Zekaria

14 “Atĩrĩrĩ, mũthenya nĩ ũroka, mũthenya wa Jehova, rĩrĩa indo ciaku* iria igaatahwo ikaagayanĩrũo thĩinĩ waku. 2 Nĩ ngaacokanĩrĩria ndũrĩrĩ ciothe irũe mbaara na Jerusalemu; na itũũra rĩu nĩ rĩkeegwatĩrũo na nyũmba ciarĩo itahwo na atumia manyitwo kĩa hinya. Na nuthu ya itũũra rĩu nĩ ĩgaatwarũo ithamĩrio, no arĩa magaatigara gatagatĩ-inĩ ka andũ matikeeherio kuuma itũũra-inĩ rĩu.

3 “Jehova nĩ akooimagara na arũe na ndũrĩrĩ icio+ o ta ũrĩa arũaga mũthenya wa mbaara.+ 4 Mũthenya ũcio magũrũ make nĩ makaarũgama igũrũ rĩa Kĩrĩma kĩa Mĩtamaiyũ+ kĩrĩa kĩngʼetheire Jerusalemu mwena wa irathĩro; na Kĩrĩma kĩu kĩa Mĩtamaiyũ nĩ gĩgaatũkana maita merĩ, kuuma mwena wa irathĩro nginya wa ithũĩro, na hagĩe mũkuru mũnene mũno; na nuthu ĩmwe ya kĩrĩma kĩu nĩ ĩgaathiĩ mwena wa rũgongo, na nuthu ĩyo ĩngĩ ĩthiĩ mwena wa mũhuro. 5 Nĩ mũkoora mũthiĩ mũkuru-inĩ wa irĩma ciakwa, tondũ mũkuru ũcio wa irĩma ũgaakorũo ũkinyĩte o nginya Azeli. No mũhaka mũkoora, o ta ũrĩa muorire nĩ ũndũ wa gĩthingithia matukũ-inĩ ma Mũthamaki Uzia wa Juda.+ Na Jehova Ngai wakwa nĩ agooka, na arĩa atheru othe magaakorũo hamwe nake.+

6 “Mũthenya ũcio gũtigaakorũo na ũtheri mũkengu+—indo igaakorũo ciũmagarĩte.* 7 Na ũgaakorũo ũrĩ mũthenya ũmwe ũĩkaine atĩ nĩ wa Jehova.+ Gũtigaakorũo na mũthenya kana ũtukũ; na ihinda rĩa hwaĩ-inĩ gũgaakorũo na ũtheri. 8 Mũthenya ũcio maĩ marĩ muoyo+ nĩ magaatherera kuuma Jerusalemu,+ nuthu yamo ĩthiĩ yerekeire iria rĩa mwena wa irathĩro*+ na nuthu ĩyo ĩngĩ yerekere iria rĩa mwena wa ithũĩro.*+ Ũndũ ũcio ũgeekĩka hĩndĩ ya ũrugarĩ na hĩndĩ ya heho. 9 Na Jehova agaatuĩka Mũthamaki wa thĩ yothe.+ Mũthenya ũcio Jehova agaakorũo arĩ ũmwe,+ na rĩĩtwa rĩake rĩkorũo rĩrĩ rĩmwe.+

10 “Bũrũri wothe ũgaakorũo ũtariĩ ta Araba,+ kuuma Geba+ nginya Rimoni+ mwena wa mũhuro wa Jerusalemu; na itũũra rĩu nĩ rĩgaatũũgĩra na rĩtũũrũo rĩrĩ handũ harĩo,+ kuuma Kĩhingo-inĩ kĩa Benjamini+ nginya harĩa Kĩhingo kĩa Mbere kĩrĩ, o nginya Kĩhingo-inĩ gĩa Kona, na kuuma Nyũmba-inĩ Ndaya na Igũrũ ya Hananeli+ o nginya ihihĩro-inĩ cia ndibei cia* mũthamaki. 11 Na andũ nĩ magaaikaraga kuo; na gũtigaacoka gũkorũo na kĩrumi kĩa mwanangĩko rĩngĩ,+ na Jerusalemu nĩ ĩgaaikarũo kũrĩ na ũgitĩri.+

