Ũrĩa Bibilia Ĩngĩgũteithia Kwagagĩria Ũtũũro Waku

Bibilia ndĩhaana ta mabuku marĩa mangĩ. Ĩkoragwo na ũtaaro uumĩte kũrĩ Mũũmbi witũ. (2 Timotheo 3:16) Ndũmĩrĩri yayo no ĩtũhutie na njĩra nene. Bibilia yugaga ũũ: “Kiugo kĩa Ngai kĩrĩ muoyo na nĩ kĩrĩ hinya.” (Ahibirania 4:12) Nĩ ĩkoragwo na ũhoti wa gũtũma twagagĩrie ũtũũro witũ na njĩra igĩrĩ nene. Kwagagĩria ũtũũro witũ wa o mũthenya na kũmenya Ngai na ciĩranĩro ciake.​—1 Timotheo 4:8; Jakubu 4:8.

Kwagagĩria ũtũũro waku. Bibilia no ĩkũhe ũtaaro ũngĩgũteithia wee mwene. Ũtaaro ũcio wĩgiĩ maũndũ maya.

• Ũrĩa tũngĩikarania na andũ arĩa angĩ. ​—Aefeso 4:​31, 32; 5:​22, 25, 28, 33.

• Thayũ wa meciria na ũgima mwega wa mwĩrĩ.​—Thaburi 37:8; Thimo 17:22.

• Mĩtugo mĩega.​—1 Akorintho 6:​9, 10.

• Kũruta wĩra na kĩyo.​—Thimo 10:4; 28:19; Aefeso 4:28.a

Mũthuri ũmwe wĩtagwo Vicent na mũtumia wake Annalou, kuuma Asia nĩ maakenire mũno nĩ ũndũ wa ũtaaro wa Bibilia. O ta andũ aingĩ arĩa mataikarĩte kĩhiko-inĩ, o nao maarĩ na mathĩna ma kũmenyana na ma kwaga kũhingũranĩra ngoro. No nĩ maambĩrĩirie gwĩka kũringana na maũndũ marĩa maathomaga Bibilia-inĩ. Maagĩire na moimĩrĩro marĩkũ? Mũthuri ũcio oigire ũũ: “Maũndũ marĩa ndaathomire Bibilia-inĩ nĩ maandeithirie kũhiũrania na mathĩna ma kĩhiko na njĩra ya wendo. Kũrũmĩrĩra ũtaaro wa Bibilia nĩ gũtũmĩte tũgĩe na ũtũũro ũrĩ na gĩkeno.” Nake mũtumia wake oigire ũũ: “Gũthoma ũhoro wa cionereria iria irĩ Bibilia-inĩ nĩ gwatũteithirie mũno. Njiguaga ndĩ na gĩkeno na njiganĩire thĩinĩ wa kĩhiko gitũ na igũrũ rĩgiĩ maũndũ marĩa tũbangaga gwĩka.”

Kũmenya Ngai wega. Akĩaria ũhoro wa ũrĩa Bibilia ĩmũgunĩte na njĩra ĩngĩ, Vicent oigire ũũ: “Nĩ ũndũ wa gũthoma Bibilia, rĩu njiguaga ndĩ na ũrata mwega mũno na Jehova gũkĩra tene.” Ũndũ ũcio Vicent oigire ũratĩtĩrithia ũndũ ũmwe wa bata mũno, atĩ Bibilia no ĩgũteithie ũmenye Ngai. Wathoma Bibilia nĩ ũkũgunĩka nĩ ũtaaro wa Ngai na ningĩ nĩ ũkũmũmenya makĩria na atuĩke mũrata waku. Nĩ ũkuona atĩ nĩ eranĩire ũhoro wa mahinda mega magooka rĩrĩa ũgaakenera “muoyo ũrĩa wa ma” ũtagaathira. (1 Timotheo 6:19) Gũtirĩ ibuku rĩngĩ rĩngĩtwĩra ũhoro wa maũndũ macio.

Ũngĩambĩrĩria gũthoma Bibilia na ũthiĩ na mbere ũtegũkua ngoro, o nawe no wagagĩrie ũtũũro waku na ũmenye Ngai. O na kũrĩ ũguo, o ũrĩa ũgũthiĩ na mbere gũthoma Bibilia, kwahoteka noguo ũkũgĩa na ciũria nyingĩ. Na ũgĩka ũguo, wĩcirie ũhoro wa kĩonereria kĩa Mũethiopia ũrĩa watũũraga mĩaka ta 2,000 mĩhĩtũku. Aarĩ na ciũria nyingĩ mũno ciĩgiĩ Bibilia. Rĩrĩa oririo kana nĩ aataũkagĩrũo nĩ kĩrĩa aathomaga, aacokirie ũũ: “Atĩrĩrĩ, ingĩgĩtaũkĩrũo atĩa itataarĩirio nĩ mũndũ?”b Nĩ aacokire agĩtĩkĩra gũteithĩrĩrio nĩ Filipu, ũrĩa warĩ mũrutwo wa Jesu, tondũ aarĩ mũrutani mwega wa Bibilia. (Atũmwo 8:30, 31, 34) Angĩkorũo no wende kũmenya makĩria igũrũ rĩgiĩ Bibilia o ta Mũethiopia ũcio, tũrakũria ũhoe wĩruti wa Bibilia kũgerera www.jw.org/ki kana ũtũme marũa ũkĩhũthĩra andirethi ĩmwe ya iria irĩ ngathĩti-inĩ ĩno. Ningĩ no waranĩrie na Aira a Jehova arĩa magũkuhĩrĩirie kana ũceere Nyũmba-inĩ ya Ũthamaki ĩrĩa ĩrĩ hakuhĩ nawe. Na githĩ to wambĩrĩrie gũthoma Bibilia o ũmũthĩ na ũreke ĩgũtongoragie nĩguo ũgĩe na ũtũũro mwega makĩria?