MACOKIO MA CIŨRIA CIA BIBILIA

Twagĩrĩirũo kũhoya nĩkĩ?

Jehova Ngai endaga tũmwĩre mabataro maitũ tũrĩ na wĩyathi, na tũgeekaga ũguo kaingĩ. (Luka 18:1-7) Nĩ atũthikagĩrĩria tondũ nĩ akoragwo na bata na ithuĩ. Angĩkorũo Ithe witũ wa igũrũ nĩ atwĩraga tũmũhoe-rĩ, na githĩ ti wega twĩkage ũguo?—Thoma Afilipi 4:6.

Mahoya to njĩra tu ya gwĩtia ũteithio. Ithenya rĩa ũguo, mahoya nĩ matũteithagia gũkuhĩrĩria Ngai. (Thaburi 8:3, 4) Tũngĩaranĩria na Ithe witũ wa igũrũ maita maingĩ, nĩ tũrĩkũragia ũrata wa hakuhĩ nake.—Thoma Jakubu 4:8.

Twagĩrĩirũo kũhoya atĩa?

Ngai ndendaga tũcokacokere mahoya kana tũhũthĩre ciugo cia mwĩyonanio rĩrĩa tũrahoya. O na to nginya tũkorũo tũikarĩte na njĩra ya mwanya. Jehova eendaga tũmũhoe kuuma ngoro. (Mathayo 6:7) Kwa mũhiano hĩndĩ ya Isiraeli, Hana, ndungata ya Ngai, nĩ aahoire igũrũ rĩgiĩ thĩna ũmwe wa famĩlĩ wamũgiaga mũno. Thutha-inĩ rĩrĩa Ngai aiguire mahoya make, kĩrĩro gĩake gĩacokire gũtuĩka gĩkeno, na agĩcokeria Ngai ngatho kuuma ngoro.—Thoma 1 Samueli 1:10, 12, 13, 26, 27; 2:1.

Na githĩ mahoya matikĩrĩ kĩheo kĩa bata mũno! No twĩre Mũtũũmbi mathĩna maitũ. Ningĩ no tũmũgooce na tũmũcokerie ngatho nĩ ũndũ wa maũndũ marĩa atwĩkagĩra. Nĩ ma tũtiagĩrĩirũo nĩ gũte mweke ũcio wa bata ũguo!—Thoma Thaburi 145:14-16.