Ezekieli

1 Mwaka-inĩ wa 30, mũthenya wa gatano wa mweri wa kana, hĩndĩ ĩrĩa ndarĩ hakuhĩ na rũũĩ rwa Kebari+ hamwe na andũ arĩa maatwarĩtwo ithamĩrio,+ igũrũ nĩ rĩahingũkire na ngĩambĩrĩria kuona cioneki cia Ngai. 2 Mũthenya wa gatano wa mweri ũcio—ũguo nĩ kuuga, mwaka wa gatano kuuma rĩrĩa Mũthamaki Jehoiakini aatwarirũo ithamĩrio+— 3 kiugo kĩa Jehova nĩ gĩakinyĩire Ezekieli* mũrũ wa Buzi ũrĩa mũthĩnjĩri-Ngai, arĩ hakuhĩ na rũũĩ rwa Kebari bũrũri-inĩ wa Akalidei.+ Guoko kwa Jehova gũgĩũka igũrũ rĩake arĩ kũu.+

4 Na rĩrĩa ndarorire, ngĩona rũhuho rũnene mũno+ ruumĩte mwena wa rũgongo, na kwarĩ na itu inene na mwaki wamenũkaga+ ũthiũrũrũkĩirio* nĩ ũtheri mũkengu, na hau gatagatĩ ka mwaki ũcio haarĩ na kĩndũ kĩahaanaga ta cuma ĩrahenia.*+ 5 Mwaki-inĩ ũcio nĩ haarĩ na indo ciahaanaga ta ciũmbe inya irĩ muoyo,+ na o kĩũmbe kĩarĩ na mũhianĩre ta wa mũndũ. 6 O kĩmwe gĩacio kĩarĩ na mothiũ mana na mathagu mana.+ 7 Magũrũ ma cio maarĩ marũngarũ, na makinya ma magũrũ ma cio maatariĩ ta ma gacaũ, na maahenagia o ta gĩcango gĩkumuthĩtwo.+ 8 Ciarĩ na moko ta ma mũndũ rungu rwa mathagu ma cio mĩena yothe ĩna, na ciothe inya ciarĩ na mothiũ na mathagu. 9 Mathagu ma cio nĩ maahutanĩtie. Ningĩ itiagarũrũkaga igĩthiĩ; ciothe ciathiaga irũngĩrĩirie na mbere.+

10 Mũhianĩre wa mothiũ ma cio watariĩ ũũ: O kĩũmbe harĩ icio inya kĩarĩ na ũthiũ wa mũndũ, na mwena wa ũrĩo kĩarĩ na ũthiũ wa mũrũthi,+ mwena wa ũmotho ũthiũ wa ndegwa,+ na o kĩmwe harĩ icio inya kĩarĩ na ũthiũ+ wa nderi.+ 11 Ũguo nĩguo mothiũ ma cio maatariĩ. Mathagu ma cio maatambũrũkĩte na igũrũ. O kĩũmbe kĩarĩ na mathagu merĩ maahutanĩtie, na mathagu merĩ maahumbĩrĩte mwĩrĩ wakĩo.+

12 O kĩũmbe gĩathiaga kĩrũngĩrĩirie na mbere, na ciathiaga kũrĩa guothe roho wacitongoragia ithiĩ.+ Itiagarũrũkaga igĩthiĩ. 13 Na ciũmbe icio irĩ muoyo ciarĩ na mũhianĩre wa makara marakana, na kwarĩ na kĩndũ kĩahaanaga ta icinga cia mwaki mũkengu ciathiaga na mbere na igacoka thutha gatagatĩ-inĩ ga ciũmbe icio irĩ muoyo, na rũheni nĩ rwahenũkaga kuuma mwaki-inĩ ũcio.+ 14 Na rĩrĩa ciũmbe icio irĩ muoyo ciathiaga na mbere na igacoka na thutha, mũthiĩre wacio watariĩ ta mĩhenũko ya rũheni.

