No Ũthuure Gũgaakorũo na Ũtũũro Mũgaacĩru Mahinda Mokĩte Atĩa?

ŨNGĨGĨA na ũtũũro mũgaacĩru atĩa? Njĩra ĩmwe nĩ kũhũthĩra ũhoti wa mwanya ũrĩa ũrĩ naguo gwĩciria ũhoro wa moimĩrĩro ma ihinda iraya ma matua marĩa ũgũtua rĩu.

Ma nĩ atĩ, no wone arĩ ũndũ mũritũ gũtua matua mangĩkũguna ũtũũro-inĩ waku wothe. Nĩkĩ? Tondũ mawoni ma andũ aingĩ arĩa matũrigicĩirie nĩ kũgĩa na indo iria merirĩria hau hau. Kwa ngerekano, no wone atĩ kũhũthĩra ũtaaro wa Bibilia no gũgũteithie ũgĩe na ũiguano mwega na famĩlĩ yaku. (Aefeso 5:22–6:4) No nĩguo wĩke ũguo, no mũhaka ũhũthagĩre mahinda maingĩ hamwe na famĩlĩ yaku, o ũkĩreganaga na hatĩka cia kũhũthĩra mahinda maingĩ gũkĩra ũrĩa kwagĩrĩire wĩra-inĩ kana maũndũ-inĩ ma gwĩkenia. O ta ũrĩa gũkoragwo maũndũ-inĩ maingĩ ma ũtũũro, no mũhaka ũthuure gatagatĩ ga kũhingia merirĩria maku ma ihinda na kũgaacĩra kwa ihinda iraya. Ũngĩgĩa na hinya ũrĩa ũrabatarania atĩa nĩguo ũthuure njĩra ĩrĩa yagĩrĩire? Rũmĩrĩra njĩra ici inya.

1 Wĩcirie Ũhoro wa Moimĩrĩro ma Matua Maku

Hĩndĩ ĩrĩa ũrenda gũtua itua, wĩcirie biũ ũrĩa moimĩrĩro mangĩkorũo mahaana. Bibilia ĩtũtaaraga ũũ: “Mũndũ mũbarĩrĩri onaga gũkĩgĩa ũũru, akehitha.” (Thimo 22:3) Ũngĩĩciria ũhoro wa moimĩrĩro ũrĩ na wĩhokeku-rĩ, no ũigue ũkĩenda gwĩthema njĩra njũru ĩrĩa ĩngĩkũrehera ũgwati. Ningĩ ũngĩĩciria ũhoro wa ũguni wa ihinda iraya wa itua rĩa ũũgĩ, no ũtue itua rĩega.

Wĩyũrie ũũ: ‘Thutha wa mwaka ũmwe, kana 10 kana 20 kuuma rĩu, moimĩrĩro ma itua rĩakwa magaakorũo marĩ marĩkũ? Ngũhutio atĩa ngoro-inĩ na ũgima wakwa wa mwĩrĩ? Itua rĩakwa rĩkũhutia atĩa famĩlĩ yakwa na arĩa angĩ nũmbũyagia?’ Ũndũ wa bata o na makĩria kwĩyũria nĩ ũyũ: ‘Hihi itua rĩakwa nĩ rĩgũkenia Jehova? Rĩkũhutia ũrata wakwa na Jehova atĩa?’ Tondũ Bibilia ĩtongoretio nĩ roho wa Ngai, no ĩgũteithie kũmenya ũndũ ũrĩa ũngĩmũkenia na ĩkuonie mĩtego ĩrĩa wee ũngĩaga kuona.—Thimo 14:12; 2 Timotheo 3:16.

2 Wĩthuthurĩrie Matua Marĩa wĩ Namo

Ithenya rĩa gũtua matua mao ene, andũ aingĩ megerekanagia na arĩa mamarigicĩirie. No ũndũ mũna ũtũũro-inĩ ndũngĩtũma ũgaacĩre atĩ tondũ nĩ wĩkagwo nĩ andũ aingĩ. Wĩthuthurĩrie matua maku. Ta wĩcirie ngerekano ya Natalie.a Aroiga ũũ: “Nĩ ndendaga kĩhiko kĩega. No nĩ ndonaga atĩ ndingĩagĩire nakĩo kũringana na ũrĩa ndatũũraga. Tũrĩ cukuru, arata akwa othe marĩ andũ ethĩ ogĩ mũno. No o na kũrĩ ũguo, nĩ maatuaga matua moru mũtũũrĩre-inĩ wao. Maaikaraga magĩcenjanagia arata anake kana arata airĩtu. O tao, ndaarĩ na arata a anake maigana ũna. Mũtũũrĩre ũcio nĩ watũmaga nduurũo mũno ngoro.”

Natalie akĩambĩrĩria kwĩruta Bibilia hamwe na Aira a Jehova. Oigire ũũ: “Gatagatĩ-inĩ ka Aira a Jehova, ndonire andũ ethĩ akenu na ihiko nũmu wega. O na gũtuĩka ndwarĩ ũndũ mũhũthũ, nĩ ndaagarũrĩire mĩtugo yakwa na mũtũũrĩre wakwa o kahora.” Moimĩrĩro maarĩ marĩkũ? Natalie aroiga ũũ: “Ndaatũũrĩte nyendete gũkaahikĩra mũndũ mwega. Thutha wa ihinda, nĩ ndaahikĩire mũthuri warĩ na wĩtĩkio ta wakwa. Nĩ nyonaga atĩ Ngai nĩ aheete famĩlĩ njega gũkĩra ũrĩa ndaneciria.”

