nĩ magaatuĩka kĩndũ gĩa kũguoyohia na matuĩke kĩrumi—nawe watembũra nguo ciaku+ na warĩra ũrĩ mbere yakwa, o na niĩ nĩ ndakũigua, ũguo nĩguo Jehova ekuuga. 20 Na nĩkĩo ngaagũturanĩra na maithe maku ma tene,* na nĩ ũgaakomio mbĩrĩra-inĩ yaku na thayũ, na maitho maku matikona thĩna ũrĩa wothe ngaarehera kũndũ gũkũ.’”’” Nao magĩcoka magĩtwarĩra mũthamaki ũhoro ũcio.