‘Tũũrai Mwĩtĩkĩtie Uuge Wakwa’

“Inyuĩ mwatũũra o mwĩtĩkĩtie uuge wakwa, mũrĩ arutwo akwa kũna, na nĩmũkamenya ũhoro-ũrĩa-wa-ma, naguo ũhoro-wa-ma ũmũkũũre ũkombo-inĩ.”—JOHANA 8:31, 32.

Ũguo nĩ Kuuga Atĩa? “Uuge” wa Jesu nĩ ũrutani wake, ũrĩa woimĩte igũrũ. Jesu oigire atĩ, “Ithe witũ ũrĩa wandekirie, nĩwe ũnjathĩte, akanjĩra ũrĩa ingiuga, na ũrĩa ingĩaria.” (Johana 12:49) Akĩhoya Ithe, Jehova Ngai, Jesu oigire: “Ũhoro waku nĩguo ũhoro-ũrĩa-wa-ma.” Nĩ aagwetaga kaingĩ Kiugo kĩa Ngai kĩrĩ mũthingi wa ũrutani wake. (Johana 17:17; Mathayo 4:4, 7, 10) Nĩ ũndũ ũcio, Akristiano a ma ‘matũũraga uuge-inĩ wake’—ũguo nĩ kuuga nĩ metĩkagĩra Kiugo kĩa Ngai, Bibilia, kĩrĩ ‘ũhoro-wa-ma,’ na watho ũrĩa mũnene makĩria ũtongoragia wĩtĩkio na mĩtugo yao.

Ũrĩa Akristiano a Tene Maarũmagĩrĩra Ciugo Icio: Mũtũmwo Paulo, Mũkristiano ũrĩa waandĩkire mabuku maingĩ makĩria ma Bibilia, o ta Jesu, nĩ aatĩĩte Kiugo kĩa Ngai. Aandĩkire ũũ: “Ũhoro o wothe wandĩkĩtwo Maandĩko-inĩ nĩwekĩrirũo nĩ Ngai ngoro-inĩ ya mũwandĩki, na wĩ na kĩguni.” (2 Timotheo 3:16) Athuri arĩa maamũrĩtwo kũruta Akristiano arĩa angĩ, no mũhaka ‘mangĩarũmirie Kiugo kĩa ma na gĩa kwĩhokeka kĩa Ngai.’ (Tito 1:7, 9, The Amplified Bible) Akristiano a tene maataarirũo maregane na ‘maũũgĩ ma irĩra cia andũ, maringaine na maũndũ marĩa ma ndũire ma gũkũ thĩ, na matarũmanĩrĩire na Kristo.’—Akolosai 2:8.

Nĩ a Mareka Ũguo Ũmũthĩ?: Watho wa Vatikani wa Dogmatic Constitution on Divine Revelation, ũrĩa waambĩrĩirie kũhũthĩrũo mwaka-inĩ wa 1965 na ũgwetetwo ibuku-inĩ rĩa Catechism of the Catholic Church uugĩte ũũ: “To Maandĩko-inĩ Matheru tu Kanitha [Gatoreki] ũrutaga ũũma waguo wĩgiĩ maũndũ mothe marĩa maguũrĩtio. Kwoguo mĩtugo ya ũndũire ĩrĩa mĩtheru yagĩrĩire gwĩtĩkĩrũo na gũtĩo na gĩkĩro kĩnene na wĩhokeku o ta Maandĩko Matheru.” Gĩcunjĩ kĩmwe thĩinĩ wa ngathĩti ya Maclean’s kĩagwetire ciugo cia mũhunjia ũmwe wa Toronto, Kanada, ũrĩa woigire ũũ: “Ndigwĩciria no mũhaka tũtongorio nĩ mũgambo waaririo mĩaka ngiri igĩrĩ mĩhĩtũku. Twĩna meciria mega maitũ ithuene, no hingo ciothe nĩ tũmaagithagia kĩene nĩ kwenda kũmohithania na Jesu na Maandĩko.”

Rĩkĩaria ũhoro wĩgiĩ Aira a Jehova, ibuku rĩa New Catholic Encyclopedia riugaga ũũ: “Bibilia iki nĩyo monaga ĩrĩ kĩhumo kĩa wĩtĩkio na ithimi ciao cia mĩtugo.” Ica ikuhĩ, mũthuri ũmwe bũrũri-inĩ wa Kanada erĩga gũtinia na mĩario mũtumia ũmwe Mũira wa Jehova o rĩrĩ aremenyithania. Oigire ũũ orotete Bibilia ya mũtumia ũcio: “Nĩ njũĩ inyuĩ mũrĩ a, kũgerera rũũri rũrũ rwanyu.”