Maũndũ ma Matukũ ma Tene wa Mbere

17 Na rĩrĩa Daudi aaikarire gwake nyũmba,* akĩra mũnabii Nathani+ ũũ: “Atĩrĩrĩ, njikaraga nyũmba-inĩ yakĩtwo na mĩtarakwa+ no ithandũkũ rĩa kĩrĩkanĩro kĩa Jehova rĩikaraga rungu rwa itambaya cia hema.”+ 2 Nathani agĩcokeria Daudi ũũ: “Ĩka ũrĩa wothe ũrĩ ngoro-inĩ yaku, nĩ gũkorũo Ngai ũrĩa wa ma arĩ hamwe nawe.”

3 Ũtukũ o ro ũcio, kiugo kĩa Ngai gĩgĩkinyĩra Nathani, akĩmwĩra atĩrĩ: 4 “Thiĩ wĩre Daudi ndungata yakwa atĩrĩ, ‘Ũũ nĩguo Jehova oigĩte: “Wee tiwe ũkũnjakĩra nyũmba ĩrĩa ndĩikaraga.+ 5 Nĩ gũkorũo ndirĩ ndaikara thĩinĩ wa nyũmba kuuma mũthenya ũrĩa ndarutire andũ a Isiraeli Misiri nginyagia mũthenya ũyũ wa ũmũthĩ, ĩndĩ ndũũraga thaamathaamaga kuuma hema-inĩ ĩmwe nginya hema-inĩ ĩrĩa ĩngĩ na kuuma gĩikaro-inĩ kĩmwe kĩrĩa kĩamũre nginya kĩrĩa kĩngĩ.*+ 6 Ihinda-inĩ rĩrĩa rĩothe ndathiaga hamwe na andũ othe a Isiraeli-rĩ, hihi nĩ harĩ hĩndĩ ndaririe kiugo o na kĩmwe harĩ mũtiirĩrĩri bũrũri o na ũmwe wa Isiraeli harĩ arĩa ndamũrire marĩithagie andũ akwa, ngiuga ũũ, ‘Mũregete kũnjakĩra nyũmba ya mĩtarakwa nĩkĩ?’”’

7 Rĩu ĩra Daudi ndungata yakwa atĩrĩ, ‘Ũũ nĩguo Jehova mũnene wa ita oigĩte: “Ndakũrutire kũndũ gwa kũrĩithia, ũgĩtiga kũrũmĩrĩra rũũru, nĩguo ũtuĩke mũtongoria wa gũtongoragia andũ akwa Isiraeli.+ 8 Na ndĩrĩkoragwo hamwe nawe kũrĩa guothe ũrĩthiaga,+ na nĩ ngũniina* thũ ciaku ciothe ciehere mbere yaku;+ na nĩ ngũgũthondekera rĩĩtwa, o ta rĩĩtwa rĩa andũ arĩa marĩ igweta thĩinĩ wa thĩ.+ 9 Nĩ ngũthuura kũndũ nĩ ũndũ wa andũ akwa Isiraeli na ndĩmahe maikarage kuo, na kũu nĩkuo megũtũũra na gũtirĩ hĩndĩ magaacoka gũthumbũrũo; na andũ arĩa aganu matikamahinyĩrĩria* rĩngĩ ta ũrĩa meekaga ihinda-inĩ rĩrĩa ihĩtũku,+ 10 kuuma mũthenya ũrĩa ndamũrire atiirĩrĩri bũrũri a gũtiirĩrĩra andũ akwa Isiraeli.+ Na nĩ ngũtooria thũ ciaku ciothe.+ Makĩria ma ũguo, ndĩrakwĩra ũũ, ‘Jehova nĩ egũgwakĩra nyũmba.’*

11 “‘“Rĩrĩa matukũ maku magaakinya mũthia na ũthiĩ kũrĩ maithe manyu ma tene, nĩ ngaarahũra mbeũ yaku* ĩrĩa ĩgooka thutha waku, ũmwe wa ariũ aku,+ na nĩ ngaahanda ũthamaki wake ũrũme biũ.+ 12 Ũcio nĩwe ũkaanjakĩra nyũmba,+ na nĩ ngaahanda gĩtĩ gĩake kĩa ũnene kĩrũme tene na tene.+ 13 Nĩ ngaatuĩka ithe, nake atuĩke mũrũ wakwa.+ Na ndikeheria wendo wakwa mwĩhokeku kuuma harĩ we+ ta ũrĩa ndaweheririe kuuma harĩ ũrĩa warĩ mbere yaku.+ 14 Na nĩ ngaatũma ehande nyũmba-inĩ yakwa na ũthamaki-inĩ wakwa tene na tene,+ na gĩtĩ gĩake kĩa ũnene gĩgaatũũra tene na tene.”’”+