3 Wĩcirie Ũrĩa Matua Marĩa Ũratua Ũmũthĩ Mangĩkũhutia Hĩndĩ Yũkĩte

Nĩguo wĩtheme gwĩciria o maũndũ ma ihinda inini, ningĩ nĩ ũrabatara gwĩciria maũndũ marĩa ũngĩenda ihinda rĩũkĩte na ũbange kũmakinyĩra. (Thimo 21:5) Ndũgecirie o ũhoro wa mĩaka 70 kana 80 ĩrĩa mũndũ atũũraga. Ithenya rĩa ũguo, wĩyone ũgĩkenera ũtũũro wa tene na tene ũrĩa Bibilia ĩtaaragĩria.

Bibilia ĩtaaragĩria atĩ, kũgerera igongona rĩa ũkũũri rĩa Kristo Jesu, Ngai nĩ ekĩte mũbango nĩguo andũ makoona muoyo wa tene na tene. (Mathayo 20:28; Aroma 6:23) Ngai atwĩrĩire atĩ ica ikuhĩ muoroto wake harĩ andũ na thĩ nĩ ũkũhinga. Arĩa mendete Ngai nĩ magakorũo na mweke wa gũkenera ũtũũro tene na tene thĩinĩ wa thĩ paradiso. (Thaburi 37:11; Kũguũrĩrio 21:3-5) No ũkorũo na ũtũũro ta ũcio, ũngĩĩciria ũrĩa matua marĩa ũgũtua ũmũthĩ mangĩkũhutia hĩndĩ yũkĩte.

4 Wĩrutanĩrie Gũkinyĩra Mĩoroto Yaku

Ũngĩka atĩa nĩguo ũgaakorũo ũrĩ ũmwe wa arĩa magaakenera ũtũũro ũcio wĩranĩirũo? Ambĩrĩria na kwĩruta ũhoro wa Ngai. (Johana 17:3) Ũmenyo mũrũngĩrĩru wa Bibilia nĩ ũgũtũma ũgĩe na ũũma atĩ ciĩranĩro cia Ngai cia mahinda mokĩte nĩ ikaahinga. Wĩtĩkio ta ũcio no ũgwĩkĩre hinya wĩke ũgarũrũku o wothe ũrabatarania nĩguo wĩtĩkĩrĩke harĩ Ngai.

Ta wĩcirie ngerekano ya Michael. Aroiga ũũ: “Ndaambĩrĩirie kũnyua njohi na ndawa cia ũrĩĩu ndĩ na mĩaka 12. Ndaarĩ gĩkundi-inĩ kĩa eki naĩ na nderĩgagĩrĩra gũkua mbere ya nginyĩtie mĩaka 30. Marakara na gũkua ngoro nĩ gwatũmire ngerie kwĩyũraga maita maingĩ. Nĩ ndeciragia ta ũtũũro warĩ makĩrĩa ma ũrĩa ndatũũraga, no ndiawonaga.” Rĩrĩa Michael aarĩ cukuru ya thekondarĩ, ũmwe wa gĩkundi kĩu kĩa eki naĩ akĩambĩrĩria kwĩruta Bibilia hamwe na Aira a Jehova. Michael o nake akĩambĩrĩria kwĩruta.

Maũndũ marĩa Michael eerutire kuuma Bibilia-inĩ nĩ maagarũrire ũrĩa eeciragia igũrũ rĩa mahinda make mokĩte. “Nĩ nderutire atĩ mahinda mokĩte thĩ nĩ ĩgaatuĩka paradiso na andũ nĩ maagatũũra marĩ na thayũ, matarĩ na mĩtangĩko. Ngĩambĩrĩria kuona atĩ maũndũ macio nĩmo ndendaga ũtũũro-inĩ wakwa wa thutha. Gũthondeka ũrata mwega na Jehova gũgĩtuĩka muoroto wakwa. O na kũrĩ ũguo, ti mahinda mothe ndahotaga gũkenia Jehova. O na thutha wa kwambĩrĩria kwĩruta Bibilia, nĩ ndanyuire njohi na ngĩrĩo maita maigana ũna. Na ngĩkoma na mũirĩtu.”

Michael aahotire atĩa gũtooria mĩhĩnga ĩyo na akĩgarũrĩra ũtũũro wake? Aroiga ũũ: “Mũndũ ũrĩa wandutaga Bibilia aanjĩkĩrire ngoro thomage Bibilia o mũthenya na nyitanagĩre hamwe na andũ arĩa mendaga gũkenia Ngai. Nĩ ndonaga atĩ arĩa twakoragwo nao gĩkundi-inĩ kĩa eki naĩ no maangucagĩrĩria. O na gũtuĩka maarĩ ta a famĩlĩ itũ, nĩ ndaatigire kũnyitanĩra hamwe nao.”

Michael eeigĩire mĩoroto ya ihinda inini na agĩthingata maũndũ ma bata marĩa maamũteithirie gũkinyĩra muoroto wake mũnene wa gũikara kũringana na ithimi cia Ngai. O nawe no wĩke ũguo. Andĩka muoroto waku wa ihinda iraya na makinya marĩa ũrabatara gũkinya nĩguo ũkinyĩre muoroto ũcio. Aria na arĩa mangĩgũteithia gũkinyĩra mĩoroto yaku, na ũmorie makwĩrage ũrĩa ũrathiĩ na mbere.

Ndũkaanatĩrĩrie kwĩruta igũrũ rĩgiĩ Ngai na kũrũmĩrĩra ũtongoria wake ũtũũro-inĩ waku. Oya makinya rĩu ma kwenda Ngai na Kiugo gĩake, Bibilia. Ĩgĩtaarĩrĩria mũndũ ũhũthagĩra mawatho ma Kiugo kĩa Ngai, Bibilia yugaga ũũ: “Ũndũ o wothe egwĩka, nĩũgaacagĩra.”—Thaburi 1:1-3.

[Kohoro ka magũrũ-inĩ]