12 “Na rĩrĩ nĩrĩo ihũũra rĩrĩa Jehova akaahũũra ikundi ciothe cia andũ iria irũaga mbaara na Jerusalemu:+ Nyama cia mĩĩrĩ yao ikaabutha o marũgamĩte na magũrũ mao, maitho mao makaabutha marĩ marima-inĩ mamo, na nĩmĩ ciao ibuthe irĩ tũnua-inĩ twao.

13 “Mũthenya ũcio gũtukanĩrũo kũrĩa Jehova akaarehe nĩ gũgaatherema gatagatĩ-inĩ kao; na o ũmwe wao nĩ akaanyita guoko kwa mũratawe, na guoko gwake gũũkĩrĩre guoko kwa mũratawe.*+ 14 Juda o nayo nĩ ĩkaanyitanĩra mbaara-inĩ kũu Jerusalemu; na ũtonga wa ndũrĩrĩ ciothe iria ithiũrũrũkĩirie nĩ ũgaacokanĩrĩrio, thahabu na betha na nguo nyingĩ mũno.+

15 “Na ihũũra o ta rĩu nĩ rĩgaakora nginya mbarathi, nyũmbũ, ngamĩra, ndigiri, na mahiũ mothe marĩa marĩ kambĩ-inĩ icio.

16 “Mũndũ o wothe ũgaatigara kuuma harĩ ndũrĩrĩ iria ciothe ciũkagĩrĩra Jerusalemu nĩ akaambataga o mwaka o mwaka+ nĩguo akainamĩrĩre* Mũthamaki, o we Jehova mũnene wa ita,+ na akũngũĩre Gĩathĩ gĩa Ithũnũ.*+ 17 No mũndũ o wothe gatagatĩ-inĩ ka famĩlĩ cia gũkũ thĩ angĩkaaga kwambata Jerusalemu nĩguo ainamĩrĩre Mũthamaki, o we Jehova mũnene wa ita, gũtirĩ mbura ĩkaamoiragĩra.+ 18 Na famĩlĩ ya Misiri ĩngĩkaaga kwambata na yage kũingĩra, gũtirĩ mbura ĩkaamoirĩra. Handũ ha ũguo, magaakorũo nĩ ihũũra rĩrĩa Jehova ahũũraga ndũrĩrĩ iria itambataga gũkũngũĩra Gĩathĩ gĩa Ithũnũ. 19 Rĩu nĩrĩo rĩgaakorũo rĩrĩ iherithia rĩa mehia ma Misiri na mehia ma ndũrĩrĩ ciothe iria itakaambata gũkũngũĩra Gĩathĩ gĩa Ithũnũ.

20 “Mũthenya ũcio, ciugo ‘Ũtheru nĩ wa Jehova!’+ nĩ ikaandĩkwo ngengere-inĩ cia mbarathi. Nacio nyũngũ cia kũrugĩra*+ iria irĩ thĩinĩ wa nyũmba ya Jehova igaakorũo itariĩ ta mbakũri+ iria irĩ mbere ya kĩgongona. 21 Na nyũngũ o yothe ya kũrugĩra* thĩinĩ wa Jerusalemu na thĩinĩ wa Juda ĩgaakorũo ĩrĩ nyamũre na ĩgaakorũo ĩrĩ ya Jehova mũnene wa ita, na arĩa othe marutaga magongona nĩ makaaingĩra na mahũthĩre imwe ciacio gũtherũkia nyama. Mũthenya ũcio gũtigaacoka gũkorũo na Mũkanaani* thĩinĩ wa nyũmba ya Jehova mũnene wa ita.”+