“Ngai Endaga Mũndũ Ũrĩa Ũkũheana Akenete”

Nĩ kĩheo kĩa mũthemba ũrĩkũ kĩngĩgũkenia mũno? Hatarĩ nganja tũngĩkenio nĩ kĩheo kĩrĩa tũngĩheo nĩ mũndũ wĩyendeire na ngoro yake, no ti kũringĩrĩrio. Mwerekera wa mũndũ rĩrĩa araheana nĩ ũkoragwo na itemi rĩa bata harĩ ithuĩ, na mũno makĩria harĩ Ngai. Ta wĩcirie ũhoro wa ciugo ici itongoretio nĩ roho cia mũtũmwo Paulo thĩinĩ wa 2 Akorintho 9:7.

Paulo aandĩkire ciugo icio nĩkĩ? Eendaga gwĩkĩra ngoro Akristiano a Korintho mateithie ariũ a Ithe wao a Judea arĩa maarĩ na thĩna. Hihi nĩ aamerire maheane kĩa hinya? Aca. Mũgarũ na ũguo, aandĩkire ũũ: “O mũndũ nĩeke o ta ũrĩa acirĩire gwĩka na ngoro yake, na ndakarute kĩndũ ta egũkĩiguĩra ruo, kana ta arĩ kũringĩrĩrio aringĩrĩirio arute: nĩ gũkorũo Ngai endaga mũndũ ũrĩa ũkũheana akenete.” Reke twarĩrĩrie ũtaaro ũcio.

“O ta ũrĩa acirĩire gwĩka na ngoro yake.” Mũkristiano wa ma aheanaga tondũ nĩ atuĩte gwĩka ũguo “na ngoro yake” ta ũrĩa Paulo oigire. Ningĩ Mũkristiano nĩ eciragia na kinyi mabataro ma athathaiya arĩa angĩ. Kiugo kĩrĩa gĩtaũrĩtwo “acirĩire gwĩka,” kũringana na mũthomi ũmwe, “nĩ ta kuuga gwĩciria kabere.” Kwoguo, Mũkristiano nĩ eeciragia kabere mabataro ma athathaiya arĩa angĩ na akeyũria nĩ atĩa angĩmateithia.—1 Johana 3:17.

“Ta egũkĩiguĩra ruo kana ta arĩ kũringĩrĩrio aringĩrĩirio.” Paulo agwetete kũheana kwa mĩthemba ĩĩrĩ kũrĩa gũtagĩrĩire harĩ Akristiano a ma—kũheana mũndũ atekwenda kana ta e kũringĩrĩrio. Kũringana na ibuku rĩmwe, mũndũ ũheanaga kĩndũ ta arakĩiguĩra ruo kana ta arĩ kũringĩrĩrio, “akoragwo akĩheana anyitĩtie.” Mũndũ ũheanaga nĩ ũndũ wa kũringĩrĩrio aheanaga tondũ nĩ atindĩkĩrĩirio. Nũ ũngĩenda kũheo kĩndũ nĩ mũndũ ũrakĩiguĩra ruo kana ũraringĩrĩrio?

“Ngai endaga mũndũ ũrĩa ũkũheana akenete.” Paulo oigire atĩ, hĩndĩ ĩrĩa Mũkristiano atua itua rĩa kũheana, agĩrĩirũo nĩ gwĩka ũguo akenete kana acanjamũkĩte. Ũhoro wa ma nĩ atĩ, gĩkeno kiumanaga na kũheana na ngoro theru. (Atũmwo 20:35) Gĩkeno kĩa ũrĩa ũheanaga akenete nĩ kĩonekaga. Ma nĩ atĩ, kiugo “akenete” no gĩtaarĩrie wega gĩkeno kĩrĩa mũheani akoragwo nakĩo akĩoneka, na kĩrĩa akoragwo nakĩo ngoro-inĩ yake. Mũndũ ũrĩa ũheanaga akenete nĩ ahutagia ngoro citũ. Ningĩ nĩ akenagia Ngai. Bibilia ĩngĩ yugaga ũũ: “Ngai nĩ endete arĩa mendete kũheana.”—Contemporary English Version.

Ciugo icio itongoretio nĩ roho cia mũtũmwo Paulo nĩcio ciagĩrĩire gũtongoria Mũkristiano rĩrĩa araheana. Tũkorũo tũraheana mahinda, hinya, kana indo citũ, rekei twĩkage ũguo na kwĩyendera tondũ nĩ tũgĩaga na gĩkeno kĩa ma nĩ ũndũ wa gũkorũo tũrĩ atana, na makĩria kũrĩ andũ arĩa me na thĩna. Kũheana ta kũu nĩ kũrĩtũmaga tũgĩe na gĩkeno na tũkenie Ngai tondũ nĩ endete “mũndũ ũrĩa ũkũheana akenete.”