‘Ũrĩa Mũtana nĩ Arĩrathimagwo’

MAGONGONA nĩ makoretwo marĩ gĩcunjĩ kĩa bata kĩa ũthathaiya wa ma kwa ihinda iraihu. Aisiraeli maarutaga magongona ma nyamũ, nao Akristiano nĩ moĩo nĩ ũndũ wa kũruta “igongona rĩa kũgooca.” O na kũrĩ ũguo, nĩ kũrĩ magongona mangĩ makenagia Ngai. (Ahib. 13:15, 16) Magongona macio matũmaga mũndũ agĩe irathimo na gĩkeno, o ta ũrĩa ngerekano ici irũmĩrĩire ironania.

Hana, ũrĩa warĩ ndungata njĩhokeku, nĩ eendaga mũno kũgĩa mwana no ndaarĩ na ũhoti wa kũgĩa ciana. Aaigire mwĩhĩtwa harĩ Jehova kũgerera mahoya akĩmwĩra atĩ angĩagĩire na kahĩĩ ‘nĩ angĩakaheire Jehova matukũ mothe ma muoyo wako.’ (1 Sam. 1:10, 11) Thutha wa ihinda, Hana nĩ aagĩire kahĩĩ na agĩgeta Samueli. Gaatiga kuonga, nĩ aagatwarire hekarũ-inĩ, o ta ũrĩa oigĩte mwĩhĩtwa-inĩ wake. Jehova nĩ aarathimire Hana nĩ ũndũ wa roho wake wa kwĩima. Hana nĩ aagĩire na ciana ingĩ ithano, na Samueli agĩtuĩka mũnabii na mwandĩki wa Bibilia.—1 Sam. 2:21.

O ta Hana na Samueli, Akristiano nĩ makoragwo na mweke wa kũhũthĩra ũtũũro wao gũtungatĩra Mũũmbi wao. Jesu nĩ eeranĩire atĩ magongona marĩa mothe tũrutaga ũtungata-inĩ wa Jehova, nĩ marĩrathimagwo na njĩra nene.—Mar. 10:28-30.

Karine-inĩ ya mbere, Mũkristiano wetagwo Dorokasi nĩ oĩkaine mũno nĩ ũndũ wa “maũndũ maingĩ mega na nĩ aaheanaga iheo cia tha” nĩguo ateithie arĩa angĩ. O na kũrĩ ũguo, ũndũ wa kĩeha nĩ atĩ aacokire “akĩrwara na agĩkua,” na ũndũ ũcio ũkĩrehera kĩũngano kĩeha kĩnene. Rĩrĩa arutwo maaiguire atĩ Petero aarĩ itũũra-inĩ rĩu, nĩ maamũthaithire mathiĩ nake kwa Dorokasi na ihenya. Ta wĩcirie gĩkeno kĩrĩa marĩ nakĩo thutha wa Petero kũriũkia Dorokasi! Rĩu nĩrĩo rĩarĩ rita rĩa mbere rĩa mũtũmwo kũriũkania thĩinĩ wa Bibilia. (Atũm. 9:36-41) Ngai ndaariganĩirũo nĩ magongona marĩa Dorokasi aarutaga. (Ahib. 6:10) Ũhoro wĩgiĩ ũtana wake nĩ wandĩkĩtwo thĩinĩ wa Kiugo kĩa Ngai ũrĩ kĩonereria kĩega nĩguo twĩgerekanagie nake.

O na mũtũmwo Paulo nĩ aaigire kĩonereria kĩega harĩ kũheana mahinda make na kũrũmbũiya andũ. Akĩandĩkĩra Akristiano a Korintho, oigire ũũ: “Niĩ-rĩ, ngũhũthĩra indo ciothe iria ndĩ nacio ngenete na ndĩĩheane biũ nĩ ũndũ wanyu.” (2 Kor. 12:15) Paulo eerutire na maũndũ marĩa aagereire atĩ mũndũ angĩima nĩ ũndũ wa arĩa angĩ nĩ aiguaga aiganĩire, na makĩria ma ũguo agetĩkĩrĩka na akarathimwo nĩ Jehova.—Atũm. 20:24, 35.

