Zekaria

2 Ningĩ ngĩtiira maitho ngĩona mũndũ warĩ na rũrigi rwa gũthima+ guoko-inĩ gwake. 2 Nĩ ũndũ ũcio ngĩmũũria atĩrĩ: “Wathiĩ kũ?”

Nake akĩnjĩra: “Ndathiĩ gũthima Jerusalemu, nĩgetha nyone ũrĩa wariĩ na ũraihu wayo ũigana.”+

3 Na rĩrĩ, mũraika ũcio waaragia na niĩ agĩthiĩ, na mũraika ũngĩ agĩũka kũmũtũnga. 4 Nake akĩmwĩra ũũ: “Tengʼera harĩa wĩre mwanake ũcio atĩrĩ, ‘“Jerusalemu nĩ ĩgaatũũrũo rĩngĩ+ ĩrĩ itũũra rĩtarĩ thingo, nĩ ũndũ wa andũ arĩa othe magaakorũo thĩinĩ wayo o na mahiũ.+ 5 Na nĩ ngaatuĩka rũthingo rwa mwaki harĩ yo ndĩmĩthiũrũrũkĩrie,+ na nĩ ngaatuĩka riri thĩinĩ wayo,”’”+ ũguo nĩguo Jehova ekuuga.

6 “Ũkai! Ũkai! Ũrai muume bũrũri wa mwena wa rũgongo,”+ ũguo nĩguo Jehova ekuuga.

“Nĩ gũkorũo nĩ ndĩmũhurunjĩte huho-inĩ iria inya cia igũrũ,”+ ũguo nĩguo Jehova ekuuga.

7 “Ũka, wee Zayuni! Wĩthare, o wee ũikaraga hamwe na mwarĩ wa Babuloni.+ 8 Nĩ gũkorũo ũũ nĩguo Jehova mũnene wa ita ekuuga, o ũcio thutha wa kũgoocithio* ũndũmĩte kũrĩ ndũrĩrĩ iria ciatahaga indo cianyu:+ ‘Mũndũ o wothe ũmũhutagia nĩ kĩũma kĩa riitho rĩakwa ahutagia.+ 9 Tondũ rĩu nĩ ngwambararia guoko gwakwa ndĩmokĩrĩre, na magaatuĩka kĩndũ gĩa gũtahwo nĩ ngombo ciao ene.’+ Na hatarĩ nganja nĩ mũkaamenya atĩ Jehova mũnene wa ita nĩwe ũndũmĩte.

10 “Anĩrĩra nĩ gũkena, wee mwarĩ wa Zayuni;+ nĩ gũkorũo nĩ ndĩroka,+ na ndĩrĩikaraga gatagatĩ-inĩ gaku,”+ ũguo nĩguo Jehova ekuuga. 11 “Mũthenya ũcio ndũrĩrĩ nyingĩ nĩ ikeegwatania na Jehova,+ nacio ituĩke andũ akwa; na nĩ ngaaikara gatagatĩ-inĩ gaku.” Na nĩ ũkaamenya atĩ Jehova mũnene wa ita nĩwe ũndũmĩte kũrĩ wee. 12 Jehova nĩ akeegwatĩra Juda ĩtuĩke igai rĩake kũndũ kũu gũtheru, na nĩ agaathuura Jerusalemu o rĩngĩ.+ 13 Kirai mũrĩ mbere ya Jehova, inyuĩ mĩĩrĩ yothe ya nyama,* nĩ gũkorũo nĩ aroya ikinya arĩ gĩikaro-inĩ gĩake gĩtheru.