15 Rĩrĩa nderoragĩra ciũmbe icio irĩ muoyo, nĩ ndonire kũgũrũ kwa ngaari gũkinyĩte thĩ mwena-inĩ wa o kĩmwe gĩa ciũmbe icio irĩ muoyo ciarĩ na mothiũ mana.+ 16 Magũrũ macio na ũrĩa maathondeketwo, moonekaga makĩhenia ta ihiga rĩa krisolito, na mothe mana nĩ maahaanaine. Mũhianĩre na mũthondekere wamo woonekaga ta o kũgũrũ kwaharũkĩte thĩinĩ wa kũngĩ. 17 Na magĩthiĩ-rĩ, maathiaga mwena o wothe harĩ mĩena yothe ĩna matekũgarũrũka magĩthiĩ. 18 Mĩbara yamo yaraihĩte na igũrũ mũno ũũ atĩ yarĩ ya kũgegania, na mĩbara ya magũrũ macio mothe mana yaiyũire maitho kũndũ guothe.+ 19 Ciũmbe icio irĩ muoyo ingĩathiire, magũrũ macio maatwaranaga nacio, na ciũmbe icio irĩ muoyo ingĩambatire na igũrũ kuuma thĩ, magũrũ macio o namo nĩ maambataga.+ 20 Ciathiaga kũrĩa roho wacitongoragia ithiĩ, kũrĩa guothe roho wathiaga. Magũrũ macio maambataga na igũrũ hamwe nacio, tondũ roho ũrĩa watongoragia ciũmbe icio irĩ muoyo* noguo warĩ thĩinĩ wa magũrũ macio. 21 Rĩrĩa ciũmbe icio ciathiĩ, o namo magũrũ magathiĩ; na hĩndĩ ĩrĩa ciarũgama, o namo makarũgama; na rĩrĩa ciambata na igũrũ kuuma thĩ, magũrũ macio makambata hamwe nacio, tondũ roho ũrĩa watongoragia ciũmbe icio irĩ muoyo noguo warĩ thĩinĩ wa magũrũ macio.

22 Igũrũ rĩa mĩtwe ya ciũmbe icio irĩ muoyo kwarĩ na kĩndũ gĩatariĩ ta mũtambũrũko wakengaga ta mbarabu ya magegania, na watambũrũkĩte igũrũ rĩa mĩtwe yacio.+ 23 Rungu rwa mũtambũrũko ũcio, mathagu ma cio nĩ maatambũrũkĩte na igũrũ, rĩmwe rĩerekeire harĩ rĩu rĩngĩ. O kĩũmbe kĩarĩ na mathagu merĩ ma kũhumbĩra mwena ũmwe wa mwĩrĩ wakĩo na merĩ ma kũhumbĩra mwena ũcio ũngĩ. 24 Rĩrĩa ndaiguire mũgambo wa mathagu ma cio, warĩ ta mũrurumo wa maĩ maingĩ magĩtherera, ta mũgambo wa Mwene-Hinya-Wothe.+ Rĩrĩa ciathiĩ, mũgambo wacio warĩ ta wa mbũtũ. Na rĩrĩa ciarũgama, ciacokagia mathagu ma cio na thĩ.

25 Ningĩ nĩ kwaiguĩkaga mũgambo igũrũ rĩa mũtambũrũko ũcio warĩ igũrũ rĩa mĩtwe yacio. (Ciarũgama, ciacokagia mathagu ma cio na thĩ.) 26 Na igũrũ rĩa mũtambũrũko ũrĩa warĩ igũrũ rĩa mĩtwe yacio kwarĩ na kĩndũ gĩatariĩ ta ihiga rĩa safia,+ na kĩahaanaga ta gĩtĩ kĩa ũnene.+ Igũrũ rĩa gĩtĩ kĩu kĩa ũnene kwarĩ na kĩndũ kĩarĩ na mũhianĩre ta wa mũndũ.+ 27 Kuuma harĩa hoonekaga ta arĩ ho njohero yake gũthiĩ na igũrũ, ngĩona kĩndũ gĩatariĩ ta cuma ĩrahenia+ ĩrĩa yahaanaga mwaki ũrahenia; na kuuma njohero-inĩ yake gũcoka na thĩ, ngĩona kĩndũ kĩahaanaga mwaki.+ Na aathiũrũrũkĩirio nĩ ũtheri mũkengu 28 watariĩ ta wa mũkũnga-mbura+ ũrĩ itu-inĩ gũkiura. Ũguo nĩguo ũtheri ũcio wamũthiũrũrũkĩirie wahaanaga. Watariĩ ta riri wa Jehova.+ Rĩrĩa ndawonire, ngĩĩgũithia ngĩturumithia ũthiũ thĩ na ngĩambĩrĩria kũigua mũgambo wa mũndũ akĩaria.