15 Nathani akĩra Daudi ciugo icio ciothe o hamwe na kĩoneki kĩu gĩothe.

16 Hĩndĩ ĩyo Mũthamaki Daudi akĩingĩra na agĩikara thĩ mbere ya Jehova na akiuga ũũ: “Niĩ ndĩ ũ, wee Jehova Ngai? Nayo nyũmba yakwa nĩ kĩĩ atĩ nĩguo ũnginyie haha ũnginyĩtie?+ 17 Makĩria ma ũguo, wee Ngai, ningĩ nĩ warĩtie ũhoro wa nyũmba ya ndungata yaku wĩgiĩ ihinda rĩrĩa rĩgooka thutha-inĩ;+ na ũndorete o ta ndĩ mũndũ wagĩrĩire gũtũũgĩrio makĩria,* wee Jehova Ngai. 18 Nĩ atĩa ũngĩ ndungata yaku Daudi ĩngĩkwĩra wĩgiĩ gĩtĩo kĩrĩa nyonetio na nĩ ũĩ ndungata yaku wega?+ 19 Wee Jehova, nĩ ũndũ wa ndungata yaku na nĩ ũndũ wa gũkorũo wĩtĩkanĩtie na ũndũ ũcio ngoro-inĩ yaku,* nĩkĩo wĩkĩte maũndũ macio mothe manene na njĩra ya kũguũria ũnene waku.+ 20 Wee Jehova, gũtirĩ ũngĩ ũhaana tawe,+ na gũtirĩ Ngai ũngĩ tiga wee;+ maũndũ mothe marĩa twĩiguĩrĩire na matũ maitũ nĩ maheanĩte ũira wa ũndũ ũcio. 21 Na nĩ rũrĩrĩ rũrĩkũ rũngĩ rũtariĩ ta andũ aku Isiraeli?+ Ngai ũrĩa wa ma aathiire na akĩmakũũra magĩtuĩka andũ ake.+ Ũgĩĩthondekera rĩĩtwa na njĩra ya gwĩka maũndũ manene na ma magegania,+ ũkĩingata ndũrĩrĩ ciehere mbere ya andũ aku,+ arĩa wakũũrire kuuma Misiri. 22 Ũgĩtũma andũ aku Isiraeli matuĩke andũ aku mwene mahinda mothe;+ nawe Jehova, ũgĩtuĩka Ngai wao.+ 23 Rĩu wee Jehova, kĩĩranĩro kĩrĩa wĩranĩire ũhoro-inĩ wĩgiĩ ndungata yaku na nyũmba yayo kĩrotuĩka gĩa kwĩhokeka mahinda-inĩ mothe, na ũroeka o ta ũrĩa wĩranĩire.+ 24 Rĩĩtwa rĩaku rĩrotũũra* na rĩtũũgĩrio+ tene na tene, nĩgetha andũ moige atĩrĩ, ‘Jehova mũnene wa ita, Ngai wa Isiraeli, nĩwe Ngai harĩ Isiraeli,’ na nyũmba ya Daudi ndungata yaku ĩroehanda wega mbere yaku.+ 25 Nĩ gũkorũo wee Ngai wakwa, nĩ ũguũrĩirie ndungata yaku muoroto waku wa kũmĩakĩra nyũmba.* Nĩkĩo ndungata yaku ĩrĩ na ũmĩrĩru wa gũkũhoya ihoya rĩrĩ. 26 Na rĩu, wee Jehova, wee nĩwe Ngai ũrĩa wa ma, na nĩ wĩranĩire maũndũ macio mega ũhoro-inĩ wĩgiĩ ndungata yaku. 27 Kwoguo ũrokenio nĩ kũrathima nyũmba ya ndungata yaku, na ĩrotũũra tene na tene mbere yaku; nĩ gũkorũo wee Jehova, nĩ ũmĩrathimĩte, na nĩ ndathime tene na tene.”