MARŨA KUUMA KŨRĨ KĨAMA KĨRĨA GĨTONGORAGIA

Aarĩ na Ariũ a Ithe Witũ Ende:

Mĩaka ĩigana ũna mĩhĩtũku, ngathĩti ya Mnara wa Mlinzi ya riuma rĩa andũ othe nĩ ĩkoretwo na ũhoro wa gũcanjamũra ũrĩ na kĩongo “Igeni Imani Yao” (“Wĩgerekanie na Wĩtĩkio Wao”). Kuuma hĩndĩ ĩyo, icunjĩ icio ikoretwo igĩcabwo riita rĩmwe thutha wa mĩeri ĩtatũ.

Icunjĩ icio ihutĩtie athomi atĩa? Mũthomi ũmwe aandĩkire ũũ thutha wa gũthoma gĩcunjĩ kĩgiĩ Maritha: “Nĩ ndethekereire rĩrĩa ndaagĩthomire tondũ haana o take. Hĩndĩ ciothe nyendaga gũkenia ageni akwa no rĩmwe ngariganĩrũo atĩ nĩ batiĩ gũikara thĩ tũkenanĩre nao.” Tinĩnja ũmwe oigire ũũ thutha wa gũthoma rũgano rwa Esiteri: “Nĩ ndonire atĩ nĩ ma mũndũ no ekĩrĩre mũno mĩĩhumbĩre ya kĩĩrĩu. O na gũtuĩka nĩ twagĩrĩirũo kwĩhumba wega, tũtiagĩrĩirũo gũkĩria njano.” Ongereire ũũ: “Jehova akenagio nĩ ũrĩa tũhaana na thĩinĩ.” Nake mwarĩ wa Ithe witũ ũmwe oigire ũũ acanjamũkĩte thutha wa gũthoma gĩcunjĩ kĩgiĩ Petero: “Ndeeyonaga ta ndĩ thĩinĩ wa rũgano rũu. Nĩ ndaageragia kũigua na kuona maũndũ marĩa meekĩkaga.”

Athomi acio hamwe na angĩ aingĩ arĩa maandĩkire marũa ma gũcokia ngatho moonanirie ũũma wa ciugo ici ciaandĩkirũo nĩ mũtũmwo Paulo: “Maũndũ mothe marĩa maandĩkirũo tene, maandĩkirũo marĩ ma kwĩruta na ithuĩ.” (Rom. 15:4) Jehova aandĩkithirie ngʼano icio thĩinĩ wa Bibilia nĩ getha citũrutage maũndũ ma bata. Ithuothe no twĩrute kuumana nacio o na angĩkorũo tũkoretwo tũmenyete ma ihinda iraihu.

Tũrakũũria ũthome ibuku rĩrĩ na ihenya o ũrĩa kwahoteka. Ciana nĩ igũkenera kũrĩthoma hĩndĩ ya Ũthathaiya wa Famĩlĩ. Ndũkanatĩre mĩcemanio rĩrĩa ibuku rĩrĩ rĩgakorũo rĩgĩthomwo hĩndĩ ya Wĩruti wa Bibilia wa Kĩũngano. Rĩthome ũhoreire. Geria kũhũũra mbica meciria-inĩ ũkĩhũthĩra maitho maku, maniũrũ, matũ na ciĩga ingĩ. Geria kũigua ũrĩa andũ acio maaiguaga na wone kĩrĩa moonaga. Ringithania ũrĩa meekire rĩrĩa maacemanirie na maũndũ mamwe na ũrĩa wee ũngĩekire korũo warĩ ho.

Nĩ gĩkeno gitũ kũhaarĩria ibuku rĩrĩ nĩ ũndũ waku. Tũrehoka nĩ rĩgũgũteithia hamwe na famĩlĩ yaku. Amũkĩra wendo witũ,

Kĩama Kĩrĩa Gĩtongoragia kĩa Aira a Jehova