KUUMA NGOTHI-INĨ | ŨTHAMAKI WA NGAI—ŨNGĨKŨGŨNA ATĨA?

Ũthamaki wa Ngai—Ũgakũguna Atĩa?

Kwahoteka nĩ wonire icunjĩ-inĩ icio irĩ hau mbere atĩ Aira a Jehova nĩ monaga Ũthamaki wa Ngai ũrĩ wa bata mũno. Na hihi nĩ ũkenirio nĩ imwe cia irathimo iria ciarĩrĩirio ikarehũo nĩ Ũthamaki wa Ngai mahinda mokĩte. O na kũrĩ ũguo-rĩ, kwahoteka nĩ ũrarigũo kana hihi ciĩraniro icio njega ũguo no ikinyanĩre.

Nĩ ũndũ wa ũũgĩ kwamba gũthuthuria maũndũ handũ ha gwĩtĩkia ũndũ ũrĩa wothe waigua. (Thimo 14:15) Ũndũ ũcio no ũringithanio na ũrĩa andũ a Beroiaa ya tene maatariĩ. Rĩrĩa maahunjĩirio ũhoro mwega wa Ũthamaki rĩa mbere andũ a Beroia nĩ metĩkĩrire ũrĩa maiguire, no ti kuuga metĩkirie o ũguo tu hatarĩ gĩtũmi. Ithenya rĩa ũguo nĩ maathuthuragia Maandĩko nĩguo ‘mamenye kana maũndũ macio meeranagwo nĩguo maatariĩ.’ (Atũmwo 17:11) Ũguo nĩ kuuga atĩ andũ a Beroia maringithanagia ũhoro mwega ũrĩa maiguĩte na ũrĩa Bibilia yugaga. Thutha wa ihinda matiarĩ na nganja atĩ ũhoro ũcio mwega woimĩte Kiugo-inĩ kĩa Ngai.

Aira a Jehova nĩ maragwĩkĩra ngoro o nawe wĩke o ũguo. Kũgerera programu ya kwĩruta Bibilia hatarĩ marĩhi, nĩ tũrakũhe mweke wa kũringithania ũrĩa Aira a Jehova metĩkĩtie, igũrũ rĩgiĩ Ũthamaki wa Ngai na ũrĩa Bibilia ĩrutanaga.

O hamwe na kwĩruta ũhoro ũkonie Ũthamaki wa Ngai wĩruti waku wa Bibilia nĩ ũgũgũteithia kuona macokio ma ciũria cia bata mũno ũtũũro-inĩ.

Twoimire kũ?
Muoroto wa ũtũũro nĩ ũrĩkũ?
Ngai etĩkĩrĩtie mĩnyamaro nĩkĩ?
Gũtuĩkaga atĩa rĩrĩa twakua?
Hihi thĩ nĩ ĩkaniinwo?
Hitho ya kũgĩa na gĩkeno thĩinĩ wa famĩlĩ nĩ ĩrĩkũ?

Na makĩria ma ũguo, kwĩruta Bibilia nĩ gũgũgũteithia ‘ũkuhĩrĩrie Ngai.’ (Jakubu 4:8) O ũrĩa ũgũkuhĩrĩria Ngai, noguo ũkũmenya maũndũ mega marĩa Ũthamaki wa Ngai ũngĩkũhingiria rĩu na tene na tene. Jesu akĩhoya kũrĩ Ithe oigire ũũ: ‘Naguo muoyo wa tene na tene nĩ atĩrĩ, nĩ makũmenye wee Ngai ũrĩa ũmwe wa ma, na mamenye ũrĩa warekirie, na nĩwe Jesu Kristo.’—Johana 17:3.

Aira a Jehova no mahũthĩre ibuku rĩrĩ kwĩruta Bibilia hamwe nawe.

Ũngĩenda kũrutwo Bibilia hatarĩ marĩhi no ũũrie ũmwe wa Aira a Jehova kana ũihũrie fomu ĩrĩa ĩrĩ thĩinĩ wa www.jw.org/ki. (Rora rungu rwa HOYA WĨRUTI WA BIBILIA wahingũra website ĩyo)

a Beroia yarĩ taũni thĩinĩ wa Makedonia ya tene.

Kairĩtu Kendete Ũthamaki wa Ngai

Ihinda rĩtarĩ kũraihu kairĩtu ka mĩaka ikũmi getagwo Folake nĩ kaaheirũo wĩra wa cukuru nĩ mwarimũ wao kwandĩka ũhoro wa “Ũndũ Ũrĩa Nyendete Mũno Thĩinĩ wa Thĩ.” Folake aathurire kwandĩka ũhoro wa kĩrĩa gĩtũmaga akenere kwaria na andũ ũhoro wa Ũthamaki wa Ngai.

Folake nĩ oigire atĩ, “Ũthamaki wa Ngai nĩ thirikari ya biũ.” “No ndĩngĩoneka na maitho o na ũngĩĩkĩra macicio!”

Folake nĩ aathire na mbere gũtaarĩria igũrũ rĩgiĩ irathimo cia Ũthamaki iria we eriragĩria gũkona. Akĩgweta mamwe ma mathĩna marĩa Ũthamaki ũkanina, aandĩkire ũũ, “nĩ njiguaga ihooru mũno rĩrĩa ndona andũ matarĩ na gwa gũikara, makĩnyamarĩka” o hamwe na “ciana igĩkua nĩ ũndũ wa kwaga irio kũndũ gũtiganĩte thĩinĩ wa thĩ.” Ongereire ũũ, “Nĩ ngenaga rĩrĩa ndathoma Isaia 65:21.” Ũhoro-inĩ wĩgiĩ andũ arĩa magatũũra rungu rwa wathani wa Ũthamaki wa Ngai, mũhari ũcio wĩranĩire ũũ, “Nao nĩmagaaka nyũmba, na macitũũre, na mahande mĩgũnda ya mĩthabibũ, o na marĩage maciaro mayo.”

Folake oigire atĩ ningĩ nĩ eriragĩria gũkona hĩndĩ ĩrĩa Ngai kũgerera Ũthamaki wake akaniina mĩrimũ yothe. Nĩ aagwetire rĩandĩko rĩa Kũguũrĩrio 21:4 rĩrĩa riugaga atĩ Ngai, ‘nĩakamagiria maithori mothe mathire maitho mao; nakĩo gĩkuũ gĩtirĩ hingo gĩgacoka kũgĩa, o na gũtirĩ hingo gũgacoka kũgĩa na kĩeha, kana kĩrĩro, kana ruo.’ Agĩtiriha, nĩ acokerire ciugo icio akiuga atĩ, kwaria igũrũ rĩgiĩ Jehova na Ũthamaki wake nĩguo ũndũ ũrĩa endete mũno thĩinĩ wa thĩ. Hatarĩ nganja kairĩtu kau kanini nĩ konaga Ũthamaki wa Ngai ũrĩ wa bata mũno ũtũũro-inĩ wako!