Menyeria Ciana Ciaku Ituĩke Ahunjia
1. Thaburi 148:12, 13 ĩkĩraga aciari Akristiano ngoro gwĩka atĩa?
1 Jehova nĩ etaga andũ ethĩ moke mamũgooce. (Thab. 148:12, 13) Aciari Akristiano makĩria ma kũruta ciana ciao ma cia Bibilia na mawatho ma Ngai megiĩ mĩtugo-rĩ, nĩ macimenyeragia gũkorũo irĩ ahunjia a ũhoro ũrĩa mwega. Ũndũ ũyũ ũngĩkwo atĩa ũtegũtigithĩrio?
2. Mũhaano mwega wa mũciari ũngĩteithia ciana ciake atĩa?
2 Mũhaano Mwega: Gideoni mũtuithania ciira erire arũme 300 ũũ: “Nĩmũkanyũthĩrĩria mwĩke o ta ũrĩa ndĩrĩĩka.” (Atiir. 7:17) Nĩ ũndũ wa ndũire ciana kũrora na kwĩgerekania na aciari ao. Mũthuri ũmwe ũrutaga wĩra ũtukũ, handũ ha gũkoma Njuuma rũcinĩ ainũka, athiaga kũhunjia hamwe na ciana ciake o na gũtuĩka akoragwo arĩ mũnogu mũno. O na atekuuga ũndũ, aramaruta atĩ kũhunjia nĩkuo kwagĩrĩire gũkorũo kũrĩ ũndũ wa bata. (Mat. 6:33) Hihi ciana ciaku nĩ ikuonaga ũgĩkenera mĩthemba ya ũthathaiya, ta kũhoya, gũthoma Bibilia, gũcokia ciũria, na kũhunjia? Hatarĩ nganja ndũngĩkorũo ũrĩ mũhaano mũkinyanĩru. No ciana ciaku nĩ irĩtĩkagĩra gũthathaiya Jehova kũringana na ũrĩa ũraciruta ingĩona kĩyo gĩaku gĩa kũmũtungatĩra.—Gũcok. 6:6, 7; Rom. 2:21, 22.
3. Nĩ mĩoroto ĩrĩkũ ya kĩĩroho ya gũthiĩ na mbere aciari magĩrĩirũo nĩ gũteithia ciana ciao kwĩigĩra na gũkinyĩra?
3 Mĩoroto ya Gũthiĩ na Mbere: Aciari nĩ mamenyeragia ciana ciao gũthiĩ, kwaria, kwĩhumba, na maũndũ mangĩ maingĩ matekũnoga. O ũria ciana irakũra na igakinyĩra mĩoroto yao, nĩ ciigagĩrũo ĩngĩ mĩerũ. Angĩkorũo aciari nĩ Akristiano-rĩ, nĩ mateithagia ciana ciao kwĩigĩra na gũkinyĩra mĩoroto ya kĩĩroho kũringana na mĩaka na ũhoti wao. (1 Kor. 9:26) Hihi we nĩ ũrutaga ciana ciaku gũcokia ciũria na ciugo ciao, na kũharĩria mĩario yao thĩinĩ wa Cukuru ya Ũtungata wa Gĩtheokrasi? (Thab. 35:18) Nĩ ũramamenyeria kũhunjia ũtungata-inĩ wa mĩthemba yothe? Nĩ ũramaigĩra muoroto wa kũbatithio na kũingĩra ũtungata-inĩ wa mahinda mothe? Nĩ ũramateithia kũnyitanĩra na ahunjia arĩa marĩ gĩkeno, mangĩmekĩra ngoro?—Thim. 13:20.
4. Ciana igunĩkaga atĩa ingĩkorũo na aciari arĩa mambagĩrĩria kũmamenyeria kũhunjia marĩ o anyinyi?
4 Mwandĩki wa Thaburi oigire ũũ: “Ngai, nĩwe ũtũire ũndutaga kuuma ndĩ o mũnyinyi, na nginya rĩu no nyumbũraga maũndũ ma magegania marĩa waneka.” (Thab. 71:17) Ambĩrĩria kũmenyeria ciana ciaku gũtuĩka ahunjia kuuma marĩ o anyinyi. Mũthingi wa kĩĩroho ũrĩa ũkũmateithia meigĩre nĩ ũkaamaguna nginya maatuĩka andũ agima.—Thim. 22:6.