Kũrĩ Aroma
16 Ndĩramũmenyithia ũhoro wa mwarĩ wa Ithe witũ Fibi, ũrĩa ũtungataga thĩinĩ wa kĩũngano kĩrĩa gĩkoragwo Kenkirea,+ 2 nĩgetha mũmũnyite ũgeni thĩinĩ wa Mwathani o ta ũrĩa kwagĩrĩire harĩ arĩa aamũre na mũmũhe ũteithio o wothe angĩbatara,+ nĩ gũkorũo o nake we mwene nĩ aagitĩrire andũ aingĩ, nginya niĩ.
3 Ngeithĩriai Priska na Akila,+ arutithania wĩra hamwe na niĩ thĩinĩ wa Kristo Jesu, 4 o acio maaingĩririe ngingo ciao ũgwati-inĩ nĩ ũndũ wakwa,+ na to niĩ nyiki ndĩramacokeria ngatho no nĩ nginya ciũngano ciothe cia ndũrĩrĩ. 5 Ningĩ geithiai kĩũngano kĩrĩa gĩcemanagia kwao mũciĩ.+ Geithiai Epainita, ũrĩa nyendete, o ũcio maciaro ma mbere ma Kristo thĩinĩ wa Asia. 6 Geithiai Mariamu, ũrĩa ũrutĩte wĩra na kĩyo nĩ ũndũ wanyu. 7 Na mũgeithie Andronika na Juniasi, andũ a mbarĩ citũ+ arĩa moohetwo hamwe na niĩ, na nĩ andũ moĩkaine wega nĩ atũmwo na makoretwo na ũiguano hamwe na Kristo ihinda iraya kũngĩra.
8 Ngeithĩriai Ampliata, ũrĩa nyendete thĩinĩ wa Mwathani. 9 Na mũgeithie Aribana, mũrutithania wĩra hamwe na ithuĩ thĩinĩ wa Kristo, na Stakiko, ũrĩa nyendete. 10 Geithiai Apelesi, ũrĩa wĩtĩkĩrĩkĩte thĩinĩ wa Kristo. Geithiai andũ a nyũmba ya Aristobulo. 11 Geithiai Herodioni, ũrĩa wa mbarĩ citũ. Na mũgeithie andũ a nyũmba ya Narikisa arĩa marĩ thĩinĩ wa Mwathani. 12 Geithiai Trufena na Trufosa, atumia arĩa marutaga wĩra na kĩyo thĩinĩ wa Mwathani. Geithiai Perisi, ũrĩa twendete, nĩ gũkorũo nĩ arutĩte wĩra na kĩyo thĩinĩ wa Mwathani. 13 Geithiai Rufasi, ũrĩa mũthuure thĩinĩ wa Mwathani, na mũgeithie nyina, ũrĩa o na niĩ njĩtaga maitũ. 14 Geithiai Asinkrita, Filegoni, Herime, Patiroba, Herima, na ariũ a Ithe witũ arĩa makoragwo hamwe nao. 15 Geithiai Filologa na Julia, Neria na mwarĩ wa nyina, na Olimpasi, na arĩa othe aamũre makoragwo hamwe nao. 16 Geithaniai inyuĩ ene na ngeithi theru cia kũmumunyana. Nĩ mwageithio nĩ ciũngano ciothe cia Kristo.
17 Rĩu ariũ a Ithe witũ-rĩ, ndamũthaitha mwĩmenyagĩrĩre arĩa marehaga ngayũkano na magatũma andũ mahĩngwo, mũgarũ na ũrutani ũrĩa mwĩrutĩte, na mũmethemage.+ 18 Tondũ andũ a mũthemba ũcio makoragwo marĩ ngombo, ti cia Mwathani witũ Kristo, no nĩ cia merirĩria mao* ene, na kũgerera mĩario yao mĩnyoroku na ciugo cia kĩgaathi, nĩ mahĩtithagia ngoro cia andũ arĩa mataramenya. 19 Wathĩki wanyu nĩ ũmenyekete nĩ andũ othe, na kwoguo nĩ ngenaga nĩ ũndũ wanyu. No ngwenda mũtuĩke ogĩ ũhoro-inĩ wĩgiĩ maũndũ marĩa mega, na mũtigakorũo na ũcuke maũndũ-inĩ marĩa moru.+ 20 Nake Ngai ũrĩa ũheanaga thayũ nĩ ekũhehenja Shaitani+ ica ikuhĩ rungu rwa makinya manyu. Ũtugi mũnene wa Mwathani witũ Jesu ũrokorũo hamwe na inyuĩ.
21 Nĩ mwageithio nĩ Timotheo, mũrutithania wĩra hamwe na niĩ, ningĩ nĩ mwageithio nĩ Lukio, Jasoni, na Sosipata, arĩa a mbarĩ citũ.+
22 Niĩ Tatiasi, o niĩ mwandĩki wa marũa maya, nĩ ndamũgeithia thĩinĩ wa Mwathani.
23 Nĩ mwageithio nĩ Gayo,+ ũrĩa ũũnyitĩte ũgeni, na o we kĩũngano gĩothe gĩcemanagia gwake. Ningĩ nĩ mwageithio nĩ Erasito, mũigi kĩgĩna* wa itũũra, o na mũrũ wa nyina Kwarito nĩ amũgeithia. 24 *——
25 Rĩu-rĩ, kũrĩ Ũrĩa ũngĩhota gũtũma mwĩhande wega kũringana na ũhoro mwega ũrĩa hunjagia na ndũmĩrĩri ĩgiĩ Jesu Kristo, kũringana na kũguũrio kwa hitho ĩrĩa theru+ ĩkoretwo hitho-inĩ ihinda iraya mũno 26 no rĩu hitho ĩyo nĩ ĩguũrĩtio na ĩkamenyithanio kũgerera Maandĩko ma ũrathi gatagatĩ-inĩ ka ndũrĩrĩ ciothe kũringana na rĩathani rĩa Ngai ũrĩa ũtũũraga tene na tene, nĩguo kũgĩe na wathĩki kũgerera wĩtĩkio; 27 Ngai o we wiki mũũgĩ+ arogoocwo tene na tene kũgerera Jesu Kristo. Ameni.