Hatarĩ nganja, Jehova nĩ akenaga rĩrĩa twahũthĩra hinya na mahinda maitũ gũtwarithia maũndũ ma Ũthamaki na mbere, na rĩrĩa twateithia Akristiano arĩa angĩ. No hihi nĩ kũrĩ maũndũ mangĩ tũngĩka nĩguo tũnyite mbaru wĩra wa kũhunjia Ũthamaki? Ĩĩ nĩ kũrĩ. Makĩria ma kũhũthĩra hinya na mahinda maitũ, no tũtĩe Ngai na njĩra ya kũruta indo citũ twĩyendeire. Indo icio ihũthagĩrũo gũtwarithia na mbere wĩra wa kũhunjia, na nĩ hamwe na gũteithĩrĩria amishonarĩ na ndungata cia mwanya cia mahinda mothe. Ningĩ, maũndũ mothe megiĩ kũhaarĩria na gũtaũra mabuku na video, gũteithĩrĩria hĩndĩ ya icanjama, na gwaka nyũmba njerũ cia Ũthamaki matwarithagio na mbere kũgerera mĩhothi ya kwĩyendera. No tũkorũo na ma atĩ “ũrĩa wa riitho rĩa ũtana, we nĩarĩrathimagwo.” Makĩria ma ũguo, nĩ tũtĩaga Jehova hĩndĩ ĩrĩa twamũhe indo citũ cia goro.—Thim. 3:9; 22:9.

Njĩra Iria Amwe Mahũthagĩra Kũruta Mĩhothi Nĩ Ũndũ wa Wĩra wa Thĩ Yothe

O ta ũrĩa kwarĩ matukũ-inĩ ma mũtũmwo Paulo, andũ aingĩ ũmũthĩ nĩ ‘maigaga kĩndũ’ kana makabanga gĩcunjĩ kĩna kĩa mbeca na magaikia ithandũkũ-inĩ rĩa kĩũngano rĩrĩa rĩkoragwo rĩandĩkĩtwo “Wĩra wa Thĩ Yothe.” (1 Kor. 16:2) O mweri, kĩũngano nĩ gĩtũmaga mĩhothi ĩyo wabici-inĩ ya Aira a Jehova ya kwao. Ningĩ o nawe no ũtũme mĩhothi yaku ĩmwe kwa ĩmwe kũrĩ rũhonge rwĩtĩkĩrĩku kĩĩwatho, rũrĩa rũhũthagĩrũo nĩ Aira a Jehova bũrũri-inĩ wanyu. Nĩguo ũmenye rĩĩtwa rĩa rũhonge rũu, no waranĩrie na wabici ya Aira a Jehova ĩrĩa ĩrũgamĩrĩire bũrũri wanyu. Andirethi cia wabici ĩyo no cioneke thĩinĩ wa www.jw.org/ki. Kũringana na maũndũ ma kwanyu mĩthemba ya mĩhothi ĩrĩa ũngĩtũma ĩmwe kwa ĩmwe nĩ:

MĨHOTHI YA ĨMWE KWA ĨMWE

Mũndũ no arute mĩhothi yake kũgerera electronic bank transfer, debit card, kana credit card. Wabici-inĩ imwe cia honge, mũndũ no atũme mĩhothi ĩyo kũgerera jw.org kana website ĩngĩ ĩrĩa ĩthurĩtwo.
Mbeca, mathaga ma goro, kana indo ingĩ cia bata. Nĩ wega gũtũma marũa maronania atĩ mbeca kana indo icio nĩ mĩhothi ya ĩmwe kwa ĩmwe.

MĨHOTHI ĨRĨ NA MĨHAKA

Mĩhothi ĩno nĩ mbeca irĩkanĩirũo atĩ no icokio mũheani angĩcibatara.
Nĩ wega gũtũma marũa maronania atĩ mĩhothi ĩyo ĩrĩ na mĩhaka.

MĨHOTHI ĨNGĨ

Makĩria ma iheo cia mbeca na indo cia bata, nĩ harĩ njĩra ingĩ cia kũhotha nĩguo mũndũ ateithĩrĩrie wĩra wa Ũthamaki wa thĩ yothe. Njĩra icio nĩ cionanĩtio haha mũhuro. O na angĩkorũo ũngĩenda kũhũthĩra njĩra irĩkũ, amba warie na wabici ya Aira a Jehova ĩrĩa ĩrũgamĩrĩire bũrũri wanyu nĩguo ũmenye nĩ njĩra irĩkũ ingĩhũthĩka. Na tondũ mawatho ma mabũrũri na ma kũruta igooti nĩ matiganĩte, harĩ bata kwaranĩria na mũndũ ũĩ wega ũhoro wa watho na ũhoro wĩgiĩ kũruta magooti ũtanathuura njĩra ĩrĩa njega ya kũhotha.

