‘Nĩ Rĩathani Rĩrĩkũ Inene Kũrĩ Marĩa Mangĩ Mothe?’

Nĩ maũndũ marĩkũ mabataranagia nĩguo tũkenie Ngai? Hihi tũheetwo mawatho maingĩ mũno marĩa arĩ o mũhaka tũrũmĩrĩre? Aca. Kũringana na Jesu Kristo, Mũrũ wa Ngai, wendi wa Ngai no ũtaarĩrio na kiugo kĩmwe tu.—Thoma Mariko 12:28-31.

Tamba wĩcirie rĩrĩa Jesu aagwetire ciugo icio. Kwarĩ mweri 11 Nisani, matukũ manini mbere ya gĩkuũ gĩake arĩ hekarũ-inĩ akĩrutana. Thũ ciake ciageragia kũmũtega na njĩra ya kũmũũria ciũria cia kũmũhĩngĩca. Hingo ciothe nĩ acitumagia na njĩra ya gũcihe macokio. Agĩcoka akĩũrio kĩũria gĩkĩ: ‘Nĩ rĩathani rĩrĩkũ inene kũrĩ marĩa mangĩ mothe?’—Mũhari wa 28.

Kĩu gĩtiarĩ kĩũria kĩhũthũ. Ayahudi amwe nĩ maakararanagia nĩ rĩathani rĩrĩkũ inene kana rĩa bata kũrĩ marĩa mangĩ harĩ maathani makĩria ma 600 marĩa maarĩ Watho-inĩ wa Musa. Angĩ nao maanyitagĩrĩra atĩ gũtirĩ rĩathani rĩarĩ rĩa bata kũrĩ marĩa mangĩ na kwoguo ti wega gwĩkĩrĩra mũno rĩathani rĩmwe kũrĩ marĩa mangĩ. Hihi Jesu aacokirie kĩũria kĩu atĩa?

Jesu agĩcokia kĩũria kĩu ndaagwetire rĩathani rĩmwe ĩndĩ aagwetire maathani merĩ. Aambire kuga ũũ: “Enda Mwathani Ngai waku na ngoro yaku yothe, na muoyo waku wothe, na gwĩciria gwaku guothe, o na hinya waku wothe.” (Mũhari wa 30; Gũcokerithia Maathani 6:5) Ciugo “ngoro,” “gwĩciria,” “muoyo,” na “hinya” nĩ ikonainie.a Ũguo nĩ kuga atĩ, wendo harĩ Jehova no mũhaka ũhutie mũndũ arĩ wothe, mathugunda make na indo ciake ciothe. Ibuku rĩmwe rĩkĩaria ũhoro wa Bibilia riugaga ũũ: “Ngai agĩrĩire kwendwo biũ.” Nĩ ũndũ ũcio angĩkorũo nĩ wendete Ngai, ũrĩkaga o ũrĩa wothe ũngĩhota nĩguo o mũthenya wĩkage maũndũ marĩa marĩtũmaga wĩtĩkĩrĩke nĩwe.—1 Johana 5:3.

Jesu aacokire akiuga ũũ: “Enda mũndũ ũrĩa ũngĩ o ta ũrĩa wĩendete wee mwene.” (Mũhari wa 31; Maũndũ ma Alawii 19:18) Kwenda Ngai na kwenda mũndũ ũrĩa ũngĩ nĩ maũndũ matangĩtigithũkanio. Kwenda mũndũ ũrĩa ũngĩ kuumanaga na gũkorũo wendete Ngai. (1 Johana 4:20, 21) Angĩkorũo nĩ twendete andũ arĩa angĩ ta ũrĩa twĩyendete-rĩ, tũrĩmekagĩra ũrĩa tũngĩenda matwĩkĩre. (Mathayo 7:12) Tweka ũguo, tũrĩonanagia atĩ nĩ twendete Ngai ũrĩa wamombire na agĩtũmba na mũhianĩre wake.—Kĩambĩrĩria 1:26.

Maathani macio ma kwenda Ngai na kwenda mũndũ ũrĩa ũngĩ nĩ ma bata na gĩkĩro kĩrĩkũ? Jesu oigire ũũ: “Gũtirĩ rĩathani rĩngĩ inene kwĩ macio.” (Mũhari wa 31) Rĩandĩko-inĩ rĩngĩ rĩa Bibilia, Jesu oigire atĩ maathani marĩa mangĩ mothe mehocetie harĩ macio merĩ.—Mathayo 22:40.

Kwenda Ngai ti ũndũ mũritũ. Maũndũ marĩa mothe endaga twĩke no matarĩrio na kiugo kĩmwe tu: wendo. Ũcio nĩguo ũkoretwo na nĩguo hingo ciothe ũrĩkoragwo ũrĩ ũndũ ũrĩa wa bata harĩ ũthathaiya wa ma. O na kũrĩ ũguo-rĩ, wendo nduonanagio na ciugo tu kana methugunda; wagĩrĩirũo nĩ kuonanio na ciĩko. (1 Johana 3:18) Na githĩ ti wega wĩrute ũrĩa ũngĩkũria na wonanie wendo waku harĩ Jehova, Ngai ũrĩa ‘arĩ we wendani’!—1 Johana 4:8.