Marĩhi ma Kũrũgamĩrĩra Ũndũ Ũterĩgĩrĩirũo (Insurance) na Mbeca cia Ritaya: Ĩno nĩ mĩhothi ĩrutĩtwo na njĩra ya kũgweta atĩ rũhonge rũna rũhũthagĩrũo nĩ Aira a Jehova nĩruo rũkaagunĩka nĩ marĩhi macio kana mbeca iria mũndũ arĩhagwo ũkũrũ-inĩ kana atiga wĩra.

Akaunti cia Bengi: Ici nĩ akaunti cia bengi iria ingĩrĩhwo kũrĩ rũhonge rũna rũhũthagĩrũo nĩ Aira a Jehova mũndũ angĩkua, kũringana na mĩtaratara ya bengi cia kwanyu.

Cĩya na Bondi (stocks and bonds): Cĩya na bondi no iheanwo kũrĩ rũhonge rũna rũhũthagĩrũo nĩ Aira a Jehova irĩ kĩheo kĩa ĩmwe kwa ĩmwe kana kũiguanĩra atĩ nĩ igaatuĩka cia rũhonge rũu mũndũ akua.

Nyũmba na Mĩgũnda: Ici nĩ nyũmba na mĩgũnda ĩrĩa ĩheanagwo kũrĩ rũhonge rũna rũhũthagĩrũo nĩ Aira a Jehova, hihi irĩ iheo cia ĩmwe kwa ĩmwe kana angĩkorũo nĩ nyũmba ya gũikara, no marĩkanĩre atĩ mũheani egũthiĩ na mbere gũikara thĩinĩ wayo hĩndĩ ĩrĩa yothe egũkorũo e muoyo.

Marũa ma Kwĩgaya na Ũramati (Wills and Trusts): Indo kana mbeca no ciĩhokerũo rũhonge rũhũthagĩrũo nĩ Aira a Jehova kũgerera marũa ma kĩĩwatho ma kwĩgaya, kana kũgweta atĩ rũhonge rũu nĩruo rũkaagunĩka nĩ ngirimiti ya ũramati. Mũbango ũcio no ũkorũo na ũguni mũna ũhoro-inĩ wĩgiĩ igooti.

O ta ũrĩa ciugo “mĩhothi ya mĩthemba” ciugĩte, mĩhothi ĩyo nĩ ĩbataraga mĩbango mĩega harĩ ũrĩa ũramĩheana. Nĩ ũndũ wa gũteithĩrĩria andũ arĩa mangĩenda gũteithia wĩra wa thĩ yothe wa Aira a Jehova kũgerera njĩra imwe cia icio, nĩ kũrĩ broshua ĩĩtagwo Charitable Planning to Benefit Kingdom Service Worldwide ya rũthiomi rwa Gĩthũngũ na Kĩhispania. Broshua ĩyo yaandĩkirũo nĩguo ĩtaarĩrie njĩra imwe cia kũheana iheo, rĩrĩa mũndũ arĩ muoyo kana thutha wake gũkua. Ũhoro ũmwe ũrĩa ũrĩ broshua-inĩ ĩno no wage kũhũthĩka harĩ we nĩ ũndũ wa igooti kana mawatho mangĩ ma bũrũri wanyu. Kũgerera njĩra icio cia kũruta mĩhothi, andũ aingĩ nĩ mahotete gũteithĩrĩria wĩra witũ wa kĩĩndini, na wa gũteithia andũ thĩ yothe, na makanyihanyihia marĩhi mao ma igooti. Angĩkorũo broshua ĩyo nĩ yonekaga bũrũri-inĩ wanyu, no wĩtie kobĩ kuuma kũrĩ mwandĩki wa kĩũngano kĩanyu.

Ũngĩenda ũhoro makĩria hingũra website ya jw.org/ki, na ũthiĩ mwena wa mũhuro ũhingũre gacunjĩ karĩ na kĩongo “Ruta Mũhothi nĩ Ũndũ wa Wĩra Witũ wa Thĩ Yothe,” kana waranĩrie na wabici ya rũhonge.